ຝຣັ່ງໄດ້ຕໍາໜິຕິຕຽນກຸ່ມເນໂຕ້ວ່າບໍ່ໄດ້ດໍາເນີນການພຽງພໍ
ເພື່ອປົກປ້ອງພວກພົນລະເຮືອນໃນລີເບຍນັ້ນ.ທ່ານ Alain
Juppe ລັດຖະມົນຕີການຕ່າງປະເທດຝຣັ່ງກ່າວຕໍ່ວິທະຍຸ
ຝຣັ່ງວ່າ ກຸ່ມເນໂຕ້ຈະຕ້ອງຫລິ້ນບົດບາດຂອງຕົນຢ່າງເຕັມ
ສ່ວນແລະດໍາເນີນການຫລາຍຂຶ້ນເພື່ອທໍາລາຍພວກອາວຸດ
ຍຸດໂທປະກອນຂະໜາດໜັກຂອງທ່ານກາດດາຟີຜູ້ນໍາລີເບຍນັ້ນ.
ທ່ານ Juppe ກ່າວຕື່ມວ່າ ທ່ານຈະຍົກເລື້ອງນີ້ຂຶ້ນມາໃນ
ລະຫວ່າງກອງປະຊຸມບັນດາລັດຖະມົນຕີການຕ່າງປະເທດ
ຂອງສະຫະພາບຢູໂຣບທີ່ໄຂຂຶ້ນໃນວັນອັງຄານມື້ນີ້ ແລະ
ກັບພວກລັດຖະມົນຕີຕ່າງປະເທດຂອງກຸ່ມເນໂຕ້ໃນທ້າຍ
ສັບປະດານີ້.
ພວກເຮືອບິນລົບຂອງກຸ່ມເນໂຕ້ໄດ້ເລີ້ມທໍາການໂຈມຕີທາງ
ອາກາດໃນເດືອນແລ້ວນີ້ ຫລັງຈາກສະຫະປະຊາຊາດຮັບ
ຜ່ານມະຕິສະບັບນຶ່ງອະນຸມັດໃຫ້ຈັດຕັ້ງເຂດຫ້າມການບິນຂຶ້ນເໜືອລີເບຍນັ້ນ ໃນຄວາມພະ
ຍາຍາມເພື່ອປົກປ້ອງພວກພົນລະເຮືອນທີ່ຖືກໂຈມຕີໂດຍກໍາລັງຂອງກາດດາຟີ.
ເຖິງແມ່ນມີການໂຈມຕີທາງອາກາດນີ້ກໍຕາມ ແຕ່ການສູ້ລົບກັນຍັງດໍາເນີນສືບຕໍ່ມາ ຢູ່ໃນ 2 ແນວລົບລະຫວ່າງພວກກະບົດແລະກໍາລັງທີ່ນິຍົມທ່ານກາດດາຟີ.
ໃນວັນຈັນວານນີ້ ລັດຖະບານຊົ່ວຄາວຂອງພວກກະບົດໃນລີເບຍປະຕິເສດຕໍ່ແຜນການຢຸດຍິງ
ທີ່ສະເໜີໂດຍສະຫະພາບອາຟຣິກາ ທີ່ເອີ້ນທາງເລືອກດັ່ງກ່າວວ່າ ມັນພົ້ນສະໄໝໄປແລ້ວ
ເພາະວ່າມັນບໍ່ໄດ້ປະຕິບັດໄປຕາມຄໍາຮຽກຮ້ອງຂັ້ນພື້ນຖານຂອງພວກເຂົາເຈົ້າທີ່ຂໍໃຫ້ທ່ານ
ກາດດາຟີພ້ອມທັງພວກລູກຊາຍຂອງທ່ານສະລະອໍານາດແລະອອກຈາກປະເທດໄປໂດຍ
ທັນທີນັ້ນ.
ບັນດາເຈົ້າໜ້າທີ່ສະຫະພາບອາຟຣິກາກ່າວວ່າ ນອກຈາກໃຫ້ມີການຢຸດຍິງໂດຍທັນທີແລ້ວ
ຂໍ້ສະເໜີດັ່ງກ່າວຍັງຮຽກຮ້ອງໃຫ້ມີການໂອ້ລົມສົນທະນາກັນລະຫວ່າງພວກກະບົດແລະລັດ
ຖະບານ ການປົກປ້ອງພວກຊາວຕ່າງປະເທດໃນລີເບຍແລະໃຫ້ມີການຊ່ອຍເຫລືອດ້ານມະ
ນຸດສະທໍາແກ່ພວກພົນລະເຮືອນນໍາ. ພວກເຈົ້າໜ້າທີ່ເຫລົ່ານີ້ກ່າວວ່າ ແຜນການດັ່ງກ່າວນີ້
ໄດ້ຖືກຮັບເອົາໂດຍທ່ານກາດດາຟີແລ້ວ.