ທ່ານ David Cameron ນາຍົກລັດຖະມົນຕີອັງກິດກ່າວໃນວັນອາທິດ ມື້ນີ້ວ່າ ການໂຈມຕີຂອງກໍາລັງເນໂຕ້ແມ່ນແນເປົ້າໝາຍໃສ່ກອງບັນຊາການແລະໜ່ວຍຄວບຄຸມຕ່າງໆຂອງລີເບຍ ບໍ່ແມ່ນແນເປົ້າໝາຍໃສ່ບຸກຄົນໃດບຸກຄົນນຶ່ງ ໂດຍສະເພາະເຈາະຈົງ.
ແຕ່ທ່ານ Cameron ບໍ່ຍອມສະແດງຄວາມເຫັນໃດໆກ່ຽວກັບລາຍ ງານສື່ມວນຊົນທີ່ວ່າ ລູກຊາຍຄົນນຶ່ງຂອງທ່ານມວມມາກາດາຟີ ຜູ້ນໍາລີເບຍໄດ້ເສຍຊີວິດ ໃນການໂຈມຕີທາງອາກາດຂອງກຸ່ມເນໂຕ້ນັ້ນ.
ທ່ານ Moussa Ibrahim ໂຄສົກປະຈໍາລັດຖະບານລີເບຍ ກ່າວໃນ ຕອນແລງວັນເສົາວານນີ້ວ່າ ທ້າວ Saif al-Arab ວັຍ 29 ປີແລະ ຫລານຂອງທ່ານກາດດາຟີ 3 ຄົນໄດ້ເສຍຊີວິດໃນລະຫວ່າງອັນທີ່ທ່ານ Ibrahim ເອີ້ນວ່າ ຄວາມພະຍາຍາມໂດຍກົງເພື່ອລອບສັງຫານຜູ້ນໍາລີເບຍນັ້ນ.
ທ່ານ Ibrahim ກ່າວຕື່ມວ່າ ທ່ານກາດດາຟີພ້ອມດ້ວຍພັນລະຍາໄດ້ຢູ່ໃນເຮືອນຂອງລູກຊາຍຂອງທ່ານໃນເວລານັ້ນ ແຕ່ບໍ່ໄດ້ຮັບບາດເຈັບໃດໆ ແຕ່ວ່າ ມີຄົນອື່ນໆຫລາຍຄົນຢູ່ໃນເຮືອນໄດ້ຮັບບາດເຈັບ.
ໄດ້ມີການພາໂຕພວກນັກຂ່າວໄປຍັງເຮືອນຫລັງດັ່ງກ່າວ ບ່ອນທີ່ພວກເຂົາເຈົ້າໄດ້ເຫັນຄວາມເສຍຫາຍຢ່າງຫລວງຫລາຍນັ້ນ.
ນາຍົກລັດຖະມົນຕີອັງກິດ ກ່າວວ່າ ນະໂຍບາຍການແນເປົ້າໝາຍໂຈມຕີຂອງກຸມເນໂຕ້ ແມ່ນສອດຄ່ອງກັບມະຕິຂອງສະຫະປະຊາຊາດ ທີ່ຮຽກຮ້ອງໃຫ້ມີການປົກປ້ອງການເສຍຊີວິດຂອງພວກພົນລະເຮືອນນັ້ນ. ທ່ານ Cameron ກ່າວຕື່ມວ່າ ແລະນັ້ນໝາຍຄວາມວ່າ ແນເປົ້າໝາຍໃສ່ກອງບັນຊາການແລະໜ່ວຍຄວບຄຸມ ຕະຫລອດທັງພວກຍຸດໂທປະກອນທາງ ທະຫານ.
ໃນຕອນເຊົ້າວັນເສົາວານນີ້ ກຸ່ມເນໂຕ້ ໄດ້ປະຕິເສດຕໍ່ຂໍ້ສະເໜີຈາກທ່ານກາດດາຟີ ເພື່ອໃຫ້ທໍາການເຈລະຈາກັນເພື່ອຫາທາງຢຸດຕິບັນຫາຂັດແຍ້ງໃນປະເທດຂອງທ່ານໂດຍກ່າວວ່າ ຂໍ້ສະເໜີທີ່ວ່ານີ້ ບໍ່ມີຂໍ້ດີໃດໆທີ່ສົມຄວນຈະໄດ້ຮັບການພິຈາລະນາ.
