ພວກກະບົດລີເບຍກ່າວວ່າ ການໂຈມຕີທາງອາກາດຂອງກຸ່ມເນໂຕ້ບັ້ນນຶ່ງ ໄດ້ສັງຫານ
ນາຍ Khamis ລູກຊາຍຂອງມວມມາ ກາດດາຟີ ແລະຄົນອື່ນໆອີກ 30 ກ່ວາຄົນ.
ໂຄສົກຄົນນຶ່ງຂອງພວກກະບົດກ່າວໃນວັນສຸກມື້ນີ້ວ່າ ການໂຈມຕີດັ່ງກ່າວ ແມ່ນເກີດ
ຂຶ້ນທີ່ ເມືອງ Ziltan ຢູ່ພາກຕາເວັນຕົກຂອງປະເທດ ຊຶ່ງເປັນ ບ່ອນປະທະສູ້ລົບກັບ
ເມື່ອໝໍ່ໆມານີ້ ລະຫວ່າງກໍາລັງຝ່າຍລັດຖະບານແລະ ພວກກະບົດນັ້ນ.
ເວລານີ້ຍັງບໍ່ມີການຢືນຢັນຈາກແຫລ່ງອິດສະລະວ່າ ນາຍ Khamis ກາດດາຟີ
ໄດ້ຖືກຂ້າຕາຍແລ້ວ ເຈົ້າໜ້າທີ່ຄົນນຶ່ງຂອງກຸ່ມເນໂຕ້ທີ່ກອງບັນຊາການປະຕິບັດງານ
ທີ່ເມືອງເນເປິລ ປະເທດອີຕາລີກ່າວວ່າ ຝ່າຍພັນທະມິດກໍາລັງສຶກສາເບິ່ງລາຍງານ
ຂ່າວນີ້ຢູ່.
ນາຍ Khamis ກາດດາຟີ ໄດ້ດໍາລົງຕໍາແໜ່ງເປັນຜູ້ບັນຊາການສໍາຄັນ ຄົນນຶ່ງຂອງ
ກອງທັບຂອງພໍ່ຂອງຕົນ. ການເສຍຊີວິດຂອງນາຍຄາມີສ ຈະສົ່ງຜົນສະທ້ອນຢ່າງແຮງ
ຕໍ່ຄວາມພະຍາຍາມຂອງຜູ້ນໍາລີເບຍ ເພື່ອປາບປາມຂັດຂວາງການລຸກຮືຂຶ້ນມາເປັນເວ
ລາຫລາຍເດືອນແລ້ວນັ້ນ ໃນຕົ້ນປີນີ້ ລັດຖະບານຂອງທ່ານກາດດາຟີ ກໍໄດ້ກ່າວວ່າ
ການໂຈມຕີທາງອາກາດຂອງກຸ່ມເນໂຕ້ ໄດ້ສັງຫານນາຍ Saif al-Arab ລູກຊາຍອີກ
ຄົນນຶ່ງຂອງກາດດາຟີ.
ວັນພະຫັດວານນີ້ ລັດຖະບານຂອງທ່ານກາດດາຟີ ໄດ້ກ່າວຫາກຸ່ມເນໂຕ້ວ່າ ຖິ້ມລະ
ເບີດໃສ່ເປົ້າໝາຍທີ່ເປັນພົນລະເຮືອນໃນເມືອງ Ziltan ນັ້ນ.
ລັດຖະບານໄດ້ອອກຄໍາກ່າວຫາດັ່ງກ່າວນີ້ ຜ່ານສະຖານີໂທລະພາບຂອງລັດ ນຶ່ງມື້
ຫລັງຈາກພວກເຈົ້າໜ້າທີ່ລັດຖະບານປະຕິເສດຕໍ່ການກ່າວອ້າງຂອງຝ່າຍກະບົດ
ທີ່ວ່າພວກຕົນເຂົ້າຍຶດຄອງເມືອງດັ່ງກ່າວໄດ້ແລ້ວນັ້ນ.
ກຸ່ມເນໂຕ້ປະຕິບັດການໂຈມຕີຢູ່ໃນລີເບຍ ພາຍໃຕ້ການອະນຸມັດຂອງອົງການສະຫະ
ປະຊາຊາດ ເພື່ອພິທັກປົກປ້ອງພວກພົນລະເຮືອນຈາກການ ໂຈມຕີໂດຍກໍາລັງຂອງ
ກາດດາຟີ.
