ປາກົດວ່າ ປະທານາທິບໍດີ Ellen Johnson Sirleaf ກໍາລັງຈະໄດ້ຮັບໄຊຊະນະເປັນປະ
ທານາທິບໍດີຕື່ມອີກສະໄໝນຶ່ງ ໃນການເລືອກຕັ້ງຮອບຕັດສິນຊີ້ຂາດ ທີ່ພວກຝ່າຍຄ້ານບໍ່
ເຂົ້າຮ່ວມນໍາ ແລະມີການປະທະກັນທີ່ມີຜູ້ຄົນເສຍຊີວິດ ລະຫວ່າງຕໍາຫລວດແລະພວກ
ປະທ້ວງ.
ອະດີດລັດຖະມົນຕີຍຸຕິທໍາ ທ່ານ Winston Tubman ຊຶ່ງເປັນຄູ່ແຂ່ງກັບປະທານາທິບໍດີ
ໃນການເລືອກຕັ້ງໃນວັນອັງຄານມື້ນີ້ ໄດ້ຮຽກຮ້ອງໄປຍັງພວກສະໜັບສະໜຸນທ່ານ ບໍ່ໃຫ້
ປະກອບສ່ວນໃນການປ່ອນບັດມື້ນີ້ຍ້ອນຂໍ້ກ່າວຫາວ່າ ມີການສໍ້ໂກງການເລືອກຕັ້ງທີ່ສະໜັບ
ສະໜຸນທ່ານນາງ Sirleaf ນັ້ນ.
ຜູ້ສື່ຂ່າວວີໂອເອກ່າວວ່າ ປະຊາຊົນໄປປ່ອນບັດໜ້ອຍຫລາຍ ຮວມທັງຢູ່ໜ່ວຍປ່ອນບັດ
ເລືອກຕັ້ງແຫ່ງນຶ່ງທີ່ໃນລະຫວ່າງການປ່ອນບັດເລືອກຕັ້ງໃນຮອບທໍາອິດເມື່ອເດືອນແລ້ວນີ້
ມີຜູ້ຄົນຢືນຕໍ່ຫາງລໍຖ້າກັນຢ່າງຍາວຢຽດກ່ອນໜ່ວຍປ່ອນບັດໄຂຂຶ້ນນັ້ນ ແຕ່ໃນວັນອັງຄານ
ມື້ນີ້ກັບມີຫ້ອງເປົ່າຫວ່າງຫລາຍ.
ການຮັກສາຄວາມປອດໄພໄດ້ດໍາເນີນໄປຢ່າງຮັດເຄັ່ງໃນວັນອັງຄານມື້ນີ້ໃນນະຄອນ Mon
rovia ເຂດອ້ອມແອ້ມສໍານັກງານໃຫຍ່ຂອງພັກ Congress for Democratic Change
ຫລື CDC ຂອງທ່ານ Tubman ບ່ອນທີ່ເກີດຄວາມວຸ້ນວາຍຂຶ້ນນຶ່ງມື້ກ່ອນ ລະຫວ່າງຕໍາ
ຫລວດ Liberia ແລະພວກປະທ້ວງຝ່າຍຄ້ານທີ່ໄດ້ເຮັດໃຫ້ປະຊາຊົນຄົນນຶ່ງເສຍຊີວິດໄປ.
ຕໍາຫລວດໄດ້ອັດສະຖານີວິທະຍຸ 3ແຫ່ງໄວ້ໃນຄືນຜ່ານມານີ້ ຮວມທັງສະຖານີແຫ່ງນຶ່ງທີ່
ເປັນຂອງທ່ານ George Weah ຜູ້ສະມັກເລືອກຕັ້ງຮ່ວມກັບທ່ານ Tubman ນັ້ນ.
