ລັດຖະມົນຕີຕ່າງປະເທດສະຫະລັດ ທ່ານ John Kerry ໄດ້ປະນາມ ການສັງຫານນັກ ເຄື່ອນໄຫວເພື່ອສິດທິພວກຮັກຮ່ວມເພດບັງກລາແດັສທ່ານ Xulhaz Mannan ອະດີດ ພະນັກງານສະຖານທູດສະຫະລັດ ໃນນະຄອນ Dhaka.
ທ່ານ Kerry ກ່າວຢູ່ໃນຖະຫລງການສະບັບນຶ່ງໃນຕອນແລງວັນຈັນວານນີ້ວ່າ “ພວກເຮົາມີຄວາມເສຍໃຈຢ່າງເລິກເຊິ່ງ ກ່ຽວກັບການເສຍຊີວິດສະມາຊິກຄົນນຶ່ງຂອງພວກເຮົາ ໃນການກໍ່ຄວາມຮຸນແຮງ ທີ່ບໍ່ມີຄວາມປານີ.” ທ່ານຍັງກ່າວຕື່ມວ່າ ທ່ານ Xulhaz “ໄດ້ຮວບ ຮວມຈິດວິນຍານຂອງຊາວບັງກລາແດັສ ແລະກຽດສັກສິ ທີ່ພວກເຂົາເຈົ້າປົກປ້ອງຮີດ ຄອງປະເພນີໃນການໂຍະຍານຜ່ອນຜັນຂອງເຂົາເຈົ້າ ສັນຕິພາບແລະຄວາມຫຼາກຫຼາຍ.”
ທ່ານ Xulhaz ແລະເພື່ອນຄົນນຶ່ງໄດ້ຖືກຟັນຈົນຕາຍໂດຍຜູ້ໂຈມຕີທີ່ບໍ່ຊາບຝ່າຍ ໃນວັນ ຈັນວານນີ້.
ທ່ານ Mannan ຊຶ່ງເປັນເຈົ້າໜ້າທີ່ຂອງອົງການ USAID ທີ່ຍັງໄດ້ເຮັດວຽກເປັນເຈົ້າໜ້າທີ່ພິທີການທູດ ຢູ່ທີ່ສະຖານທູດສະຫະລັດ ໃນນະຄອນ Dhaka ຢູ່ບ້ານພັກກັບເພື່ອນຂອງ ລາວ ທ່ານ Tanay Mojumdar ເວລາຜູ້ຊາຍຫ້າຄົນໄດ້ໄປເຖິງ ໂດຍປອມແປງເປັນຄົນ ສົ່ງເຄຶ່ອງ ແລະກໍໂດດເຂົ້າຟັນແລະແທງບຸກ ຄົນທັງສອງ.
ທ່ານ Mannan ອາຍຸ 35 ປີ ທີ່ໄດ້ເປັນບັນນາທິການ ວາລະສານ Roophan ຊຶ່ງເປັນ ວາລະສານຂອງພວກຮັກຮ່ວມເພດ ແລະພວກປ່ຽນເພດສະບັບດຽວຂອງປະເທດ ແລະ ເພື່ອນຂອງທ່ານ ທີ່ເປັນນັກເຄື່ອນໄຫວເພື່ອສິດທິພວກຮັກຮ່ວມເພດ ແລະເປັນພະນັກ ງານໂຮງລະຄອນ ທ່ານ Mojumdar ອາຍຸ 26 ປີ ໄດ້ເສຍຊີວິດຄາທີ່.
ເຖິງແມ່ນວ່າຕຳຫລວດຍັງບໍ່ທັນລະບຸໂຕບັນດາຜູ້ໂຈມຕີເທື່ອ ແຕ່ຜູ້ບັນຊາການຕຳຫລວດ ໃນເຂດນະຄອນ Dhakar ທ່ານ Asaduzzaman Mia ກ່າວວ່າ ມັນເປັນຄະດີຂອງ “ການຂ້າແບບມີເປົ້າໝາຍ.”
ທ່ານ Mia ກ່າວໃນວັນຈັນວານນີ້ວ່າ “ພວກເຮົາໄດ້ເກັບກຳເອົາຫລັກຖານທີ່ສຳຄັນຈາກ ບ່ອນເກີດເຫດ. ພວກເຮົາຈະສາມາດລະບຸພວກຄາດຕະກອນໃນບໍ່ຊ້ານີ້ ກ່ອນເຂົາເຈົ້າ ຈະຖືກຈັບ. ພວກຫົວຮຸນແຮງຈຳນວນນຶ່ງອາດຈະຢູ່ເບື້ອງຫລັງການສັງຫານໃນມື້ນີ້.”
ຍາມຮັກສາຄວາມປອດໄພຜູ້ນຶ່ງ ແລະເຈົ້າໜ້າທີ່ຕຳຫຼວດທີ່ພະຍາຍາມຈັບພວກຄົນຮ້າຍ ໄດ້ຮັບບາດເຈັບໃນການໂຈມຕີຄັ້ງນີ້.
