ລິ້ງ ສຳຫລັບເຂົ້າຫາ

ລາຍງານສະບັບໃໝ່ນຶ່ງ ສະເໜີແນະວ່າ ບໍລິສັດຄອມພິວເຕີ
Lenovo ຂອງຈີນ ໄດ້ລໍ້າໜ້າ ບໍລິສັດ Hewlett Packard
ຫລື HP ຍັກໃຫຍ່ຂອງສະຫະລັດ ໃນຖານະເປັນຜູ້ຜະລິດເຄື່ອງ
ຄອມພິວເຕີສ່ວນຕົວ ຫລື PC ອັນດັບນຶ່ງຂອງໂລກ.

ບໍລິສັດຄົ້ນຄວ້າ Gartner ກ່າວຢູ່ໃນລາຍງານໃນວັນພະຫັດ
ມື້ນີ້ວ່າ ຍອດຂາຍສໍາລັບໄຕມາດທີ 3 ຂອງບໍລິສັດ Lenovo
ມີມູນຄ່າເກືອບເທົ່າກັບ 16% ຂອງຕະຫຼາດໂລກທັງໝົດສໍາຫຼັບ
ຄອມພິວເຕີ PC ຊຶ່ງແມ່ນຫລາຍກ່ວາສ່ວນແບ່ງຂອງ HP
ປະມານ 2/10 ຂອງ 1%.

ນີ້ເປັນຄັ້ງທໍາອິດທີ່ບໍລິສັດ Lenovo ທີ່ມີສໍານັກງານຢູ່ກຸງປັກກິ່ງ
ນັ້ນ ໄດ້ກ້າວຂຶ້ນມາລໍ້າໜ້າບໍລິສັດ HP ຊຶ່ງໄດ້ເປັນຜູ້ຜະລິດ
PC ອັນດັບນຶ່ງຂອງໂລກ ມາເປັນເວລາຫລາຍປີ.

ແຕ່ບັນດາເຈົ້າໜ້າທີ່ HP ບໍລິສັດເທັກໂນໂບຈີຍັກໃຫຍ່ຂອງສະຫະລັດ ໃນເຂດ Silicon
Valley ລັດແຄລິຟໍເນຍ ທີ່ກໍາລັງປະສົບກັບບັນຫານັ້ນ ໄດ້ຊີ້ໂດຍໄວ ໄປໃສ່ຜົນການສຶກ
ສານຶ່ງອີກຕ່າງຫາກ ໂດຍບໍລິສັດວິເຄາະຕະຫຼາດ IDC ທີ່ຍັງຈັດໃຫ້ HP ເປັນຜູ້ນໍາຢູ່
ເຖິງແມ່ນວ່າຊ່ອງຫວ່າງກໍາລັງຫຍັບເຂົ້າໃກ້ກັນຢ່າງໄວກໍຕາມ.

ເຖິງຢ່າງໃດກໍຕາມ ການສຶກສາຂອງທັງ 2 ບໍລິສັດ ໄດ້ສະແດງໃຫ້ເຫັນວ່າ ຍອດຂາຍຂອງ
PC ໃນທົ່ວໂລກ ໄດ້ຫລຸດລົງຢ່າງຫລວງຫລາຍ ໃນໄຕມາດທີ 3 ນັ້ນຂະນະທີ່ຜູ້ຄົນພາກັນ
ຫັນໄປຊົມໃຊ້ ເຄື່ອງເທັກໂນໂລຈີທີ່ສະດວກແບບພົກພາ ໄປມາໄດ້ນັ້ນຫຼາຍຂຶ້ນ ຕົວຢ່າງ
ເຊ່ນ iPad, iPhone ຫລື Tablets ແລະ smartphones ເປັນຕົ້ນ.

ເບິ່ງວີດິໂອກ່ຽວກັບຄວາມນິຍົມກັນຊຶ້ໂທສະສັບ iPhone5 ທີ່ເລີ້ມນໍາອອກຂາຍ ໃນທ້າຍເດືອນກັນຍາຜ່ານມານີ້

XS
SM
MD
LG