ດຳລັດຂອງປະທານາທິບໍດີ Donald Trump ທີ່ສັ່ງໃຫ້ສ້າງກຳແພງ ຢູ່ຕາມຊາຍແດນ ສະຫະລັດຕິດກັບເມັກຊິໂກ ທີ່ຍາວ 3,200 ກິໂລແມັດນັ້ນ ຈະປະເຊີນໜ້າກັບບັນຫາດ້ານກົດໝາຍ ແລະ ອຸບປະສັກໂຕຈິງ. ຢູ່ທາງພາກໃຕ້ຂອງລັດ California ບ່ອນທີ່ສ່ວນນຶ່ງຂອງກຳແພງ ໄລຍະຍາວໆໄດ້ຖືກສ້າງຂຶ້ນມາແລ້ວນັ້ນ ປະຊາຊົນໃນເຂດທ້ອງຖິ່ນໃຫ້ຂໍ້ສັງເກດວ່າໄດ້ມີການປ່ຽນແປງ ຢ່າງເລິກຊຶ້ງໃນໄລຍະຫລາຍປີທີ່ຜ່ານມາ ແຕ່ກໍກ່າວວ່າ ການຂ້າມເຂົ້າມາຂອງຄົນເຂົ້າເມືອງທີ່ຜິດກົດໝາຍ ຍັງສືບຕໍ່ເປັນບັນຫາທາງດ້ານມະນຸດສະທຳທີ່ໜ້າຢ້ານກົວ. ນັກຂ່າວວີໂອເອ Ramon Taylor ມີລາຍງານກ່ຽວກັບເລື່ອງນີ້ ຊຶ່ງ ກິ່ງສະຫວັນ ຈະນຳມາສະເໜີທ່ານ ໃນອັນດັບຕໍ່ໄປ.
ຖ້າຫາກກຳແພງສູງລະຫວ່າງ 10 ຫາ 12 ແມັດມີການສ້າງຂຶ້ນຢູ່ຕາມຊາຍແດນສະຫະລັດ ຕິດກັບເມັກຊິໂກ ດັ່ງທີ່ປະທານາທິບໍດີີ Trump ໄດ້ຕັ້ງໃຈໄວ້ນັ້ນ ມັນຈະຍາວຢຽດແຕ່ອ່າວເມັກຊິໂກ ໄປຫາມະຫາສະໝຸດປາຊິຟິກ ເຖິງຈຸດສຸດທາງພາກຕາເວັນຕົກ.
ທ່ານ Enrique Morones ຜູ້ອຳນວຍການ ກຸ່ມປ້ອງກັນຊາຍແດນ Border Angels ກ່າວວ່າ “ເສົ້າໃຈ ທີ່ຜູ້ຄົນພະຍາຍາມຫາທາງຫລີກກຳແພງ ພາກັນລອຍນໍ້າຢູູ່່ໃນມະຫາສະໝຸດປາຊິຟິກ ຫລືບໍ່ກໍຂີ່ເຮືອຫາປານ້ອຍໆ ແລະເຂົາເຈົ້າພາກັນຈົມນໍ້າຕາຍ.”
ໃນນາມ ຜູ້ກໍ່ຕັ້ງ ກຸ່ມປົກປ້ອງຊາຍແດນ Border Angels ທ່ານ Enrique Morones ອຸທິດຄວາມພະຍາຍາມຂອງທ່ານ ເພື່ອຊ່ວຍເຫລືອຄົນເຂົ້າເມືອງຢູ່ຕາມເຂດຊາຍແດນທາງໃຕ້ ຮວມທັງ ພວກທີ່ໄດ້ຮັບຄວາມທຸກທໍລະມານຈາກການຫີວນໍ້າ ໃນທະເລຊາຍແຫ້ງແລ້ງ ທີ່ເປັນສາເຫດຂອງການຕາຍອັນດັບນຶ່ງ ລະຫວ່າງພວກຄົນເຂົ້າເມືອງຢູ່ທັງສອງຟາກຂອງເຂດຊາຍແດນ.
ທ່ານ Morones ກ່າວວ່າ “ກຳແພງ ທີ່ກີດກັ້ນພວກຄົນເຂົ້າເມືອງດັ່ງກ່າວນີ້ນັບແຕ່ປີ 1994 ມາ ໄດ້ພາກໃຫ້ມີຜູ້ເສຍຊີວິດໄປແລ້ວ ຫລາຍກວ່າ 11,000 ຄົນ ຫລາຍກວ່າ 11,000 ຄົນນັບແຕ່ປີ 1994 ເປັນຕົ້ນມາ. ຊາຍແດນສະຫະລັດທີ່ ຕິດກັບເມັກຊິໂກແມ່ນຍາວ 2,000 ໄມ ຫລື 3,145 ກິໂລແມັດ ແລະນຶ່ງສ່ວນ ສາມແມ່ນມີກຳແພງແລ້ວ. ບ່ອນໃດທີ່ມີເມືອງ ບ່ອນນັ້ນກໍມີກໍາແພງ.”
ປະທານາທິບໍດີ Trump ກ່າວວ່າ ກຳແພງເປັນທີ່ “ຕ້ອງການທີ່ສຸດ” ເພື່ອປ້ອງ ກັນຄົນ ເຂົ້າ ເມືອງຜິດກົດໝາຍຈາກອາເມຣິກາກາງ. ຢູ່ບ່ອນໃດທີ່ຍັງບໍ່ມີກຳແພງ ເທື່ອ ສ່ວນໃຫຍ່ກໍ ແມ່ນເປັນພູຜາທີ່ໄດ້ມີການສັງເກດການໂດຍເທັກໂນໂລຈີທາງອາກາດຢູ່ແລ້ວ.
ທ່ານ Ev Meade ຜູ້ອຳນວຍສະຖາບັນ Trans-Border ກ່າວວ່າ “ຖ້າຫາກຜູ້ຄົນຄິດວ່າ ຊາຍແດນເປີດຢູ່ທັງໝົດ ນັ້ນແມ່ນຄວາມຄິດທີ່ຜິດພາດ. ພວກເຮົາມີຢູ່ປະມານ 600 ໄມ ຫລື 1,000 ກິໂລແມັດ ທີ່ມີຮົ້ວຊາຍແດນຢູ່ແລ້ວ. ສ່ວນໃຫຍ່ ກໍເປັນຮົ້ວທີ່ແໜ້ນໜາ ແຕ່ ນອກຈາກນັ້ນ ກໍມີທຳມະຊາດເປັນເຄື່ອງແບ່ງປັນ. ມີຫລາຍໆບ່ອນທີ່ ສູງເຖິງ 11,000 ຟິດ ຫລື 3,350 ແມັດ ຢູ່ຕາມຊາຍແດນຄືດັ່ງຮ່ອມພູ Altar ຊຶ່ງມັກເປັນຈຸດ
ຂ້າມ ເຂົ້າມາ ໃນລັດ Arizona ແລະມັນເປັນອັນຕະລາຍທີ່ຈະໄປຂ້າມຢູ່ທີ່ນັ້ນ."
ຮ້ອຍໂທຕຳຫລວດເບ້ຍບຳນານຈາກກົມຕຳຫລວດນະຄອນ San Diego ທ່ານ Sean Murphy ກ່າວວ່າ ຄົນເຂົ້າເມືອງຜິດກົດໝາຍໄດ້ຫລຸດລົງ ຢູ່ທາງພາກໃຕ້ລັດ California ເນື່ອງຈາກມີກຳລັງຢູ່ນັ້ນ ແຕ່ພວກລັກຂ້າມໄດ້ຍ້າຍໄປທາງທິດຕາເວັນອອກ.
ທ່ານ Murphy ກ່າວວ່າ “ທັງໝົດໄດ້ຖືກຊຸກຍູ້ໃຫ້ໄປຂ້າມຢູ່ບ່ອນທີ່ແຫ້ງແລ້ງ ແລະພວກ ລັກລອບພາເຂົາເຈົ້າຂ້າມ ທີ່ຮ້ອງວ່າໝາຈິ້ງຈອກ ເຂົາເຈົ້າບໍ່ຄ່ອຍສົນໃຈ ເຂົາເຈົ້າ ບອກ ຜູ້ຄົນວ່າ ເຂົາເຈົ້າເປັນຄົນລັກພາຄົນຂ້າມ ເຮົາມາຮອດແລ້ວ ພວກເຈົ້າຢູ່ໃນສະຫະລັດ ໄປ ທາງນັ້ນ ແລະມີຄົນຢູ່ທີ່ນັ້ນພາກັນຫິວນໍ້າຕາຍ ແລະຕ້າຍຍ້ອນຄວາມຮ້ອນ ແລະ ອ່ອນເພຍ. ພວກນັ້ນ ເປັນຄົນທີ່ທ່ານຕ້ອງການຕາມຫາ.”
ກຳແພງ ຖ້າຫາກສຳເລັດເສັດສິ້ນໃນເຄິ່ງນຶ່ງຢູ່ຕາມເຂດຊາຍແດນທີ່ຍັງບໍ່ທັນມີກຳແພງ
ເທື່ອນັ້ນ ຈະເປັນຄວາມພະຍາຍາມທີ່ມີລາຄາສູງເຖິງ 25 ພັນລ້ານ ໂດລາ ອີງຕາມການ
ຄົ້ນຄວ້າທີ່ເກັບກຳໂດຍໜັງສືພິມ Washington Post. ການຄາດຄະເນຂອງປະທານາ
ທິບໍດີ Trump ໃນລະຫວ່າງການໂຄສະນາຫາສຽງນັ້ນ ແມ່ນມີລາຄາບໍ່ຮອດເຄິ່ງນຶ່ງຂອງຈຳນວນດັ່ງກ່າວ.