ລິ້ງ ສຳຫລັບເຂົ້າຫາ

ປະທານາທິບໍດີ Michel Suleiman ​ແຫ່ງ​ເລ​ບາ​ນອນ​ໄດ້​ເລື່ອນ​ການ​ການ​ໂອ້​ລົມ​ສົນທະນາ​ກັນ​ ​ກ່ຽວ​ກັບ​ການຈັດ​ຕັ້ງ​ຄະນະ​ລັດຖະບານ​ຊຸດໃໝ່ຂຶ້ນ​ນັ້ນ ອອກ​ໄປເປັນ​ເວລາ​ນຶ່ງ​ສັບປະດາ.

ທໍານຽບປະທານາທິບໍດີ​ເລ​ບາ​ນອນ​ປະກາດ​ເລື້ອງ​ນີ້​ໃຫ້​ຮູ້​ໃນ​ວັນ​ຈັນ​ມື້​ນີ້ ຊຶ່ງ​ມີການ​ຄາດ​ກັນ​ມາ​ກ່ອນ​ວ່າ ຈະ​ເປັນ​ມື້​ລິ​ເລີ້ມ​ການ​ໂອ້​ລົມ​ສົນທະ​ນາ​ກັນ​ເປັນ​ເວລາ 2 ມື້​ນັ້ນ.

ທ່ານ Suleiman ບໍ່​ໄດ້​ໃຫ້​ເຫດຜົນ​ທີ່​ເຈາະ​ຈົງ​ໃດໆ​ກ່າວ​ກັບ​ການ​ເລື່ອນ​ເວລາ ​ການ​ພົບ​ປະ​ຫາລື​ກັນ​ນີ້ ​ແຕ່​ກອງ​ປະຊຸມ​ສຸດ​ຍອດ​ນາໆ​ຊາດ ຈະ​ພົບ​ປະກັນ​ໃນ​ຕອນບ່າຍ​ມື້​ນີ້ ​ທີ່​ປະ​ເທດ​ຊີ​ເຣຍ ກ່ຽວ​ກັບ​ວິ​ກິດ​ການ​ດັ່ງກ່າວ.

ໃນ​ສັບປະດາ​ຜ່ານ​ມາ​ນີ້ ກຸ່ມ Hezbollah ​ແລະ​ພັນທະ​ມິດ​ ໄດ້​ພາກັນລາ​ອອກ​ຈາກ​ຄະນະ​ລັດຖະບານ​ທີ່​ໄດ້​ຮັບ​ການ​ສະໜັບສະໜຸນ​ຈາກ​ຝ່າຍ​ຕາ​ເວັນ​ຕົກ​ນັ້ນ ຍ້ອນຄວາມ​ເຄັ່ງ​ຕຶງ​ກ່ຽວ​ກັບ​ການ​ສືບສວນ​ສອບ​ສວນ​ຂອງ​ສານ​ສະຫະປະຊາ​ຊາດ​ ກ່ຽວ​ກັບ​ການ​ລອບ​ສັງຫານ ມື້​ລາງ​ນາຍົກລັດຖະມຸນຕີ Rafiq Hariri ​ບິດາ​ຂອງ​ນາຍົກລັດຖະມຸນຕີຮັກສາການ​ຊົ່ວຄາວ ທ່ານ Saad Hariri ນັ້ນ.

ຜູ້​ນໍາ​ຂອງ​ກຸ່ມ​ທະຫານ​ບ້ານ Hezbollah ນິກາຍ Shi’ite ທ່ານ Hassan Nasrallah ບໍ່​ຍອມ​ໃຫ້ການ​ສະໜັບສະໜຸນ​ຕໍ່​ລູກ​ຊາຍ​ຂອງ​ມື້​ລາງ​ຜູ້​ນໍາພາ​ປະ​ເທດ​ທີ່​ໄດ້​ຖືກ​ລອບ​ສັງຫານນັ້ນ ​ໂດຍ​ກ່າວ​ຫາ​ວ່າ ນາຍົກລັດຖະມຸນຕີ Hariri ບໍ່ຍອມປະຕິບັດ​ຕາມ​ຂໍ້ຕົກລົງທີ່​ວ່າຈະ​ປະຕິ​ເສດ​ການ​ສືບສວນ​ຂອງ​ສານ​ສະຫະ​ປະຊາ​ຊາດ​ນັ້ນ ຍ້ອນການ​ກົດ​ດັນ​ຢ່າງ​ໜັກ​ຈາກ​ສະຫະລັດ​ແລະ​ອິສຣາແອນ.

ມີ​ຫລາຍ​ຄົນ​ຄາດ​ວ່າ ສານ​ອາຍາ​ດັ່ງກ່າວ​ຈະ​ຟ້ອງ​ຮ້ອງ​ພວກ​ສະມາຊິກ​ບາງ​ຄົນ​ຂອງ​ກຸ່ມ Hezbollah ພາຍ​ໃນ​ບໍ່​ເທົ່າ​ໃດ​ມື້​ຂ້າງ​ໜ້າ​ນີ້.

XS
SM
MD
LG