ນາຍົກລັດຖະມົນຕີເລບານອນ ທ່ານ Tammam Salam ເອີ້ນ
ການບຸກລຸກໂຈມຕີເມືອງຊາຍແດນແຫ່ງນຶ່ງ ໃນວັນເສົາວານນີ້
ໂດຍພວກກະບົດຊີເຣຍ ວ່າເປັນການໂຈມຕີຕໍ່ເລບານອນແລະ
ປະຊາຊົນຂອງ ເລບານອນ.
ທ່ານ Salam ກ່າວວ່າ ລັດຖະບານຂອງທ່ານຈະບໍ່ໂຍະຍານໃຫ້
ເກີດຄວາມສັບສົນວຸ້ນວາຍ ແລະປ່ອຍໃຫ້ເລື້ອງຂະຫຍາຍໃຫຍ່
ອອກຈົນຄວບຄຸມບໍ່ໄດ້. ທ່ານກ່າວຕື່ມວ່າ ກອງທັບກຳລັງດຳເນີນ
ງານເພື່ອຟື້ນຟູຄວາມປອດໄພ ແລະສະຖຽນລະພາບຄືນມາໃໝ່
ໃນເມືອງ Arsal ບ່ອນທີ່ການຕໍ່ສູ້ກັນໄດ້ດຳເນີນມາຕະຫລອດຄືນ
ວານນີ້.
ເຈົ້າໜ້າທີ່ກອງທັບເລບານອນ ກ່າວໃນວັນອາທິດມື້ນີ້ວ່າ ທະຫານ 8 ຄົນເສຍຊີວິດໃນຄວາມຮຸນແຮງດັ່ງກ່າວ ພ້ອມທັງພົນລະເຮືອນອີກ 2 ຄົນ.
ທາງການເລບານອນ ກ່າວວ່າ ຄວາມຮຸນແຮງດັ່ງກ່າວ ໄດ້ເລີ້ມຂຶ້ນ ເວລາພວກເຈົ້າໜ້າ
ທີ່ຮັກສາຄວາມສະຫງົບ ຈັບສະມາຊິກຄົນນຶ່ງຂອງ ກຸ່ມກະບົດ ແນວໂຮມ Nusra ຢູ່ດ່ານກວດກາແຫ່ງນຶ່ງ.
ພວກມືປືນຝ່າຍກະບົດ ໄດ້ບຸກເຂົ້າໄປໃນເມືອງ Arsal ຮຽກຮ້ອງໃຫ້ປ່ອຍໂຕສະມາຊິກຄົນນັ້ນ. ພວກເຂົາໄດ້ຍຶດເອົາສະຖານີຕຳຫຼວດຂອງເມືອງ ແລະກັກພວກທະຫານຈຳນວນນຶ່ງເປັນໂຕປະກັນ ເປັນເວລາສັ້ນໆ.
ກະຊວງການຕ່າງປະເທດສະຫະລັດ ປະນາມຢ່າງແຂງແຮງຕໍ່ການໂຈມຕີໃນວັນເສົາວານນີ້ ແລະກ່າວວ່າ ຕົນສະໜັບສະໜຸນຄວາມໝັ້ນ ຄົງ ຕະຫລອດທັງອະທິປະໄຕ ແລະນະໂຍບາຍຂອງເລບານນອນ ໃນການບໍ່ເຂົ້າພົວພັນໃນບັນຫາຂັດແຍ້ງຕ່າງໆໃນພາກພື້ນນັ້ນ.
