ສານແຫ່ງນຶ່ງໃນປະເທດ ໄທ ໃນວັນຈັນມື້ນີ້ ໄດ້ຕັດສິນລົງໂທດຂັງຄຸກນຶ່ງໃນບັນດານັກເຄື່ອນໄຫວປະຊາທິປະໄຕ ທີ່ນຳໜ້າໝູ່ຂອງຣາຊະອານາຈັກນັ້ນ ເປັນເວລາສອງປີ ກ່ຽວກັບຂໍ້ກ່າວຫາດູໝິ່ນກະສັດ.
ມັນເປັນການຕັ້ງຂໍ້ກ່າວຫາຄັ້ງຫຼ້າສຸດຕໍ່ທະນາຍຄວາມສິດທິມະນຸດຄົນສຳຄັນ ທ່ານ ອານົນ ນຳພາ, ຜູ້ທີ່ຕອນນີ້ໄດ້ປະເຊີນກັບການຖືກຂັງຄຸກດົນກວ່າ 10 ປີ.
ປັດຈຸບັນນີ້ທ່ານຢູ່ໃນຄຸກຫຼັງຈາກທ່ານຖືກຕັດສິນໂທດ 4 ປີ ໃນເດືອນມັງກອນທີ່ຜ່ານມາ ກ່ຽວກັບ ຂໍ້ຄວາມສາມອັນທີ່ທ່ານໄດ້ຂຽນລົງໃນ ເຟສບຸກ ເມື່ອປີ 2021, ໂດຍເພີ່ມໃສ່ໂທດອີກ 4 ປີ ທີ່ທ່ານໄດ້ປະຕິບັດໄປແລ້ວສຳລັບຄຳຕັດສິນການໝິ່ນສະຖາບັນກະສັດ ກ່ອນໜ້ານີ້.
ບັນດານັກວິຈານເວົ້າວ່າ ລັດຖະບານໄດ້ໃຊ້ກົດໝາຍທີ່ເຂັ້ມງວດເພື່ອປິດປາກຜູ້ຄັດຄ້ານ, ລົງໂທດປະຊາຊົນຈຳນວນຫຼວງຫຼາຍພາຍໃຕ້ກົດໝາຍທີ່ເຂັ້ມງວດທີ່ປົກປ້ອງກະສັດ ມະຫາ ວະຈິຣາລົງກອນ ແລະ ຄອບຄົວຂອງເພິ່ນ.
ສານອາຍາໃນ ບາງກອກ ໄດ້ຕັດສິນລົງໂທດທ່ານ ອານົນ ເປັນເວລາສອງປີ ແລະ 20 ວັນ ສຳລັບການຮຽກຮ້ອງຂອງທ່ານຢູ່ການໂຮມຊຸມນຸມໃນແບບຮູບເງົາ ແຮຣີ ພັອດເຕີ ເມື່ອປີ 2021 ເພື່ອປ່ຽນແປງກົດໝາຍການດູໝິ່ນກະສັດຂອງ ໄທ.
ທ່ານຖືກພົບເຫັນວ່າ ມີຄວາມຜິດໃນສີ່ຂໍ້ຫາ ລວມທັງການລະເມີດກົດໝາຍການດູໝິ່ນສະຖາບັນກະສັດ, ຂັດຂືນດຳລັດວ່າດ້ວຍພາວະສຸກເສີນ, ແລະ ການໃຊ້ລຳໂພງດັງໂດຍບໍ່ໄດ້ຮັບອະນຸຍາດ, ອີງຕາມການກ່າວຂອງບັນດາທະນາຍຄວາມ ໄທ ເພື່ອສິດທິມະນຸດ.
ການປະທ້ວງສະໜັບສະໜູນປະຊາທິປະໄຕທີ່ນຳໜ້າໂດຍຊາວໜຸ່ມຂອງ ໄທ ໃນປີ 2020 ໄດ້ເຮັດໃຫ້ມີຫຼາຍສິບພັນຄົນອອກໄປຖະໜົນເພື່ອທຳການຮຽກຮ້ອງແບບບໍ່ເຄີຍມີມາກ່ອນ ເພື່ອປະຕິຮູບລະບອບຣາຊາທິປະໄຕ.
ໃນການລົງໂທດທ່ານ, ສານອາຍາຍັງໄດ້ປັບໄໝທ່ານດ້ວຍເງິນ 150 ບາດສຳລັບການໃຊ້ລຳໂພງສຽງດັງ.
ທ່ານ ອານົນ ແມ່ນນຶ່ງໃນບັນດານັກເຄື່ອນໄຫວ 150 ຄົນຜູ້ທີ່ຖືກຕັ້ງຂໍ້ຫາໃນບໍ່ເທົ່າໃດປີທີ່ຜ່ານມາ ພາຍໃຕ້ກົດໝາຍການດູໝິ່ນສະຖາບັນ, ເຊິ່ງມັກຈະຖືກອ້າງດັ່ງກັບມາດຕາ “112” ຕາມມາດຕາທີ່ສຳຄັນຂອງລະຫັດກົດໝາຍອາຍາ.
ຟໍຣັມສະແດງຄວາມຄິດເຫັນ