ບັນດາຜູ້ນຳຂອງປະເທດ ເທີກີ ແລະ ຊາອຸດີ ອາຣາເບຍ ໄດ້ປຶກສາຫາລືກັນ ກ່ຽວກັບ
ການຈັດຕັ້ງຄະນະເຮັດວຽກຮ່ວມ ເພື່ອຊອກຄົ້ນ ກ່ຽວກັບ ການຫາຍຕົວ ຂອງນັກຂ່າວ
ຊາອຸດີ ອາຣາເບຍ ທ້າວ ຈາມາລ ຄາຊອກກີ, ຜູ້ທີ່ໄດ້ຫາຍສາບສູນໃນວັນທີ 2 ຕຸລາທີ່
ຜ່ານມາ ຢູ່ສະຖານກົງສຸນ ຊາອຸດີ ອາຣາເບຍ ໃນນະຄອນ ອິສຕັນບູລ, ປະເທດ ເທີກີ.
ບັນດາອົງການຂ່າວລັດຖະບານຈາກທັງສອງປະເທດ ກ່າວວ່າ ປະທານາທິບໍດີ ເທີກີ
ທ່ານ ໄຕຢິບ ເອີດູອານ ແລະ ເຈົ້າຊີວິດ ຊາລມານ ຂອງຊາອຸ ໄດ້ລົມກັນ ກ່ຽວກັບ ກໍ
ລະນີດັ່ງກ່າວທາງໂທລະສັບເມື່ອຄືນວັນອາທິດວານນີ້.
ຊາອຸດີ ອາຣາເບຍ ແລະ ເທີກີ ໄດ້ໃຫ້ເຫດຜົນຕ່າງກັນ ກ່ຽວກັບ ສິ່ງທີ່ໄດ້ເກີດຂຶ້ນກັບ
ທ້າວ ຄາຊອກກີ ຫຼັງຈາກລາວໄດ້ເຂົ້າໄປໃນສະຖານກົງສຸນ.
ບັນດາເຈົ້າໜ້າທີ່ ເທີກີ ໄດ້ກ່າວວ່າ ເຂົາເຈົ້າເຊື່ອວ່າທ້າວ ຄາຊອກກີ ໄດ້ຖືກຄາດຕະກຳ,
ໃນຂະນະທີ່ ຊາອຸດີ ອາຣາເບຍ ເອີ້ນການກ່າວຫານັ້ນວ່າ “ບໍ່ມີມູນຖານ” ແລະ ເວົ້າວ່າ
ທ້າວ ຄາຊອກກີ ໄດ້ເດີນທາງອອກຈາກກົງສຸນດ້ວຍຕົນເອງ. ທັງສອງຝ່າຍແມ່ນບໍ່ໄດ້
ໃຫ້ຫຼັກຖານທີ່ກະຈ່າງແຈ້ງ ເພື່ອສະໜັບສະໜູນເຫດຜົນຂອງຕົນ ກ່ຽວກັບ ເຫດການ
ດັ່ງກ່າວ.
ຊາອຸດີ ອາຣາເບຍ ໄດ້ປະຕິເສດການຂົ່ມຂູ່ ກ່ຽວກັບ ການວາງມາດຕະການລົງໂທດ
ຕ່າງໆຈາກປະທານາທິບໍດີ ສະຫະລັດ ທ່ານ ດໍໂນລ ທຣຳ, ຜູ້ທີ່ໄດ້ບອກລາຍການ 60
ນາທີ ຂອງໂທລະພາບ CBS ວ່າມັນຈະມີ “ການລົງໂທດທີ່ຮຸນແຮງ” ຖ້າມີລົງຄວາມ
ເຫັນວ່າທ້າວ ຄາຊອກກີ ໄດ້ຖືກຂ້າຕາຍຢູ່ໃນສະຖານກົງສຸນ ຊາອຸດີ ອາຣາເບຍ.
ອົງການຂ່າວທາງການ ຊາອຸດີ ອາຣາເບຍ ໄດ້ເນັ້ນຄຳເວົ້າຂອງແຫຼ່ງຂ່າວລັດຖະບານ
ທີ່ບໍ່ປະສົງອອກຊື່ວ່າ “ຣາຊະອານາຈັກ ຂໍຢືນຢັນການປະຕິເສດທັງໝົດຂອງເຂົາເຈົ້າ
ກ່ຽວກັບ ການຂົ່ມຂູ່ ແລະ ຄວາມພະຍາຍາມໃດໆ ທີ່ຈະທຳລາຍເຂົາເຈົ້າ, ບໍ່ວ່າດ້ວຍ
ການຂົ່ມຂູ່ທີ່ຈະວາງມາດຕະການລົງໂທດທາງເສດຖະກິດ, ໃຊ້ການກົດດັນທາງການ
ເມືອງ, ຫຼື ການກ່າວຫາທີ່ຜິດຢ່າງຊ້ຳແລ້ວຊ້ຳອີກ.”
ຖະແຫຼງການດັ່ງກ່າວໄດ້ເວົ້າວ່າ ລັດຖະບານ ຊາອຸດີ ອາຣາເບຍ “ຍັງໄດ້ຢືນຢັນວ່າ ຖ້າ
ເຂົາເຈົ້າໄດ້ຮັບການດຳເນີນການໃດໆ, ເຂົາເຈົ້າກໍຈະຕອບໂຕ້ດ້ວຍການດຳເນີນການ
ທີ່ຮຸນແຮງກວ່າ,” ໂດຍເນັ້ນວ່າ ເສດຖະກິດຂອງເຂົາເຈົ້າ, ໃນຖານະເປັນຜູ້ສົ່ງອອກນ້ຳ
ມັນລາຍໃຫຍ່ທີ່ສຸດຂອງໂລກນັ້ນ, “ມີບົດບາດທີ່ມີອິດທິພົນ ແລະ ສຳຄັນໃນເສດຖະກິດ
ໂລກ.”
ທ້າວ ຄາຊອກກີ ໄດ້ອາໄສຢູ່ ສະຫະລັດ ແບບການເນລະເທດຕົນເອງ ແລະ ໄດ້ຕຳນິຕິ
ຕຽນອົງມົງກຸດ ໂມຮຳເມັດ ບິນ ຊາລມານ ໃນຫົວຂ່າວທີ່ຂຽນໃຫ້ໜັງສືພິມ ວໍຊິງຕັນ
ໂພສ.
ອ່ານຂ່າວນີ້ຕື່ມເປັນພາສາອັງກິດ
