ເຈົ້າໜ້າທີ່ຂັ້ນສູງຂອງລັດຖະບານ ທ່ານໂອບາມາໄດ້ພະຍາຍາມ
ຢ່າງຂຸ້ນຂ້ຽວໃນວັນພະຫັດມື້ນີ້ ໃນຄວາມພະຍາຍາມທີ່ຈະຊັກຊວນ
ໃຫ້ມີການເຫັນພ້ອມກັບຂໍ້ຕົກລົງກ່ຽວກັບໂຄງການນິວເຄລຍຂອງ
ອິຣ່ານ ຕໍ່ບັນດາສະມາຊິກສະພາ ທີ່ຍັງມີຄວາມສົງໄສຢູ່ນັ້ນ.
ທ່ານ John Kerry ລັດຖະມົນຕີກະຊວງການຕ່າງປະເທດ,
ລັດຖະມົນຕີກະຊວງພະລັງງານ ທ່ານ Ernes Moniz ລັດຖະມົນຕີກະຊວງການເງິນ ແລະທ່ານ Jack Lew ຈະໄປປາກົດຕົວໃນວັນພະຫັດມື້ນີ້ ຕໍ່ໜ້າຄະນະກຳມະການຄວາມສຳພັນກັບຕ່າງປະເທດ ຂອງສະພາສູງ.
ເຈົ້າໜ້າທີ່ຂັ້ນສູງເຫຼົ່ານີ້ ຊຶ່ງເປັນຜູ້ຮ່າງຄົນສຳຄັນຂອງຂໍ້ຕົກລົງນິວເຄລຍ ໄດ້ປຶກສາຫາລືຢ່າງເປັນການສ່ວນຕົວກັບບັນດາສະມາຊິກສະພາ ທີ່ນະຄອນຫຼວງວໍຊິງຕັນ ໃນວັນພຸດ ວານນີ້. ໃນການຖະແຫຼງຕໍ່ໜ້າຄະນະຄະນະກຳມະການນັ້ນ ທ່ານ Kerry ກ່າວວ່າ “ຂ້າພະເຈົ້າເຊື່ອວ່າໂຄງການນິວເຄລຍ ຈະເຮັດໃຫ້ໂລກປອດໄພຂຶ້ນ.”
ທ່ານ Kerry ກ່າວວ່າ “ພວກເຮົາເຊື່ອວ່າ ຂໍ້ຕົກລົງທີ່ວ່ານີ້ໄດ້ບັນລຸກັນໂດຍທີ່ປະເທດມະ ຫາອຳນາດຂອງໂລກ ໄດ້ຕົກລົງກັນວ່າ ຈະປ້ອງກັນບໍ່ໃຫ້ອິຣ່ານ ສ້າງອາວຸດນິວເຄລຍ.”
ສະພາສະຫະລັດ ມີເວລາຈົນເຖິງ ກາງເດືອນກັນຍາເພື່ອຈະໃຫ້ການອະນຸມັດ ຫຼືປະຕິເສດຂໍ້ຕົກລົງ ຊຶ່ງມັນຈະຍົກເລີກການລົງໂທດ ເພື່ອແລກປ່ຽນ ກັບການຫລຸດຜ່ອນໂຄງການນິວເຄລຍຂອງອີຣ່ານ.
ປະທານສະພາຕ່ຳ ທ່ານ John Boehner ປະຕິຍານວ່າ ພັກ Republicans ຊຶ່ງຄວບຄຸມທັງສອງສະພານັ້ນ ຈະດຳເນີນຄວາມພະຍາຍາມທຸກຢ່າງທີ່ຈະບໍ່ໃຫ້ຂໍ້ຕົກລົງນີ້ຜ່ານ.
ທ່ານ Boehner ໄດ້ກ່າວໃນວັນພຸດວານນີ້ວ່າ: “ ເພາະວ່າ ຂໍ້ຕົກລົງທີ່ບໍ່ດີດັ່ງກ່າວນີ້ ເປັນໄພຂົ່ມຂູ່ຕໍ່ຄວາມປອດໄພຂອງຊາວອາເມຣິກັນ. ພວກເຮົາຈະທຳທຸກວິທີທາງ ເພື່ອຍຸດຕິຂໍ້ຕົກລົງທີ່ວ່ານີ້.”
ຖ້າຂໍ້ຕົກລົງດັ່ງກ່າວຫາກຖືກປະຕິເສດແລ້ວ ປະທານາທິບໍດີ ໂອບາມາ ໄດ້ສັນຍາວ່າ ຈະຕ້ອງໃຊ້ສິດຍັບຢັ້ງຫຼືວີໂຕ້ການຕັດສິນໃຈນັ້ນ.
