ລັດຖະມົນຕີຕ່າງປະເທດຣັດເຊຍ ທ່ານ Sergei Lavrov ກ່າວ
ວ່າ ການເຈລະຈາກັນໃນວັນຈັນມື້ນີ້ ຢູ່ເບລາຣຸສນັ້ນ ຄວນຈະ
ສຸມໃສ່ການຢຸດຍິງ ໂດຍທັນທີ ແລະບໍ່ມີເງື່ອນໄຂໃດໆ ຢູ່ໃນ
ຢູເຄຣນ.
ກອງປະຊຸມຢູ່ນະຄອນຫລວງ Minsk ແມ່ນພົວພັນກັບຄະນະ
ຜູ້ແທນຈາກຣັດເຊຍ ຢູເຄຣນ ແລະອົງການເພື່ອຄວາມໝັ້ນຄົງ
ແລະການຮ່ວມມືໃນຢູໂຣບ ຫລື OSCE. ຍັງບໍ່ມີຄວາມຈະແຈ້ງ
ເທື່ອວ່າ ພວກແບ່ງແຍກດິນແດນນິຍົມຣັດເຊຍ ຈະເຂົ້າຮ່ວມໃນ
ກອງປະຊຸມ ຫຼືບໍ່.
ທ່ານ Lavrov ຍັງກ່າວອີກວ່າ ຈະບໍ່ມີການແຊກແຊງຂອງທະຫານຣັດເຊຍ ຢູ່ໃນປະເທດ
ເພື່ອນບ້ານ ຢູເຄຣນ.
ອົງການເນໂຕ ຄາດຄະເນວ່າ ມີທະຫານຣັດເຊຍ ຢ່າງນ້ອຍ 1,000 ຄົນ ຢູ່ໃນຢູເຄຣນ
ເວລານີ້ ແລະບັນດາຜູ້ນຳສະຫະພາບຢູໂຣບ ຕ້ອງການໃຫ້ຣັດເຊຍ ຖອນກອງກຳລັງ
ຂອງຕົນ ອອກຈາກຢູເຄຣນທັນທີ. ຣັດເຊຍ ໄດ້ປະຕິເສດຊ້ຳແລ້ວຊ້ຳອີກວ່າ ຕົນບໍ່ມີ
ທະຫານໃດໆຢູ່ໃນຢູເຄຣນ.
ການເຈລະຈາ ໃນນະຄອນຫລວງ Minsk ມີຂຶ້ນນຶ່ງມື້ ຫຼັງຈາກທີ່ ປະທານາທິບໍດີຣັດເຊຍ
ທ່ານ Vladimir Putin ໄດ້ຮຽກຮ້ອງໃຫ້ມີການເຈລະຈາກັນ ກ່ຽວກັບການຈັດຕັ້ງລັດນຶ່ງ
ຂຶ້ນ ຢູ່ທາງພາກຕາເວັນອອກສຽງໃຕ້ຂອງຢູເຄຣນ. ທ່ານກ່າວອອກທາງໂທລະພາບ
ຂອງລັດວ່າ ການເຄື່ອນໄຫວດັ່ງກ່າວແມ່ນຈຳເປັນ ເພື່ອ “ປົກປ້ອງຜົນປະໂຫຍດ ທີ່
ຖືກຕ້ອງຕາມກົດໝາຍ ຂອງປະຊາຊົນ” ຜູ້ທີ່ອາໄສຢູ່ໃນຂົງເຂດນັ້ນ.