ຮອງລັດຖະມົນຕີກະຊວງປ້ອງກັນປະເທດຢູເຄຣນ ທ່ານນາງ ຮານນາ ມາເລຍ (Hanna Maliar) ກ່າວໃນວັນຈັນນີ້ວ່າກອງກໍາລັງຂອງຢູເຄຣນ ໄດ້ຍຶດຄືນຖິ່ນຖານ 8 ແຫ່ງໃນຮອບສອງອາທິດຜ່ານມານີ້, ລວມທັງເມືອງ ປີອາຕີຄາດຕີ (Piatykhatky) ໃນເຂດຊາໂປຣິສເຊຍ (Zaporizhzhia).
ນັບຕັ້ງແຕ່ການການເລີ້ມປະຕິບັດການຕອບໂຕ້ຄືນຂອງຢູເຄຣນໂດຍມີເປົ້າໝາຍເພື່ອຍຶດເອົາເຂດທີ່ກອງກຳລັງຣັດເຊຍຍຶດຄອງ ກັບຄືນມາ, ທ່ານນາງ ມາເລຍ (Maliar) ກ່າວວ່າ ຢູເຄຣນ ໄດ້ປົດປ່ອຍດິນແດນ 113 ກິໂລຕາແມັດແລ້ວ.
ເຈົ້າໜ້າທີ່ຣັດເຊຍກ່າວໃນວັນຈັນມື້ນີ້ວ່າ ການລະດົມຍິງໃນເຂດ ແບລໂກຣອດ (Belgorod) ຂອງຣັດເຊຍ ທີ່ຕັ້ງຢູ່ໃກ້ກັບຊາຍແດນຢູເຄຣນ ໄດ້ເຮັດໃຫ້ພົນລະເຮືອນ 7 ຄົນບາດເຈັບ.
ຜູ້ປົກຄອງເຂດແບລໂກຣອດ (Belgorod) ທ່ານ ເວຍເຊສລັຟ ແກລດກອຟ (Vyacheslav Gladkov) ໄດ້ປະກາດຜ່ານ Telegram ວ່າການໂຈມຕີດັ່ງກ່າວໄດ້ຖືກຕຶກທີ່ຢູ່ອາໄສຫຼາຍຫລັງ.
ເຈົ້າໜ້າທີ່ຣັດເຊຍອີກຄົນນຶ່ງກ່າວວ່າ ການລະດົມຍິງຂອງຢູເຄຣນໄດ້ຍິງຖືກສອງບ້ານໃນເຂດ ເຄີສ (Kursk).
ກະຊວງປ້ອງກັນປະເທດຂອງອັງກິດກ່າວໃນການປະເມີນຄັ້ງຫຼ້າສຸດໃນວັນຈັນມື້ນີ້ວ່າ ຣັດເຊຍ “ມີຄວາມເປັນໄປໄດ້ສູງ” ທີ່ຈະສົ່ງກຳລັງທະຫານຫຼາຍພັນຄົນຄືນຈາກຝັ່ງຕາເວັນອອກຂອງແມ່ນ້ຳ ດນິໂປຣ (Dnipro) ເພື່ອເປັນກຳລັງເສີມໃຫ້ແກ່ກອງກຳລັງຣັດເຊຍ ໃນເຂດບັກມຸດ (Bakhmut) ແລະ ເຂດ ຊາໂປຣິສເຊຍ (Zaporizhzhia). ກະຊວງປ້ອງກັນປະເທດອັງກິດກ່າວວ່າ ການເຄື່ອນໄຫວດັ່ງກ່າວ "ອາດສະແດງໃຫ້ເຫັນເຖິງການຮັບຮູ້ຂອງ ຣັດເຊຍ ທີ່ວ່າ ການໂຈມຕີຄັ້ງໃຫຍ່ຂອງຢູເຄຣນທົ່ວ ດນິໂປຣ (Dnipro) ນັ້ນມີທ່າອ່ຽງໜ້ອຍລົງ ຫຼັງຈາກການແຕກຂອງເຂື່ອນ ຄາຄອຟກາ (Kakhovka) ແລະພາໃຫ້ເກີດໄພນ້ຳຖ້ວມ."