ຣັດເຊຍໄດ້ດຳເນີນງານ ໃນອັນທີ່ພວກເຈົ້າໜ້າທີ່ຢູເຄຣນຮ້ອງວ່າ “ເປັນການ ໂຈມຕີຂະໜາດໃຫຍ່” ໃນຕອນເຊົ້າວັນອັງຄານມື້ນີ້ທີ່ແນເປົ້າໝາຍໃສ່ນະຄອນ ກີຢິບ ດ້ວຍເຮືອບິນບໍ່ມີຄົນຂັບຫລາຍກວ່າ 20 ລຳ ທີ່ໜ່ວຍປ້ອງກັນໄພທາງອາກາດຂອງຢູເຄຣນ ໄດ້ທຳລາຍ.
ທ່ານເຊີຮີ ພັອບໂກ ຜູ້ບັນຊາການທະຫານໃນເຂດກີຢິບ ກ່າວຢຸູ່ໃນເຕເລກຣາມວ່າ ຫລັງຈາກຫລາຍມື້ຂອງການໂຈມຕີທາງອາກາດຂອງຣັດເຊຍ ທີ່ໄດ້ໃຊ້ເຮືອ ບິນບໍ່ມີຄົນຂັບ ແລະລູກສອນໄຟ ປະສົມປະສານກັນ ຣັດເຊຍໄດ້ກາງຕໍ່ແຕ່ເຮືອ ບິນບໍ່ມີຄົນຂັບ ຊາເຮັດ ທີ່ເຮັດໂດຍອີຣ່ານທັງໝົດ ໃນການເປັນຄັ້ງທີ 17 ຕໍ່ນະຄອນຫລວງຢູເຄຣນ ໃນເດືອນພຶດສະພາ.
ຢູເຄຣນ ໄດ້ໃຫ້ຂໍ້ສັງເກດຊໍ້າແລ້ວຊໍ້າອີກຂອງການຍິງເຮືອບິນບໍ່ມີຄົນຂັບຕົກທັງໝົດ ທີ່ຣັດເຊຍໄດ້ສົ່ງມາໂຈມຕີກິຢິບ ແຕ່ວ່າຊິ້ນສ່ວນຂອງລູກສອນໄຟມັກຕົກ ລົງມາໃສ່ຕຶກອາຄານຢູ່ທາງພາກພື້ນດິນ.
ທ່ານພັອບໂກ ກ່າວວ່າສິ້ນສ່ວນຈາກການໂຈມຕີຂອງວັນອັງຄານ ໄດ້ຕຳໃສ່ຕຶກອາພາດເມັນ ແລະເຮັດໃຫ້ເກີດໄຟໄໝ້ ມີຜູ້ເສຍຊີວິດຢ່າງໜ້ອຍນຶ່ງຄົນ ແລະໄດ້ຮັບບາດເຈັບອີກສາມຄົນ. ຍິ່ງໄປກວ່ານັ້ນ ຊິ້ນສ່ວນຍັງໄດ້ທຳລາຍລົດ ແລະເຮືອນນຶ່ງຫລັງ ທີ່ຢູ່ໃນອີກສ່ວນຂອງເມືອງ ທີ່ທ່ານໄດ້ກ່າວເພີ້ມ.
ກຳລັງຣັດເຊຍ ໄດ້ແນເປົ້າໝາຍໃສ່ກີຢິບ ໃນການລະດົມຍິງໂຈມຕີ ຢ່າງໜັກ ໜ່ວງ ກ່ອນໜ້າການຄາດໝາຍໂຈມຕີຂອງຢູເຄຣນທີ່ບັນດາຜູ້ນຳກິຢິບໄດ້ກ່າວ ເພື່ອຈະຢຶດເອົາດິນແດນ ທີ່ຣັດເຊຍໄດ້ຍຶດເອົາໄປນັ້ນ ຄືນມາ ຢູ່ທາງພາກຕາ ເວັນອອກຂອງຢູເຄຣນ ນັບແຕ່ໄດ້ເລີ້ມການຮຸກຮານຢ່າງເຕັມທີ່ໃນເດືອນກຸມພາ ປີ 2022.
“ການໂຈມຕີກໍ່ການຮ້າຍໃນແຕ່ລະເທື່ອໄດ້ເຮັດໃຫ້ພວກເຮົາແລະໂລກເຫັນແຈ້ງ ວ່າເປັນການສະຫລຸບແບບງ່າຍໆ: ຣັດເຊຍຕ້ອງການຕິດຕາມເສັ້ນທາງຜີມານໄປສູ່ການສິ້ນສຸດ ນັ້ນຄື ການປະລາໄຊ ເພາະວ່າຜີມານບໍ່ສາມາດໄດ້ຮັບການສິ້ນສຸດໃດໆ ແຕ່ປະລາໄຊ” ປະທານາທິບໍດີຢູເຄຣນ ທ່ານໂວໂລດີເມຍ ເຊເລນສ໌ກີ ໄດ້ກ່າວຢູ່ໃນຖະແຫລງການໃນຕອນແລງວັນຈັນວານນີ້. “ໂລກຕ້ອງເຫັນ ພວກທີ່ໂຫດຮ້າຍກຳລັງສູນເສຍ.”
ໃນອີກດ້ານນຶ່ງ ເຈົ້າຄອງນະຄອນຫລວງຮັດເຊຍ ໄດ້ກ່າວວ່າ ເຮືອບິນບໍ່ມີຄົນຂັບ ໄດ້ສ້າງຄວາມເສຍຫາຍເລັກນ້ອຍ ລະຫວ່າງການໂຈມຕີໃນວັນອັງຄານມື້ນີ້ໃສ່ມົສກູ.
ເຈົ້າຄອງນະຄອນຫຼວງ ທ່ານເຊີເກ ໂຊບີຢານິນ ໄດ້ກ່າວຢູ່ໃນຖະແຫລງການວ່າ ການໂຈມຕີໄດ້ເກີດຂຶ້ນເວລາເຊົ້າມຶືດ ແລະປະຊາຊົນໄດ້ຍົກຍ້າຍອອກຈາກສອງຕຶກອາຄານ.