ໃນຫວ່າງໝໍ່ໆມານີ້ ທາງ VOA ໄດ້ສະເໜີບົດສໍາພາດກັບຄະນະບໍລິຫານຂອງອົງການ
ສໍາພັນທະມິດລາວ-ອາເມຣິກັນ ຫຼື Laotian American National Alliance (LANA)
ໃນລະດັບຊາດທີ່ມີຈຸດປະສົງໃນການເປັນກະບອກສຽງ, ເປັນສູນຮວມ ແລະຕາງໜ້າໃຫ້
ອົງການນ້ອຍໃຫຍ່ທັງຫຼາຍໃນສະຫະລັດ ເພື່ອນໍາສະເໜີ ບັນຫາຕ່າງໆຂອງປະຊາຄົມ
ລາວຕໍ່ທາງລັດຖະບານ, ເທດສະບານ, ທ້ອງຖິ່ນແລະໃນລະດັບຊາດ ແລະທາງອົງການ
ດັ່ງກ່າວກໍໄດ້ຈັດກອງປະຊຸມຫຼວງຂຶ້ນ ໃນວັນທີ 5-6 ສິງຫາ ຜ່ານມານີ້ ຊຶ່ງຕາງໜ້າໃຫ້ແກ່
ເຈົ້າພາບທ້ອງຖິ່ນ ໃນຂົງເຂດ ວໍຊິງຕັນດີຊີ ກໍແມ່ນ ຍາເອື້ອຍ ບຸນເຮ່ງ ອິນເວີຊິນ ທີ່ໄດ້
ເປັນຜູ້ມາປະຖະກະຖານໍາ ແລະກໍໄດ້ໃຫ້ VOA ສໍາພາດ.
ກອງປະຊຸມຂອງອົງການສໍາພັນທະມິດລາວ-ອາເມຣິກັນນີ້ ໄດ້ຈັດຂຶ້ນເປັນ 2 ມື້ ໂດຍມີການໃຫ້ຂໍ້ມູນ, ປະຖະກະຖາ ຈາກນັກວິຊາການຈາກຫຼາຍໜ່ວຍງານ, ຫຼາຍອົງການ ຮວມທັງການສຶກສາ, ການແພດ, ຂໍ້ມູນຂ່າວສານສໍາຄັນຕ່າງໆ.
ກໍໄດ້ມີທັງແພດໜຸ່ມ Dr. Alex Vilaythong, ເອື້ອຍ ຫົງວິໄລ ວັດທະນາ ອາສາສະມັກ ແລະ ວົງສະຫວັນ ອິນສີຊຽງໃໝ່ ຜູ້ທີ່ເດີນທາງມາຈາກລັດ Rhode Island ເພື່ອເຂົ້າຮ່ວມໃນງານດັ່ງກ່າວ ຊຶ່ງຕ່າງກໍໄດ້ສະແດງຄວາມ ຄິດເຫັນຕ່າງໆນາໆ.
ກອະປະຊຸມຫຼວງຂອງອົງການສໍາພັນທະມິດລາວແມ່ນໄດ້ຜ່ານພົ້ນແລະສໍາເລັດລົງດ້ວຍດີ ໂດຍທີ່ຜູ້ປະກອບສ່ວນທັງຫຼາຍ ກໍໄດ້ຮຽນຮູ້, ສຶກສາ ຊຶ່ງກັນແລະກັນ ຈາກບັນດານັກວິຊາການຕ່າງໆທີ່ມາໃຫ້ຂໍ້ມູນ, ໃຫ້ ຄວາມກະຈ່າງແຈ້ງ ເຖິງຄວາມສໍາຄັນຂອງການເອົາບາດກ້າວທີ່ດີ ກ່ວາໃນການດໍາລົງຊີວິດ ບໍ່ວ່າ ຈະເປັນການສຶກສາດ້ານສຸຂະ ພາບ, ພາລານາໄມ. ໄດ້ມີສ່ວນບຸກຄົນແລະຕົວແທນຈາກຫຼາຍໆປະຊາຄົມ ທັງໃນທ້ອງຖິ່ນແລະຕ່າງລັດເຂົ້າມາຮ່ວມ.
ຈຸດປະສົງທີ່ເປັນຫຼັກຢືນ ກໍຄືການແລກປ່ຽນແລະຮຽນຮູ້ຈາກປະສົບການຂອງກັນ ແລະກັນ ເພື່ອຈະໄດ້ສົ່ງເສີມປັບຕົວ, ປັບປຸງແລະພັດທະນາ ໃຫ້ປະຊາຄົມລາວ-ອາເມຣິກັນອື່ນໆໃນສະຫະລັດ. ສ່ວນງານລາຕີສະໂມສອນແລະ ລື້ນເລີງຕ່າງໆນັ້ນ ກໍໄດ້ຮັບການປະກອບສ່ວນຈາກສະມາຄົມ ສະຕີລາວ-ອາເມຣິກັນ ແລະ Lao Swan Dance Troupe ໃນຂົງເຂດວໍຊິງຕັນດີຊີ ແລະຫຼາຍໆສະມາຄົມໃນຂົງເຂດທ້ອງຖິ່ນ ແລະກໍຖືວ່າໄດ້ທັງຄວາມຮູ້ ຄວາມມ່ວນຊື່ນ ແລະຄວາມຈົບງາມ ທັງແຂກແລະເຈົ້າພາບ.
ທາງລາຍການຊີວິດຊາວລາວໃນຕ່າງແດນ ຈະນໍາເລື່ອງລາວທີ່ເປັນສາລະແລະໃຫ້ຄວາມ
ບັນເທີງ ມາສະເໜີທ່ານອີກ ໃນໂອກາດຕໍ່ໄປ.
