ເຈົ້າໜ້າທີ່ຂັ້ນສູງໃນກະຊວງສາທາລະນະສຸກຂອງລາວໄດ້ໃຫ້ ການຢືນຢັນວ່າ ກະຊວງສາທາລະນະສຸກໄດ້ປະກາດແຈ້ງ ການເຕືອນ ໄປເຖິງປະຊາຊົນໃນທົ່ວປະເທດເມື່ອບໍ່ນານມາ ນີ້ ເພື່ອໃຫ້ເພີ່ມຄວາມລະມັດລະວັງເປັນພິເສດຂື້ນໃນການ ຊື້ຫາຊີ້ນໝູສຳລັບນໍາມາບໍລິໂພກພາຍໃນຄົວເຮືອນ ດ້ວຍ ການທີ່ຈະຕ້ອງເລືອກຊື້ຊີ້ນໝູ ສະເພາະຈາກຮ້ານຄ້າທີ່ໄດ້ ຜ່ານການຮັບຮອງ ຈາກກົມອະນາໄມ ແລະກົມປະສຸສັດ ຂອງທາງການລາວຢ່າງຖືກຕ້ອງແລ້ວເທົ່ານັ້ນ.
ໂດຍປະກາດແຈ້ງການເຕືອນດັ່ງກ່າວຖືເປັນມາດຕະການສ່ວນນຶ່ງໃນການປ້ອງກັນການ ຕິດຕໍ່ເຊື້ອໄວຣັສຈາກໝູທີ່ເປັນໂຣກໝູຫູກໍ່າ ຫລືໂຣກ PRRS ທີ່ກໍາລັງແຜ່ລະບາດ ຢູ່ ໃນເຂດເມືອງສີສັດຕະນາກ ເມືອງສີໂຄດຕະບອງ ແລະເມືອງຫາດຊາຍຟອງ ຈົນຕ້ອງ ປະກາດໃຫ້ທັງສາມເມືອງດັ່ງກ່າວຂອງນະຄອນວຽງຈັນ ເປັນເຂດ ຄວບຄຸມການແຜ່ລະ ບາດ ໍຂອງເຊື້ອໂຣກດັ່ງກ່າວຢູ່ໃນເວລານີ້.
ແຕ່ຢ່າງໃດກໍຕາມ ເຈົ້າໜ້າທີ່ລາວກໍຍອມຮັບວ່າການເລືອກຊື້ຊີ້ນໝູຈາກຮ້ານຄ້າທີ່ໄດ້ ຜ່ານການຮັບຮອງຈາກໜ່ວຍງານຂອງລັດຖະບານລາວດັ່ງກ່າວນີ້ ກໍຍັງຄົງບໍ່ສາມາດທີ່ ຈະຮັບປະກັນໄດ້ວ່າຈະບໍ່ມີການໄດ້ຮັບເຊື້ອ PRRS ເກີດຂື້ນ ເນຶ່ອງຈາກວ່າຜູ້ບໍລິໂພກ ຊີ້ນໝູນັ້ນຍັງຈະຕ້ອງບໍລິໂພກສະເພາະຊີ້ມໝູທີ່ໄດ້ປຸງໃຫ້ສຸກແລ້ວເທົ່ານັ້ນ.
ນອກຈາກນີ້ ໃນຂະນະທີ່ໄດ້ເລືອກຊື້ຊີ້ນໝູຈາກຮ້ານຄ້າທີ່ຜ່ານການຮັບຮອງຈາກໜ່ວຍງານ ທີ່ຮັບຜິດຊອບຂອງ ທາງການລາວນັ້ນກໍຍັງຈະຕ້ອງເລືອກຊື້ສະເພາະຊີ້ນໝູທີ່ມີສີຊົມພູປົນສີແດງ ຊີ້ນມີຜິວມັນມີຄວາມນຸ້ມແລະແໜ້ນ ບໍ່ມີກິ່ນເໝັນ ບໍ່ມີເມືອກ ບໍ່ມີການຊໍ້າເລືອດ ບໍ່ມີສີຂຽວ ບໍ່ແຫ້ງ ໄຂມັນໝູຈະຕ້ອງມີສີຂາວຂຸ່ນ ແລະຊີ້ນ ໝູຈະຕ້ອງມີສີທີ່ບໍ່ແດງເກີນໄປ ສ່ວນຊີ້ນໝູແຊ່ແຂງນັ້ນ ກໍຈະຕ້ອງເລືອກຊື້ຊີ້ນໝູທີ່ຜ່ານການແຊ່ແຂງມາແລ້ວບໍ່ເກີນສາມມື້ເທົ່ານັ້ນອີກດ້ວຍ ຈຶ່ງຈະສາມາດຮັບປະກັນໄດ້ຢ່າງຄັກແນ່ວ່າຜູ້ບໍລິໂພກຈະປອດໄພຈາກການໄດ້ ຮັບເຊື້ອໄວຣັສ PRRS ຈາກຊີ້ນໝູດັ່ງກ່າວ.
ທາງດ້ານທ່ານລາດຊະນິວົງ ອໍາມະລາທິທາດາ ຫົວໜ້າຜະ ແນກກະສິກໍາ-ປ່າໄມ້ ນະຄອນວຽງຈັນ ໄດ້ຖະແຫລງຍອມຮັບວ່າ ພະຍາດໝູຫູກໍ່າໄດ້ເລີ່ມເກີດການແຜ່ລະບາດ ນັບຈາກກາງເດືອນມິຖຸນາເປັນຕົ້ນມາ ໂດຍເຮັດໃຫ້ມີໝູທີ່ຕາຍໄປແລ້ວຫລາຍກວ່າ 200 ຕົວ ແລະຍັງມີ ໝູອີກຫລາຍກວ່າ 4,00 ຕົວທີ່ຕິດເຊື້ອໂຣກທີ່ຈະຕ້ອງໄດ້ຮັບການປິ່ນປົວ ແລະຈະຕ້ອງແຍກອອກຈາກໝູຕົວ ອື່ນໆຢ່າງຮີບດ່ວນທີ່ສຸດເພື່ອປ້ອງກັນບໍ່ໃຫ້ມີການແຜ່ລະບາດເພີ່ມຂື້ນອີກ.
ຍິ່ງໄປກວ່ານັ້ນ ເນ່ື່ອງຈາກວ່າໃນທົ່ວເຂດນະຄອນວຽງຈັນມີຟາມລ້ຽງໝູຢູ່ຫລາຍກວ່າ 200 ແຫ່ງ ແລະມີໝູ ລວມກັນຫລາຍກວ່າ 66,000 ຕົວ ຈຶ່ງເຮັດໃຫ້ທາງການລາວຕ້ອງປະກາດກຳໜົດໃຫ້ເມືອງໄຊທານີ ເມືອງໄຊເສດຖາ ເມືອງຈັນທະບຸລີ ເມືອງນາຊາຍທອງ ເມືອງປາກງຶ່ມ ແລະເມືອງສັງທອງ ເປັນເຂດຕ້ອງເຝົ້າລະວັງຢ່າງໄກ້ຊິດດ້ວຍ ດັ່ງທີ່ທ່ານ ລາດຊະນີວົງ ໄດ້ຖະແຫລງຊີ້ແຈງວ່າ:
“ສາມເມືອງທີ່ເປັນເຂດລະບາດ ພວກເຮົາກໍໄດ້ກຳໜົດແລະແຈ້ງການໄປຍັງອໍາ ນາດການປົກຄອງວ່າ ໃຫ້ມີເຂດລະບາດແລະເຂດເຝົ້າລະວັງ ສ່ວນຈຸດກວດການັ້ນ ກໍຈະຕ້ອງມີການກວດກາຢູ່ຕາມດ່ານຕ່າງໆ ນອກນັ້ນກໍແມ່ນຢູ່ຕາມໂຮງຂ້າສັດແລະບ່ອນປຸງແຕ່ງອາຫານສັດ ສ່ວນຢູ່ທີຟາມທີ່ເກີດການລະບາດນັ້ນ ກໍໄດ້ມີການແນະນຳໃຫ້ແຍກໝູທີ່ເຈັບເປັນອອກຕ່າງຫາກ ໝູທີ່ຕາຍແລ້ວກໍຕ້ອງທຳລາຍດ້ວຍການເອົາໄປຝັງ ສ່ວນໝູທີ່ເຈັບເປັນ ກໍໃຫ້ປິ່ນປົວດ້ວຍຢາຕ້ານເຊື້ອໂຣກດັ່ງກ່າວ.”
ສ່ວນກ່ຽວກັບອາການຂອງໝູທີ່ເປັນໂຣກຫູກໍ່ານັ້ນ ຈະມີການສະແດງອາການສອງລັກສະນະ ດ້ວຍກັນ ຄື ນຶ່ງ ມີອາການເປັນຫວັດ ຂີ້ມູກຍ້ອຍ ຕົວຈ່ອຍ ແລະມີອາການປອດບວມຢ່າງຮຸນແຮງ ສອງ ໝູອອກລູກກ່ອນກຳໜົດ ຫລືແທ້ງລູກ ຫລືລູກຕາຍໃນທ້ອງ ບໍ່ມີນໍ້ານົມໃຫ້ລູກກິນ ແລະຖ້າຫາກເປັນໝູສີຂາວ ກໍຈະສັງເກດເຫັນໃບຫູກໍ່າ ຫລືດໍາໄດ້ຢ່າງແຈ່ມແຈ້ງ.
