ເຈົ້າໜ້າທີ່ຂັ້ນສູງໃນກະຊວງກະສິກໍາ-ປ່າໄມ້ຂອງລາວ ຍອມຮັບວ່າ ສັດນໍ້າແລະສັດປ່າທີ່ຫາຍາກຫລາຍຊະນິດຢູ່ ໃນລາວ ໄດ້ລົດຈໍານວນລົງຢ່າງໄວວາແລະມີຫລາຍຊະນິດ ທີ່ກໍາລັງປະເຊີນກັບຄວາມສ່ຽງຢ່າງສູງ ຈົນໄກ້ທີ່ຈະສູນພັນ ໃນໝໍ່ໆນີ້ ຖ້າຫາກວ່າບໍ່ໄດ້ຮັບການປົກປັກຮັກສາ ແລະ ຄວາມຮ່ວມມືຈາກທຸກພາກສ່ວນຢ່າງຈິງຈັງ. ທັງນີ້ເຖິງແມ່ນ ວ່າ ສັດປ່າແລະສັດນໍ້າທີ່ຫາຍາກຢູ່ໃນລາວຈະເປັນປັດໄຈ ສໍາຄັນ ທີ່ຊ່ວຍດຶງດູດໃຫ້ນັກທ່ອງທ່ຽວຊາວຕ່າງຊາດເດີນ ທາງເຂົ້າລາວຫລາຍຂຶ້ນນັບມື້ກໍຕາມ ຫາກແຕ່ວ່າໃນຂະນະ ດຽວກັນ ການທີ່ສັດປ່າແລະສັດນໍ້າທີ່ຫາຍາກໃນລາວ ກໍຍັງເປັນທີ່ຕ້ອງການຂອງບັນດານັກຄ້າສັດປ່າຜິດກົດໝາຍຫລາຍຂຶ້ນດ້ວຍເຊັ່ນກັນນັ້ນ ຊຶ່ງກໍ ເປັນຜົນທີ່ສືບເນຶ່ອງມາຈາກການທີ່ ຍັງມີກຸ່ມຄົນທີ່ນິຍົມການບໍລິໂພກຊີ້ນສັດປ່າຢູ່ໃນຫລາຍ ປະເທດ ຈຶ່ງເຮັດໃຫ້ມີການລັກລອບລ່າສັດປ່າເພື່ອການຄ້າເຖື່ອນດັ່ງກ່າວເກີດຂຶ້ນໃນລາວຢູ່ເລື້ອຍມາ.
ເຂດທີ່ຕົກເປັນເປົ້າໝາຍຂອງບັນດານັກລ່າສັດປ່າເພື່ອການຄ້າເຖື່ອນດ້ວຍການລັກລອບຂົນ ສົ່ງສັດປ່າອອກຈາກລາວໄປຍັງຕ່າງປະເທດມາໂດຍຕະຫລອດນັ້ນ ກໍຄືເຂດປ່າສະຫງວນ ແຫ່ງຊາດທີ່ມີຢູ່ເຖິງ 20 ແຫ່ງຢູ່ໃນທົ່ວປະເທດລາວ ແລະເຂດນຶ່ງທີ່ຖືວ່າໄດ້ຕົກເປັນເປົ້າ ໝາຍ ຂອງບັນດານັກລ່າສັດປ່າມາຢ່າງຕໍ່ເນຶ່ອງໃນຕະຫລອດໄລຍະກວ່າ 20 ປີມານີ້ ກໍຄືເຂດປ່າສະຫງວນແຫ່ງຊາດນາກາຍ ຢູ່ໃນແຂວງຄໍາມ່ວນ ດັ່ງທີ່ເຈົ້າໜ້າທີ່ຂັ້ນສູງໃນກະຊວງກະສິກໍາ-ປ່າໄມ້ລາວໄດ້ໃຫ້ການຊີ້ແຈງເຖິງສະພາບການທີ່ເກີດຂຶ້ນໃນເຂດດັ່ງກ່າວນີ້ໃນຕອນນຶ່ງວ່າ:
“ແຕ່ລະເຂດ ພວກເຮົາໄດ້ສ້າງຕັ້ງກໍາລັງປະຊາຊົນ ແລະກໍໄດ້ມີການເຄຶ່ອນໄຫວ ກວດກາລາດຕະເວນຢູ່ເປັນປະຈໍາໃນແຕ່ລະເດືອນ ເດືອນນຶ່ງກໍແມ່ນສິບມື້ທີ່ໄດ້ກວດກາຕາມຂອບເຂດຊາຍແດນໃນປ່າສະຫງວນ ແລ້ວຈຶ່ງໄປພົບເຫັນວ່າມີການ ວາງກັບດັກສັດປ່າໄວ້ເປັນຈໍານວນຫລວງຫລາຍ ດັ່ງນັ້ນ ຈຶ່ງເຮັດໃຫ້ພວກເຮົາຕີ ລາຄາໄດ້ວ່າ ຢູ່ຕາມຊາຍແດນນີ້ ຍັງມີການເຄຶ່ອນໄຫວໃນການຈັບແລະລ່າສັດປ່າ ບໍ່ໜ້ອຍເລີຍ ຕົວຢ່າງຢູ່ໃນເຂດປ່າສະຫງວນນາກາຍ-ນໍ້າເທີນນັ້ນ ໃນແຕ່ລະເດືອນ ພວກເຮົາໄດ້ໄປກວດກາແລະເກັບກູ້ເບັດແຮ້ວແລະເບັດທີ່ເຮັດໃຊ້ໃນການດັກສັດ ປ່າຫັ້ນ ໄດ້ພັນກວ່າກໍລະນີ”
ການຕັດໄມ້ທໍາລາຍປ່າທັງທີ່ຖືກຕ້ອງຕາມກົດໝາຍ ແລະທີ່ໄດ້ລັກລອບຕັດເພື່ອການຄ້າໄມ້ ເຖື່ອນທີ່ເພີ່ມຫລາຍຂຶ້ນນັບມື້ ໂດຍສະເພາະແມ່ນຢູ່ຕາມຊາຍແດນຕິດຕໍ່ລະຫວ່າງລາວກັບ ປະເທດເພື່ອນບ້ານ ເຊັ່ນ ຫວຽດນາມ ຈີນ ແລະໄທນັ້ນ ກໍຍັງສົ່ງຜົນກະທົບເຮັດໃຫ້ແຫລ່ງ ອາຫານແລະຖິ່ນຢູ່ຂອງສັດປ່າຕ້ອງຖືກທໍາລາຍໄປຢ່າງກວ້າງຂວາງອີກດ້ວຍ. ໂດຍຈາກການສໍາຫລວດແລະເກັບກໍາຂໍ້ມູນຢູ່ໃນເຂດປ່າສະຫງວນແຫ່ງຊາດນໍ້າແອດ-ພູເລີຍໃນແຂວງຫົວ ພັນ ທີ່ດໍາເນີນການໂດຍອົງການອະນຸລັກສັດປ່າສາກົນນັບຕັ້ງແຕ່ປີ 2006 ເປັນຕົ້ນມານັ້ນ ກໍພົບວ່າ ສັດປ່າທີ່ກໍາລັງປະເຊີນກັບການສ່ຽງຢ່າງສູງທີ່ຈະສູນພັນໃນໝໍ່ໆນີ້ ກໍຄືເສືອໂຄ່ງ ເພາະຈາກການເກັບກໍາຂໍ້ມູນໃນເຂດປ່າສະຫງວນແຫ່ງຊາດນໍ້າແອດ-ພູເລີຍໃນໄລຍະ 5 ປີ ມານີ້ພົບວ່າຍັງຄົງມີເສືອໂຄ່ງເຫລືອຢູ່ບໍ່ເກີນ 10 ຕົວເທົ່ານັ້ນ.
ສະຖານະການດຽວກັນນີ້ກໍຍັງໄດ້ສົ່ງຜົນກະທົບຕໍ່ປະຊາກອນຊ້າງຢູ່ໃນລາວເຊັ່ນດຽວກັນ ໂດຍທາງກະຊວງກະສິກໍາ-ປ່າໄມ້ຂອງລາວເອງເຊຶ່ອວ່າ ໃນປັດຈຸບັນນີ້ຍັງຄົງເຫລືອປະຊາ ກອນຊ້າງ ທີ່ເປັນຊ້າງບ້ານແລະຊ້າງປ່າຢູ່ໃນລາວ ບໍ່ຮອດ 1,000 ຕົວດ້ວຍຊໍ້າ.
ດ້ວຍສະພາບການດັ່ງກ່າວນີ້ ຈຶ່ງເຮັດໃຫ້ທາງການສະຫະ ລັດ ໂດຍທ່ານ Rivic Huso ເອກອັກຄະລັດຖະທູດສະຫະລັດປະຈໍາລາວ ແລະອົງການສາກົນເພື່ອການອະນຸລັກຊັບພະຍາກອນທໍາມະຊາດແລະສັດປ່າໃນລາວ ໄດ້ຮ່ວມກັນໃຫ້ຄວາມຊ່ວຍເຫລືອແກ່ລັດຖະບານລາວ ເພື່ອດໍາເນີນມາດຕະການປາບປາມການລັກລອບ ຂົນສ່ົງແລະຄ້າສັດປ່າຜິດກົດໝາຍໃນລາວໃຫ້ມີປະສິດທິພາບຫລາຍຂຶ້ນເມື່ອບໍ່ນານມານີ້. ໂດຍທ່ານ Ravic Huso ກໍໄດ້ຖະແຫລງເນັ້ນຍໍ້າໃນການໃຫ້ການຊ່ວຍເຫລືອແກ່ລາວໃນຄັ້ງນັ້ນວ່າ ລັດຖະບານສະຫະລັດໄດ້ຫລິ່ງເຫັນເຖິງຄວາມສໍາຄັນທີ່ສັດປ່າມີຕໍ່ການພັດທະນາເສດຖະກິດແລະສັງຄົມໃນລາວ ຈຶ່ງໄດ້ໃຫ້ຄວາມສໍາຄັນເປັນພິເສດ ຕໍ່ການໃຫ້ຄວາມຊ່ວຍ ເຫລືອລາວໃນດ້ານດັ່ງກ່າວ ແລະກ່ອນໜ້ານີ້ ທາງການສະຫະລັດກໍໄດ້ໃຫ້ຄວາມຊ່ວຍ ເຫລືອໃນການອະນຸລັກຊ້າງ ຢູ່ໃນແຂວງໄຊຍະບູລີອີກດ້ວຍ.
