ທ່ານ ຫວຽນ ມິນ ຈ໊ຽດ ປະທານປະເທດຫວຽດນາມ ຊຶ່ງໄດ້ເດີນທາງຢ້ຽມຢາມລາວຢ່າງເປັນ ທາງການໃນລະຫວ່າງວັນທີ່ 24-26 ສິງຫານີ້ ໄດ້ຖະແຫລງເນັ້ນຍໍ້າ ໃນລະຫວ່າງການພົບປະເຈລະຈາຢ່າງຄົບຄະນະ ຮ່ວມກັນກັບຄະນະຂອງທ່ານ ຈູມມະລີ ໄຊຍະສອນ ປະທານປະເທດລາວ ຢູ່ນະຄອນວຽງຈັນ ວ່າ ທາງການຫວຽດນາມ ຈະຍັງຄົງສືບຕໍ່ເສີມຂະຫຍາຍສາຍພົວພັນແບບພິເສດ ແລະການຮ່ວມມືຮອບດ້ານ ກັບທາງການລາວຕໍ່ໄປ ຢ່າງບໍ່ຢຸດຍັ້ງ.
ໂດຍສະເພາະແມ່ນການຮ່ວມມືທາງເສດຖະກິດນັ້ນ ທ່ານຫວຽນ ມິນ ຈ໊ຽດ ກໍໄດ້ຢືນຢັນວ່າ ທາງການຫວຽດນາມຈະໃຫ້ການສະນັບສະນຸນສົ່ງເສີມບັນດາວິສາຫະກິດ ທັງທີ່ເປັນຂອງລັດຖະບານແລະພາກເອກກະຊົນໃນຫວຽດນາມນັ້ນ ໃຫ້ເຂ້ົາມາລົງທຶນຢູ່ໃນລາວໃຫ້ຫລາຍຂຶ້ນຢ່າງຕໍ່ເນຶ່ອງ ຊຶ່ງຈົນເຖິງປັດຈຸບັນນີ້ ກໍປາກົດວ່າການລົງທຶນຂອງຫວຽດນາມໃນລາວມີມູນຄ່າຫລາຍກວ່າ 2,400 ລ້ານໂດລາ ຈາກ 219 ໂຄງການຢູ່ໃນເຂດ 16 ແຂວງ ຈາກທັງໝົດ 17 ແຂວງຂອງລາວ ກໍຄືເປັນຮອງພຽງແຕ່ຈີນແລະໄທເທົ່ານັ້ນ.
ສ່ວນໃນດ້ານການຄ້ານັ້ນ ທັງສອງຝ່າຍກໍສົ່ງເສີມໃຫ້ມີການຄ້າຫລາຍຮູບແບບແລະມີການອໍາ ນວຍຄວາມສະດວກໃຫ້ກັບພາກທຸລະກິດການຄ້າ ການລົງທຶນແລະພັດທະນາການເຊຶ່ອມ ຕໍ່ທາງດ້ານຄົມມະນາຄົມຂົນສົ່ງລະ ຫວ່າງກັນຢາງຄົບຊຸດແລະຢ່າງທົ່ວເຖິງ ຕະຫລອດ ພາກເໜືອຮອດພາກໃຕ້. ໂດຍສໍາລັບໃນດ້ານການຄ້ານັ້ນ ທັງສອງຝ່າຍກໍໄດ້ວາງເປົ້າໝາຍທີ່ຈະເພີ່ມມູນຄ່າການຄ້າລະຫວ່າງກັນໃຫ້ເຖິງ 1 ພັນລ້ານໂດລາໃນປີນີ້ ແລະ ໃຫ້ເພີ່ມຂຶ້ນເປັນ 2 ພັນລ້ານໂດລາໃນປີ 2015 ແລະ 5 ພັນລ້ານໂດລາໃນປີ 2020 ສ່ວນໃນດ້ານການລົງທຶນນັ້ນ ທາງຝ່າຍຫວຽດນາມກໍຍັງໄດ້ສະແດງຄວາມເຊື່ອໝັ້ນ ດ້ວຍວ່າມູນຄ່າການລົງທຶນຂອງຫວຽດນາມໃນ ລາວຈະເພີ່ມຂຶ້ນເປັນຫລາຍກວ່າ 3 ພັນ ລ້ານໂດລາພາຍໃນປີ 2011 ຢ່າງແນ່ນອນ ທັງນີ້ກໍເນຶ່ອງຈາກວ່າກຸ່ມທຸລະກິດຈາກຫວຽດ ນາມໄດ້ໃຫ້ຄວາມສົນໃຈເປັນພິເສດກັບການເພີ່ມການລົງທຶນດ້ານພະລັງງານ ເໝືອງແຮ່ ແລະການປູກພືດເສດຖະກິດທີ່ຈະຕ້ອງໃຊ້ເງິນລົງທຶນຫລາຍເປັນພິເສດນັ້ນເອງ.
ທາງດ້ານທ່ານຈູມມະລີ ກໍໄດ້ໃຫ້ການຢືນຢັນເຖິງການເສີມຂະຫຍາຍສາຍພົວພັນແບບພິເສດ ແລະການຮ່ວມມື ຮອບດ້ານລະຫວ່າງສອງປະເທດ ກໍຄືສອງພັກ ສອງລັດຖະບານ ແລະປະຊາຊົນໃນທັງສອງປະເທດນັ້ນວ່າເປັນ ມໍລະດົກອັນລໍ້າຄ່າທີ່ຈະຕ້ອງຖ່າຍທອດສູ່ຄົນລຸ້ນໃໝ່ ເພື່ອໃຫ້ຮ່ວມມືກັນພັດທະນາໄປສູ່ຄວາມຈະເຣີນຮຸ່ງເຮືອງ ແລະວັດທະນາຖາວອນສືບຕໍ່ໄປ ດັ່ງທີ່ທ່ານຈູມມະລີ ໄດ້ຖະແຫລງຍໍ້າໃນຕອນນຶ່ງວ່າ:
“ໃນການພົບປະຫາລື ພວກເຮົາໄດ້ແລກປ່ຽນຄວາມຄິດຄວາມເຫັນນໍາກັນບົນຈິດໃຈເຊື່ອໝັ້ນຮັກແພງແລະເຂົ້າ ອົກເຂົ້າໃຈກັນຢ່າງເລິກເຊິ່ງ ຊຶ່ງໄດ້ສະແດງໃຫ້ເຫັນຕື່ມອີກເທື່ອນຶ່ງເຖິງຄວາມສະນິດສະນົມອັນດູດດື່ມແລະມູນ ເຊື້ອແຫ່ງຄວາມສາມັກຄີພິເສດອັງຍິ່ງໃຫຍ່ລະຫວ່າງລາວກັບຫວຽດນາມຢ່າງແທ້ຈິງ ແລະສອງຝ່າຍໄດ້ຕົກລົງ ຢ່າງເປັນເອກກະພາບສູງເຖິງການຕິດສັນໃຈສືບຕໍ່ເຮັດໃຫ້ມູນເຊື້ອສາມັກຄີພິເສດຂອງສອງພັກ ແລະປະຊາຊົນສອງຊາດໃຫ້ໄດ້ຮັບການບໍາລຸງຮັກສາເສີມຂະຫຍາຍ ໃຫ້ແຕກດອກອອກຜົນ ຕໍ່ໄປຢ່າງບໍ່ຢຸດຍັ້ງ”
ກ່ອນໜ້ານີ້ ກໍຄືໃນຊ່ວງບຸນສົງການປີໃໝ່ລາວນັ້ນ ທ່ານ ໂໜ່ງ ດິ໊ກ ແໝ່ງ ເລຂາທິການໃຫຍ່ພັກຄອມມິວນີສ ຫວຽດນາມກໍໄດ້ເດີນທາງຢ້ຽມຢາມລາວຢ່າງເປັນທາງການມາແລ້ວໂດຍໃນໂອກາດດັ່ງກ່າວ ທ່ານ ໂໜ່ງ ດິ໊ກ ແໝ່ງ ກັບທ່ານຈູມມະລີ ໃນຖານະເລຂາທິການໃຫຍ່ພັກປະຊາຊົນປະຕິວັດລາວນັ້ນ ກໍໄດ້ຖະແຫລງການຮ່ວມ ກັນວ່າທັງສອງພັກຈະເພີ່ມການພົບປະແລກປ່ຽນເຈົ້າໜ້າທີ່ຂັ້ນສູງລະຫວ່າງກັນໃຫ້ຫລາຍຂຶ້ນ ໂດຍຈະເນັ້ນໜັກ ການພັດທະນາຊັບພະຍາກອນມະນຸດ ການພັດທະນາທາງສັງຄົມ ການເມືອງແລະຄວາມໝັ້ນຄົງໃນທັງສອງ ປະເທດຮ່ວມກັນຢ່າງໄກ້ຊິດ.
ສ່ວນກ່ຽວກັບການປັກຫລັກໝາຍຊາຍແດນໃໝ່ເພີ່ມຕື່ມຂຶ້ນໃນຕະຫລອດແນວເຂດຊາຍແດນ ລະຫວ່າງສອງ ປະເທດນັ້ນທັງສອງຝ່າຍກໍໄດ້ວາງເປົ້າໝາຍທີ່ຈະດໍາເນີນການສໍາຫລວດແລະປັກຫລກໝາຍໃຫ້ສໍາເລັດທັງໝົດ ພາຍໃນປີ 2014 ເປັນຢ່າງຊ້າ
