ລິ້ງ ສຳຫລັບເຂົ້າຫາ

ລາວພ້ອມຮັກສາຄວາມປອດໄພ ເຕັມ 100% ໃນງານສະຫລອງ ວຽງຈັນ ຄົບຮອບ 450 ປີ

  • ຊົງຣິດ ໂພນເງິນ

ກອງປະຊຸມກຽມການ ສໍາລັບການສະເຫລີມສະຫລອງ ການສະຖາປະນາ ນະຄອນຫລວງວຽງຈັນ ຄົບຮອບ 450 ປີ.

ທາງ​ການ​ລາວ​ຢືນຢັນ​ວ່າ​ຈະ​ຮັບປະກັນ​ການ​ຮັກສາ​ຄວາມ​ສະຫງົບ​ຮຽບຮ້ອຍ​ໃຫ້​ໄດ້ 100% ​ເຕັມ​ ໃນ​ໂອກາດ​ການສະ​ເຫລີ​ມສະ​ຫລອງ​ການ​ສະຖາ​ປະ​ນາ​ວຽງ​ຈັນ​ເປັນ​ນະຄອນຫລວງຂອງ​ລາວ​ຄົບຮອບ 450 ປີ ​ໂດຍ​ໃນ​ເວລາ​ນີ້ ​ໄດ້​ຈັດ​ສົ່ງ​ກໍາ​ລັງທະຫານ​ແລະ​ຕໍາ​ຫລວດ​ໄປ​ປະ​ຈໍາ​ການ​ຢູ່​ຕາມ​ບ້ານ​ຕ່າງໆ ​ໃນ​ທົ່ວ​ນະຄອນ​ວຽງ​ຈັນ​ແລ້ວ.

ທ່ານ​ບຸນ​ຕາ ​ແສງ​ດາ​ວົງ ຮອງ​ຫົວໜ້າ​ຫ້ອງການ​ປົກຄອງ​ນະຄອນຫລວງ​ວຽງ​ຈັນ​ໄດ້​ຖະ​ແຫລ​ງຢືນຢັນ​ວ່າ​ວຽກ​ງານ​ນຶ່ງ​ທີ່​ມີ​ຄວາມ​ສໍາຄັນ​ຢ່າງ​ຍິ່ງ​ໃນ​ໂອກາດ​ການສະ​ເຫລີ​ມສະຫລອງ​ການ​ສະຖາປະນາ​ວຽງ​ຈັນ ​ເປັນ​ນະຄອນຫລວງ​ຂອງ​ລາວ​ຄົບຮອບ 450 ປີໃນ​ປີ​ນີ້ ກໍ​ຄື​ການ​ຮັບປະກັນໃນ​ການ​ຮັກສາ​ຄວາມ​ສະຫງົບ​ຮຽບຮ້ອຍ​ໃຫ້​ໄດ້ 100% ​ເຕັມ​ແລະ​ເພື່ອ​ເປັນ​ການ​ຮັບປະກັນ​ວ່າ​ຈະ​ສາມາດ​ປະຕິບັດ​ດັ່ງກ່າວ​ໄດ້​ຈິງ ທາງ​ການ​ລາວ​ກໍ​ໄດ້​ຈັດ​ສົ່ງ​ທະຫານ​ແລະ​ຕໍາຫລວດ​ໄປ​ປະ​ຈໍາ​ການ​ຢູ່​ທຸກ​ໝູ່​ບ້ານ​ທົ່ວ​ເຂດ​ນະຄອນຫລວງ​ແລ້ວ​ໃນ​ຂະນະ​ນີ້. ຍິ່ງ​ໄປ​ກວ່າ​ນັ້ນ ການ​ປະຕິບັດ​ມາດ​ຕະການ​ດັ່ງກ່າວ​ນີ້​ຍັງ​ຈະ​ດໍາ​ເນີນ​ສືບ​ຕໍ່​ໄປ​ຈົນ​ເຖິງ​ກອງ​ປະຊຸມ​ໃຫຍ່​ພັກ​ປະຊາຊົນ​ປະຕິວັດ​ລາວ​ຄັ້ງ​ທີ່ 9 ທີ່​ຈະ​ມີ​ຂຶ້ນ​ໃນ​ຕົ້ນ​ປີໜ້າ​ອີກ​ດ້ວຍ ດັ່ງ​ທີ່​ທ່ານ​ບຸນ​ຕາ​ໄດ້​ຖະ​ແຫລ​ງວ່າ:

“ພະນັກງານ​ທະຫານ​ຕໍາຫລວດ​ ແລະພະ​ແນ​ກການ ກົມ​ກອງ​ຕ່າງໆ ນັບ​ທັງ​ພະ​ນັກ ງານ​ຂອງ​ເມືອງ​ກໍ​ໄດ້​ຫັນ​ລົງສູ່​ຮາກ​ຖານ​ ກໍ​ແມ່ນ​ປະ​ຈໍາ​ຢູ່​ບ້ານ​ຕ່າງໆ​ ນັບ​ແຕ່​ວັນທີ 1 ​ເດືອນກັນຍາເປັນ​ຕົ້ນ​ມາ ​ໄປ​ຈົນ​ສໍາ​ເລັດ​ການສະ​ເຫລີ​ມສະຫລອງ​ນະຄອນ​ຫລວງ​ວຽງ​ຈັນ​ຄົບ​ຮອບ 45​0 ປີ ​ແລະ​ກໍ​ຍັງ​ກະກຽມ​ສ້າງ​ຜົນງານ​ຮອບດ້ານ​ໃຫ້​ກັບ​ກອງ​ປະ ຊຸມ​ໃຫຍ່​ພັກ​ປະຊາຊົນ​ປະຕິວັດ​ລາວ​ຄັ້ງ​ທີ່ 9 ທີ່​ຈະ​ໄຂ​ຂຶ້ນ​ໃນ​ຕົ້ນ​ປີ 2011 ດ້ວຍ.”

ການຈັດ​ງານ​ສະ​ເຫລີ​ມສະຫລອງ​ການ​ສະຖາປະນາ​ນະຄອນຫລວງ​ວຽງ​ຈັນ​ຄົບຮອບ 450 ປີ ກໍາໜົດ​ທີ່​ຈະມີ​ຂຶ້ນ ​ໃນ​ລະຫວ່າງ​ວັນ​ທີ່ 15-21 ​ເດືອນ​ພະ​ຈິກ 2010 ນີ້ ​ໂດຍ​ສໍາລັບ​ວຽກ​ງານ​ດ້ານ​ການສະ​ແດງ​ສິນລະປະ​ວັດທະນະ​ທໍາ​ນັ້ນ ນອກຈາກ​ຈະ​ມີ​ການ​ຈັດກາ​ນສະ​ແດງ​ທີ່​ກ່ຽວ​ກັບ​ປະຫວັດ​ສາດ​ຄວາມ​ເປັນ​ມາ​ຂອງ​ນະຄອນ​ວຽງ​ຈັນ​ນັບ ຈາກ​ອະດີດ​ເລື້ອຍ​ມາ​ຈົນ​ເຖິງ​ປັດຈຸບັນ​ນີ້​ແລ້ວ ກໍ​ຍັງ​ຈະ​ມີ​ການຈັດ​ຂະ​ບວນ​ແຫ່​ຢ່າງ​ຍິ່ງ​ໃຫຍ່​ອີກ​ດ້ວຍ ​ໂດຍ​ທີ່​ຖືວ່າ​ພິ​ເສດ​ທີ່​ສຸດ ​ສໍາລັບ​ໃນ​ສ່ວນ​ຂອງ​ການຈັດ​ຂະ​ບວນ​ແຫ່​ນັ້ນ ​ກໍ​ຄື​ຈະ​ມີ​ການ​ຕັ້ງ​ຕົ້ນ​ຂະ​ບວນທີ່​ຫລວງ​ພະ ​ບາງ​ດ້ວຍການ​ຄົບງັນ​ເປັນ​ເວລາ 3 ມື້ 3 ຄືນ ​ແລ້ວ​ຈຶ່ງເຄຶ່ອນຂະ​ບວນ​ແຫ່​ທີ່​ປະກອບ​ດ້ວຍ ຊ້າງ 9 ຕົວ ມ້າ 9 ຕົວ​ແລະກວຽນ 9 ​ເຫລັ້ມ ​ຈາກ​ຫລວງ​ພະ​ບາງ​ເລື້ອຍ​ລົງ​ມາ​ຕາມ​ເສັ້ນ ທາງ​ເລກ 13 ຈົນ​ເຖິງ​ນະຄອນຫລວງ​ວຽງ​ຈັນ ​ແລ້ວຕໍ່​ເນຶ່ອງດ້ວຍ​ການ​ຄົບ​ງັນ​ຢູ່​ນະຄອນ​ຫລວງ​ອີກ ​ເປັນ​ເວລາ 7 ມື້ 7 ຄືນ.

ນອກຈາກ​ນີ້ ວຽກ​ງານ​ນຶ່ງ​ທີ​ມີ​ຄວາມ​ສໍາຄັນ​ຢ່າງ​ຍິ່ງ​ເຊັ່ນກັນ​ແລະ​ທາງ​ການ​ລາວ​ກໍ​ກໍ​າລັງ​ເລັ່ງ ດໍາ​ເນີນ​ການ​ກໍ່ສ້າງ​ໃຫ້​ສໍາ​ເລັດ​ທັນ​ກໍາໜົດ​ການສະ​ເຫລີ​ມສະຫລອງ​ດັ່ງກ່າວ ກໍ​ຄື​ການ​ກໍ່ສ້າງ​ຮູບ​ຫລໍ່​ຫລື​ຮູບ​ປັ້ນ​ຂອງ​ເຈົ້າອະນຸວົງ ​ທີ່​ມີຄວາມ​ສູງ​ເຖິງ 8 ​ແມັດ​ແລະ​ຖ້າ​ຫາກ​ລວມຖານ​ຫລື​ແທ່ນ ​ຢືນ​ດ້ວຍ​ນັ້ນ​ກໍ​ຈະເຮັດ​ໃຫ້​ຮູບ​ຫລໍ່​ດ່ັງກ່າວ​ມີ​ຄວາມ​ສູງ ລວມ​ເຖິງ 17 ​ແມັດ ຊຶ່ງ​ຖື​ວ່າ​ເປັນ​ຮູບ​ຫລໍ່​ທີ່​ສູງ​ທີ່​ສຸດ​ໃນ​ລາວ​ທີ່​ຈະ​ຕ້ອງ​ໃຊ້ແຮ່​ທອງ​ແດງ​ສໍາ​ລັບ​ຫລໍ່​ຮູບ​ປັ້ນ ​ຄິດ​ເປັນນໍ້າໜັກ​ລວມ​ເຖິງ 8 ຕັນ ​ໂດຍ​ລ່າ​ສຸດ​ກໍ​ມີ​ລາຍ​ງານ​ວ່າ​ບໍລິສັດ MMG ຊຶ່ງ​ເປັນ​ຜູ້​ລົງທຶນ​ຂຸດ​ຄົ້ນ​ແຮ່​ຄໍາ​ແລະ​ທອງ​ແດງ ​ຢູ່​ເມືອງ​ວີລະ​ບູລີ ​ແຂວງ​ສະຫວັນ​ນະ​ເຂດ​ນັ້ນ ​ກໍ​ໄດ້​ຕົກລົງ​ໃຫ້ການ​ຊ່ວຍ​ເຫລືອ​ທາງ​ການ​ລາວ​ໃນ​ສ່ວນ​ທີ່​ເປັນ​ທອງ​ແດງ ​ນໍ້າໜັກ​ລວມ​ເຖິງ 8 ຕັນ​ດັ່ງກ່າວ​ແລ້ວ.

ການ​ກໍ່ສ້າງ​ຮູບ​ຫລໍ່​ຂອງ​ເຈົ້າອະນຸວົງ ​ຖື​ເປັນ 1 ​ໃນ​ທັງ​ໝົດ 21 ​ໂຄງການ​ທີ່​ທາງ​ການ​ລາວ​ ໄດ້​ວາງ​ໄວ້ໃນ​ແຜນການສະ​ເຫລີ​ມສະຫລອງ​ວຽງ​ຈັນ​ຄົບຮອບ 450 ປີ ​ໂດຍ​ໂຄງການ​ອື່ນໆ​ ທີ່​ສໍາຄັນ​ນັ້ນ​ ກໍ​ຄື​ການ​ບູລະນະ​ປະຕິສັງຂອນ​ວັດ​ສີສະເກດ ການ​ພັດທະນາ​ແລະ​ຂະຫຍາຍ​ ສະໜາມ​ພະທາດ​ຫລວງ ການ​ພັດທະນາ​ຕະຫລາດ​ເຊົ້າ ການສ້າງ​ຖະນົນ​ວຽງ​ຈັນ 450 ປີ ການ​ກໍ່ສ້າງ​ສໍານັກງານ​ປົກຄອງ​ແລະ​ສະພາ​ເຂດ​ນະຄອນຫລວງ​ວຽງ​ຈັນ ການວາງ​ຜັງ​ເມືອງ​ວຽງ​ຈັນ​ເພື່ອ​ຮອງ​ຮັບ​ການ​ພັດທະນາ​ໄປ​ສູ່​ຄວາມ​ທັນ​ສະ​ໄໝ ກາ​ນກໍ່ສ້າງ​ສວນ​ສາທາລະນະ​ໜອງ​ຈັນ ການ​ສ້າງຕະຫລາດ​ຊາຍ​ແດນ​ຢູ່​ດົງ​ໂພ​ສີ ​ເພື່ອ​ຮອງ​ຮັບ​ແຜນການ​ພັດທະນາ​ໃຫ້​ເປັນ​ເຂດ​ເສດ ຖະກິດ​ພິ​ເສດ ການສ້າງ​ບ້ານ​ແລະ​ກຸ່ມ​ບ້ານ​ພັດທະນາ ​ເພື່ອ​ແກ້​ໄຂ​ຄວາມທຸກ​ຍາກ​ຂອງປະຊາ ຊົນ​ແລະ​ກໍ່ສ້າງ​ເຂຶ່ອນປ້ອງ​ກັນ​ຕາ​ຝັ່ງ​ເຈຶ່ອນ​ໃນ​ແນວ​ແມ່​ນໍ້າຂອງ​ຈາກ​ເກົ້າລ້ຽວ​ເຖິງ​ທາດ​ຂາວ ​ເປັນ​ຕົ້ນ.

ສ່ວນ​ບັນດາ​ຄົນ​ລາວ​ໃນ​ຕ່າງປະ​ເທດ ​ທີ່​ຕ້ອງການ​ຈະ​ເດີນທາງ​ກັບ​ໄປ​ຢາມ​ຍາດຕິ​ພີ່ນ້ອງ​ໃນ​ໂອກາດ​ດັ່ງກ່າວ​ນີ້​ ກໍສາມາດ​ທີ່​ຈະ​ຍື່ນ​ຄໍາ​ຮ້ອງ​ຂໍ​ວິ​ຊ່າ​ຈາກ​ສະຖານທູດ​ແລະ​ສະຖານ​ກົງສຸນ​ ຂອງ​ລາວ​ຢູ່​ທີ່​ຕ່າງປະ​ເທດ​ໄດ້​ໂດຍ​ບໍ່​ຕ້ອງເສຍ​ຄ່າ​ທໍາ​ນຽມ​ແຕ່​ຢ່າງ​ໃດ ຖ້າ​ຫາກ​ວ່າ​ເປັນ​ການ​ຍື່ນ​ຄໍາ​ຮ້ອງ​ໃນ​ລະຫວ່າງ​ວັນ​ທີ່ 1-15 ​ເດືອນ​ພະຈິກ. ນອກຈາກ​ນັ້ນ ສໍາລັບຄົນ​ລາວ​ໃນ​ຕ່າງປະ​ເທດ​ທີ່​ບໍ່​ສາມາດ​ຍື່ນ​ຄໍາ​ຮ້ອງ​ໃນ​ຊ່ວງ​ເວລາ​ດັ່ງກ່າວ​ໄດ້ ​ກໍ​ຍັງ​ສາມາດ​ທີ່​ຈະ​ຍື່ນ​ຄໍາ​ຮ້ອງ​ຂໍວິ​ຊ່າ ຈາກ​ຫ້ອງການ​ກວດ​ຄົນ​ເຂົ້າ​ເມືອງ​ຂອງ​ທາງ​ການ​ທີ່​ປະ​ຈໍາ​ຢູ່​ຕາມ​ດ່າ​ນຊາຍ​ແດນ​ໄດ້​ ໂດຍ​ບໍ່​ຕ້ອງເສຍ​ຄ່າ​ທໍານຽມ​ເຊັ່ນ​ກັນ ຖ້າ​ຫາກ​ວ່າ​ເປັນ​ການ​ຍື່ນ​ຄໍາ​ຮ້ອງ​ໃນ​ລະຫວ່າງ​ວັນ​ທີ່ 15-21 ພະຈິກ​ ອັນ​ເປັນ​ຊ່ວງ​ຂອງການສະ​ເຫລີ​ມສະຫລອງ 450 ປີ ນະ​ຄອນ​ຫລວງ ວຽງຈັນ​ນັ້ນ​ເອງ.

XS
SM
MD
LG