ທາງການລາວຈະໃຫ້ສິດໃນການຢູ່ອາໄສໃນລາວຢ່າງຖາວອນແກ່ຊາວຕ່າງຊາດທຸກ
ຄົນ ທີ່ຊື້ຫ້ອງພັກອາໄສ ທີ່ອາຄານສູງ 19 ຊັ້ນ ທັງ 12 ຕຶກ ໃນເຂດເສດຖະກິດສະ
ເພາະບຶງທາດຫລວງ ໃນນະຄອນຫລວງວຽງຈັນ.
ທ່ານນາງ ບົວທາ ຂັດຕິຍະ ປະທານຄະນະກໍາມະການແຫ່ງຊາດ ເພື່ອຄຸ້ມຄອງເຂດ
ເສດຖະກິດພິເສດ ແລະເຂດເສດຖະກິດສະເພາະ ຢືນຢັນວ່າ ນະໂຍບາຍສໍາຄັນປະ
ການນຶ່ງ ທີ່ລັດຖະບານລາວກໍານົດ ເພື່ອໃຫ້ການສົ່ງເສີມການລົງທຶນ ໃນເຂດເສດຖະກິດ
ພິເສດ ແລະເຂດເສດຖະກິດສະເພາະ ກໍຄື ການທີ່ຈະໃຫ້ສິດໃນການຢູ່ອາໄສໃນລາວ
ຢ່າງຖາວອນ ແກ່ຊາວຕ່າງຊາດ ແລະຄົນເຊື້ອຊາດລາວ ຢູ່ຕ່າງປະເທດ ທີ່ໄດ້ຊື້ຫ້ອງ
ພັກອາໄສ ທີ່ອາຄານສູງ 19 ຊັ້ນ ທັງ 12 ຕຶກ ໃນເຂດເສດຖະກິດສະເພາະບຶງທາດ
ຫລວງ ໃນນະຄອນວຽງຈັນ. ດັ່ງທີ່ທ່ານນາງໄດ້ກ່າວຢືນຢັນວ່າ:
“ສົ່ງເສີມໃຫ້ຜູ້ທີ່ເປັນເຊື້ອຊາດລາວ ທີ່ເປັນສັນຊາດຕ່າງປະເທດເນາະ ມາຊື້ອາ
ພາດເມັນ ແລະມາເປັນພົນລະເມືອງຢູ່ທີ່ນີ້ ດໍາລົງຊີວິດຢູ່ທີ່ນີ້ກ່ອນ. ຖ້າຫາກມີ
ຄວາມສົນໃຈຈາກຜູ້ຊື້ລາຍຍ່ອຍ ທີ່ເປັນສັນຊາດອື່ນ ພວກເຮົາກໍມີນະໂຍບາຍ
ອອກບັດສໍາມະໂນຄົວໃຫ້ ຖ້າວ່າມາຊື້ອາພາດເມັນ ຫລືວ່າ ມາດໍາເນີນກິດຈະການ
ຢູ່ທີ່ນີ້ ເອີ້ນວ່າເປັນພົນລະເມືອງຢູ່ໃນເຂດນີ້ ນະໂຍບາຍດັ່ງກ່າວນີ້ ໄດ້ກໍານົດໄວ້ຢູ່ໃນກົດໝາຍວ່າດ້ວຍ ການສົ່ງເສີມການລົງທຶນຂອງ ສປປລາວ ແລະຜັນຂະຫຍາຍ
ຕາມດໍາລັດວ່າດ້ວຍການພັດທະນາ ແລະຄຸ້ມຄອງ ຂພສ, ເລກທີ 443 ທີ່ເອີ້ນວ່າ
ການພັດທະນາແບບພິເສດ ຫລືສະເພາະນັ້ນ.”
ທາງດ້ານທ່ານແຝງ ອິນທິລາດ ຮອງປະທານຄະນະຄຸ້ມຄອງເຂດເສດຖະກິດສະເພາະບຶງທາດຫລວງ ຖະແຫລງຢືນຢັນວ່າ ການກໍ່ສ້າງອາຄານທີ່ພັກອາໄສສູງ 19 ຊັ້ນ ໄດ້ດໍາ
ເນີນການສໍາເລັດແລ້ວ 7 ຕຶກອາຄານ ຈາກແຜນການທີ່ວາງໄວ້ທັງໝົດ 12 ອາຄານ. ໃນ
ປັດກໍມີຊາວຕ່າງຊາດ ແລະຄົນລາວຈາກຕ່າງປະເທດ ໄດ້ຈອງຊື້ອາຄານທີ່ພັກໄປແລ້ວ
6 ອາຄານ ສ່ວນອີກ 1 ອາຄານນັ້ນ ນັກທຸລະກິດກໍໄດ້ຈອງຊື້ທັງອາຄານ ເພື່ອປັບປຸງເປັນ
ໂຮງແຮມລະດັບ 5 ດາວ ທີ່ມີຫ້ອງພັກທັງໝົດ 128 ຫ້ອງ ຊຶ່ງຈະ ສໍາເລັດ ໃນໝໍ່ໆນີ້.
ຂະນະທີ່ທ່ານຫລີວ ຈຸນ ຜູ້ອໍານວຍການຝ່າຍການຈໍາໜ່າຍຂອງກຸ່ມບໍລິສັດ Wan Fend Shanghai ຈາກຈີນ ຖະແຫລງວ່າ ການພັດທະນາເຂດເສດຖະກິດສະເພາະບຶງທາດ
ຫລວງ ໄດ້ດໍາເນີນຢ່າງຕັ້ງໜ້າ ແລະການດໍາເນີນງານໃນໄລຍະທີ 1 ຂອງໂຄງການ ກໍໄດ້
ເລີ້ມເປີດໃຫ້ບໍລິການໃນສ່ວນທີ່ເປັນສູນການຄ້າ ຮ້ານອາຫານ ແລະຕະຫລາດກາງຄືນ
ແລ້ວ. ສ່ວນບັນດາຜູ້ທີ່ຈອງຊື້ອາຄານ ທີ່ພັກອາໄສ ທັງ 6 ອາຄານ ກໍສາມາດເຂົ້າໄປຢູ່
ໄດ້ແລ້ວ ນັບແຕ່ປີ 2016 ເປັນຕົ້ນມາ ສ່ວນອີກ 5 ອາຄານ ກໍຈະກໍ່ສ້າງໃຫ້ສໍາເລັດ ໃນ
ເດືອນມິຖຸນາ 2017 ນີ້.
ກຸ່ມບໍລິສັດ Wan Fend Shanghai ຈໍາກັດ ໄດ້ນໍາໃຊ້ເງິນທຶນໄປແລ້ວຫລາຍກວ່າ 200
ລ້ານໂດລາ ນັບແຕ່ທ້າຍປີ 2012 ເປັນຕົ້ນມາ ແລະກໍໄດ້ຄືບໜ້າຕາມແຜນການ ທີ່ວາງ
ໄວ້ເຊັ່ນ ການກໍ່ສ້າງຖະໜົນຍາວ 400 ແມັດ ກວ້າງ 36 ແມັດ ເຊື່ອມຕໍ່ຈາກສາມແຍກ
ໂພນທັນ ເຂົ້າມາໃນໂຄງການ ການວາງແນວສາຍສົ່ງກະແສໄຟຟ້າ ລະບົບນໍ້າປະປາ
ລະບົບກໍາຈັດນໍ້າເປື້ອນ ການຈັດວາງສາຍຖະໜົນໃນໂຄງການ ແລະການຂຸດສວນນໍ້າໃນ
ພື້ນທີ່ 50 ເຮັກຕາ ລວມເຖິງ ກໍ່ສ້າງສິ່ງອໍານວຍຄວາມສະດວກຕ່າງໆ ຢ່າງຄົບຊຸດ ຊຶ່ງກໍ
ເຮັດໃຫ້ຕ້ອງເພີ້ມເງິນ ລົງທຶນ ຈາກເດີມ 1.600 ລ້ານໂດລາ ເປັນ 5.000 ລ້ານໂດລາ.
ນອກຈາກນັ້ນ ພາກສ່ວນທີ່ໄດ້ກໍ່ສ້າງສໍາເລັດແລ້ວນັ້ນ ຍັງລວມເຖິງສິ່ງອໍານວຍຄວາມ
ສະດວກຕ່າງໆ ເຊ່ນ ຖະໜົນພາຍໃນໂຄງການ ເຂດສີຂຽວ ແລະທີວທັດ ການຕິດຕັ້ງລິຟ
ໃນອາຄານ ຄີວລົດໂດຍສານ ຕະຫລາດສົດ ຊຸບເປີມາເກັດ ສະຖານທີ່ບັນເທີງຕ່າງໆ
ລຽບຕາມແຄມໜອງນໍ້າຂະໜາດໃຫຍ່ ເຊ່ນຮ້ານ ອາຫານ ສະຖານທີ່ສະແດງສິນລະປະ ສະລອຍນໍ້າ ແລະບ່ອນຫລິ້ນເກມທາງນໍ້າ ເດີ່ນເທນນິສ ເດີ່ນເຕະບານເດີ່ນໄດກ໋ອຟ
ຮ້ານຄ້າປອດພາສີ ຮ້ານກາເຟ ໂຮງຮູບເງົາ ສວນສະໜຸກ ຮ້ານອາຫານນາໆຊາດ ສູນສຸຂະພາບ ແລະຄວາມງາມ ບ່ອນຈອດລົດ ແລະອື່ນໆ. ໂຄງການພັດທະນາເມືອງໃໝ່
ຢູ່ບຶງທາດຫລວງນີ້ ມີເນື້ອທີ່ສໍາປະທານ 365 ເຮັກຕາ ຊຶ່ງກໍເຮັດໃຫ້ຕ້ອງເວນຄືນທີ່ດິນ
ຂອງປະຊາຊົນລາວ ຈໍານວນທັງໝົດ 480 ຕອນ ຄິດເປັນມູນຄ່າການເວນຄືນຫລາຍ
ກວ່າ 10 ລ້ານໂດລາ.