ລິ້ງ ສຳຫລັບເຂົ້າຫາ

logo-print

ລາວຈະ​ຂໍ ​ການ​ຊ່ວຍ ​ເຫລືອ​ຈາກ ​ສາ​ກົນ​ ເພີ້ມ​ຂຶ້ນ ເພື່ອ​ຟື້ນ​ຟູ​ ຈາກຜົນ ​ກະ​ທົບ ຂອງ​ໄພ​ນ້ຳ​ຖ້ວມ​ ຄັ້ງ​ໃຫຍ່


ກອງ​ປະ​ຊຸມ​ນັກ​ຂ່າວ ກ່ຽວ​ກັບການ​ກະ​ກຽມກ​ອງ​ປະ​ຊຸມ​ໂຕະ​ມົນ​ປະ​ຈຳ​ປີ 2018 ລ​ະ​ຫວ່າງ ລັດ​ຖະ​ບານ​ລາວ ກັບ​ອົງ​ການ​ໃຫ້​ທຶນຊ່ວຍ​ເຫລືອສາ​ກົນ

ລັດ​ຖະ​ບານ​ລາວຈະ​ຂໍ​ການ​ຊ່ວຍ​ເຫລືອ​ຈາກກອງ​ປະ​ຊຸມ​ໂຕະ​ມົນລະ​ດັບ​ສາ​ກົນ​ຫລາຍ​ຂຶ້ນ
ເພື່ອ​ນຳ​ໃຊ້​ເຂົ້າ​ໃນ​ການ​ຟື້ນ​ຟູ​ສະ​ພາບ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ລາວ ທີ່​ຖືກ​ກະ​ທົບ
​ຈາກ​ໄພ​ນ້ຳ​ຖ້ວມ​ຄັ້ງ​ໃຫຍ່.

ທ່ານສອນ​ໄຊ ສີ​ພັນ​ດອນ ຮອງນາຍົກລັດ​ຖະ​ມົນ​ຕີ​ ແລະ​ປະ​ທານ​ຄະ​ນະ​ກຳ​ມະ​ການ
​ສະ​ເພາະ​ກິດ​ແກ້​ໄຂ​ໄພ​ພິ​ບັດລະ​ດັບ​ຊາດຖະ​ແຫຼງວ່າ ລັດ​ຖະ​ບານ​ລາວໄດ້​ຕຽ​ມ​ການ
ຈະ​ຮຽກ​ຮ້ອງ ຂໍ​ການ​ຊ່ວຍ​ເຫລືອ​ຈາກສາ​ກົນຫລາຍ​ຊຶ້ນ ໃນ​ໂອ​ກາດກອງ​ປະ​ຊຸມ​ໂຕະ​ມົນ
ລະ​ດັບສູງ ປະ​ຈຳ​ປີ 2018 ລະ​ຫວ່າງ​ລັດ​ຖະ​ບານ​ລາວກັບ​ສາ​ກົນ ແລະ​ນາໆ ຊາດ ທີ່​ໃຫ້​
ການ​ຊ່ວຍ​ເຫລືອ​ແກ່​ລາວ ທີ່​ກຳ​ນົດ ຈະ​ຈັດ​ຂຶ້ນໃນ​ທ້າຍ​ເດືອນ​ພະ​ຈິກນີ້ ທີ່​ນະ​ຄອນ​ວຽງ
​ຈັນ ຊຶ່ງ​ການຂໍ​ກ​ານ​ຊ່ວຍ​ເຫລືອ​ທີ່​ເພີ້ມ​ຂຶ້ນດັ່ງ​ກ່າວ ມີ​ເປົ້າ​ໝາຍເພື່ອ​ນຳ​ໃຊ້​ເຂົ້າ​ໃນ​ການ
​ຟື້ນ​ຟູ​ສະ​ພາບ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ລາວ ທີ່ໄດ້​ຮັບຜົນ​ກະ​ທົບ​ຈາກ​ໄພ​ນ້ຳ​ຖ້ວມ
​ຄັ້ງ​ໃຫຍ່ ທີ່​ເກີດ​ຂຶ້ນ​ໃນ​ຊ່ວງ​ເດືອນ​ກໍ​ລະ​ກົດ-ກັນ​ຍາ​ຜ່ານ​ມາ ໂດຍ​ສະ​ເພາະ​ປະ​ຊາ​ຊົນ
ທີ່​ເມືອງ​ສະ​ໜາມ​ໄຊ ໃນ​ແຂວງ​ອັດ​ຕະ​ປື ທີ່​ຖືກ​ກະ​ທົບ​ຈາກ​ເຂື່ອນ​ເຊ​ປຽນ-ເຊ​ນ້ຳ​ນ້ອຍ
​ແຕກນັ້ນ ດັ່ງ​ທີ່​ທ່ານ​ສອນ​ໄຊ ຢືນ​ຢັນ​ວ່າ

ເພື່ອ​ຍົກ​ລະ​ດັບ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ໃຫ້​ດີກວ່າ​ເກົ່າ ນຶ່ງ​ກະ​ແມ່ນ​ແຈ້ງ​ຕໍ່​ບໍ
​ລິ​ສັດພັດ​ທະ​ນາ​ໂຄງ​ການ. ສອງ​ມາ​ກະ​ເມ່ນ​ແຈ້ງ​ຕໍ່​ບັນ​ດາ​ອົງ​ການ​ຈັດ​ຕົ້ງ​ສາ​ກົນປະ​ຈຳ
ສ​ປ​ປ ລາວ ເພື່ອ​ເອົາ​ເຂົ້າ​ໃນ​ໂຄງ​ການ ຮັບ​ການ​ຊ່ວຍ​ເຫລືອ​ຈາກ​ຕ່າງ​ປະ​ເທດ ເປັນ​
ຕົ້ນ​ແມ່ນ​ໂຄງ​ການ​ລະ​ດົມ​ທຶນ​ຈາກ​ຕ່າງ​ປະ​ເທດ ທີ່​ຈັດ​ຂຶ້ນ​ໃນ​ກອງ​ປະ​ຊຸມ​ໂຕະ​ມົນ
ໃນ​ເດືອນ​ພະ​ຈິກ 2018 ທີ່​ຈະ​ມາ​ເຖິງນີ້. ພ້ອມ​ທັງ​ສືບ​ຕໍ່​ດຳ​ເນີນ​ການ​ປະ​ເມີນ​ຜົນ​ເສຍ
​ຫາຍ ທາງ​ດ້ານ​ເສດ​ຖະ​ກິດ, ສັງ​ຄົມ, ແລະ​ສິ່ງ​ແວດ​ລ້ອມ​ໃຫ້​ສຳ​ເລັດ​ໂດຍ​ໄວ ເພື່ອ​
ຮຽກ​ຮ້ອງ​ຄ່າ​ຊົດ​ເຊີຍ ຈາກ​ຜູ້​ພັດ​ທະ​ນາ​ໂຄງ​ການ​ຢ່າງ​ສົມ​ເຫດ ສົມ​ຜົນ.

ທາງ​ດ້ານອົງການສະຫະປະຊາຊາດເພື່ອການພັດທະນາ (UNDP) ສຳ​ນັກ​ງານ​ປະ​ຈຳ
​ນະ​ຄອນ​ວຽງ​ຈັນ ຢືນ​ຢັນ​ວ່າ ໃນ​ປີ 2017 ບັນ​ດາ​ອົງ​ການ​ສາ​ກົນ ແລະ​ລັດ​ຖະ​ບານ​ຂອງ
30 ກວ່າ​ປະ​ເທດ ທີ່​ເຂົ້າ​ຮ່ວມກອງ​ປະ​ຊຸມ ໂຕະ​ມົນ ໄດ້​ໃຫ້​ການ​ຊ່ວຍ​ເຫລືອ​ແກ່​ລັດ​ຖະ​
ບານ​ລາວ​ຫລາຍກວ່າ 962 ລ້ານ​ໂດ​ລາ ແຕ່​ວ່າ​ການ​ທີ່​ລາວ​ຕ້ອງ​ປະ​ເຊີນ​ກັບ​ໄພ​ນ້ຳ​ຖ້ວມ
​ຄັ້ງ​ໃຫຍ່ ​ທີ່​ເຮັດ​ໃຫ້​ເກີດ​ການ​ເສຍ​ຫາຢ່າງ​ຫລວງ​ຫລາຍ ໃນ​ປີ 2018 ຈຶ່ງ​ຄາດ​ວ່າ​ລັດ​ຖະ
​ບານ​ລາວ​ຈະ​ຂໍ​ການ​ຊ່ວຍ​ເຫລືອ​ຈາກ​ນາໆ ຊາດເພີ້ມ​ຂຶ້ນ​ເປັນ​ບໍ່​ໜ້ອຍກວ່າ 1,200 ລ້ານ
​ໂດ​ລາ ເພື່ອ​ນຳ​ໃຊ້​ເຂົ້າ​ໃນ​ການ​ຟື້ນ​ຟູ​ສະ​ພາບ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ລາວ ທີ່​
ຖືກ​ກະ​ທົບ​ຈາກ​ໄພ​ນ້ຳ​ຖ້ວມຄັ້ງ​ໃຫຍ່​ດັ່ງ​ກ່າວ ຊຶ່ງ​ລວມ​ເຖິງ​ການ​ຊ່ວ​ຍ​ເ​ຫລືອ​ປະ​ຊາ​ຊົ​ນ
7,095 ຄົນ ທີ່​ເມືອງ​ສະ​ໜາມ​ໄຊ​ອີກ​ດ້ວຍ.

ທັງ​ນີ້ ໄພ​ນ້ຳ​ຖ້ວມ​ຄັ້ງ​ໃຫຍ່​ໄດ້​ກວມ​ເອົາ​ພື້ນ​ທີ່​ໃນ​ເຂດ 2,409 ໝູ່​ບ້ານ 115 ເມືອງໃນ
17 ແຂວງ ແລະ​ນະ​ຄອນ​ວຽງ​ຈັນ ໂດຍ​ສົ່ງ​ຜົນ​ກະ​ທົບ​ຕໍ່​ປະ​ຊາ​ຊົນ​ລາວ 639,437 ຄົນ
ຫຼື 131,507 ຄອບ​ຄົວ ທັງ​ຍັງ​ເຮັດ​ໃຫ້​ມີ​ຜູ້​ເສຍ​ຊີ​ວິດ 55 ຄົນ, ບາດ​ເຈັບ 2 ຄົນ, ສູນ​ຫາຍ
65 ຄົນ ແລະ 16,709 ຄົນບໍ່​ມີ​ທີ່​ຢູ່​ອາ​ໄສ ເພາະ​ເຮືອນ​ທີ່​ນ້ຳພັດ ເສຍ​ຫາຍຢ່າງ​ສິ້ນ​ເຊີງ.
ສ່ວນ​ນາ​ປີ​ເສຍ​ຫາຍ​ໄປ 90,600 ກວ່າ​ເຮັກ​ຕາ ຫຼື 12 ເປີ​ເຊັນ ຂອງ​ນາ​ປີ ທີ່​ປັກ​ດຳ​ໄດ້​
ທັງ​ໝົດ ໂດຍ​ຍັງ​ບໍ່​ຮວມ​ເຖິງ​ເຂົ້າ​ໄຮ່ ແລະ​ພື້ນທີ່​ປູກ​ພືດ​ຕ່າງ​ໆ ທີ່​ເສຍ​ຫາຍ​ໄປ​ກວ່າ
15,000 ເຮັກ​ຕາ, ຄອງ​ຊົນ​ລະ​ປະ​ທານ 778 ແຫ່ງ, ໜອງ​ປາ 5,387 ແຫ່ງ, ງົວ-ຄວາຍ
-ໝູ-ແບ້ ຫຼາຍກວ່າ 23,000 ຕົວ ​ແລະ​ສັດ​ປີກ 70,000 ກວ່າ​ຕົວ.

ນອກຈາກ​ນັ້ນ ໄພ​ນ້ຳ​ຖ້ວມ​ຄັ້ງ​ໃຫຍ່​ໃນ​ລາວ ຍັງ​ເຮັດ​ໃຫ້​ຖະ​ນົນ​ເສຍ​ຫາຍ 644 ເສັ້ນ,
ຂົວ 49 ແຫ່ງ, ເສົາ​ໄຟ​ຟ້າ 915 ຕົ້ນ, ອາ​ຄານ​ຮຽນ 300 ກວ່າ​ຫຼັງ, ໂຮງ​ໝໍ 2 ແຫ່ງ, ສຸກ
​ສາ​ລາ 35 ແຫ່ງ, ແຫຼ່ງ​ນ້ຳ​ບາ​ດານ 5,910 ແຫ່ງ, ນ້ຳສ້າງ 7,138 ແຫ່ງ, ແລະ​ວິດຖ່າຍ
22,962 ຫຼັງ ໂດຍໃນ​ການ​ສ້ອມ​ແປງ​ຄວາມ​ເສຍ​ຫາຍ​ເຫລົ່າ​ນີ້ ຄາດ​ວ່າ​ຈະ​ຕ້ອງໃຊ້
​ງົບ​ປະ​ມານ​ໃນ​ຂັ້ນ​ເບື້ອງ​ຕົ້ນ ຫລາຍກວ່າ 1,800 ຕື້​ກີບ.

​ທາງ​ດ້ານ​ເຈົ້າ​ໜ້າ​ທີ່ ຂອງ​ອົງ​ການ​ອາ​ຫານແລະ​ການ​ກະ​ເສດ​ແຫ່ງ​ສະ​ຫະ​ປະ​ຊາ​ຊາດ
(FAO) ​ທີ່​ມີສຳ​ນັກ​ງານຢູ່​ບາງກອກ, ປະ​ເທດ​ໄທ ກໍ​ເປີດ​ເຜີຍ​ວ່າ FAO ໄດ້​ປະ​ເມີນ
ເບື້ອງ​ຕົ້ນ​ວ່າ ໄພ​ນ້ຳ​ຖ້ວມຄັ້ງ​ໃຫຍ່​ທີ່​ເກີດ​ຂຶ້ນ​ໃນ​ທົ່ວ​ປະ​ເທດ​ລາວ ເຮັດ​ໃຫ້​ເກີດການ​
ເສຍ​ຫາຍຫຼາຍກວ່າ 1,800 ຕື້​ກີບ ໃນ​ນີ້​ພາກ​ກະ​ສິ​ກຳເສຍ​ຫາຍ 1,260 ຕື້​ກີບ ແລະ
ການ​ທີ່​ຈະ​ຮັບປະ​ກັນໃຫ້​ໄດ້​ວ່າປະ​ຊາ​ຊົນ​ລາວ ຈະ​ບໍ່​ຂາດ​ສະ​ບຽງ​ອາ​ຫານໃນ​ປີ
2019 ກໍ​ຍັງ​ຈະຕ້ອງ​ຊຸກ​ຍູ້​ການ​ປູກ​ພືດລະ​ດູ​ແລ້ງ ໃຫ້​ໄດ້ໃນ​ພື້ນ​ທີ່ 185,000 ເຮັກ​ຕ​າ
ອີກ​ດ້ວຍ.

ເບິ່ງຄວາມເຫັນ (5)

ຟໍຣັມສະແດງຄວາມເຫັນ ກ່ຽວກັບເລື່ອງນີ້ ອັດແລ້ວ

ທ່ານອາດຈະມັກເລື້ອງນີ້ຄືກັນ

XS
SM
MD
LG