ສປປ ລາວ ສົ່ງນັກກິລາ 6 ຄົນແລະຄູເຝິກ 11 ທ່ານໄປຮ່ວມງານມະຫະກຳກິລາໂອລິມປິກ ຄັ້ງທີ 31 ທີ່ປະເທດບຣາຊີລ ຫຼືຣິໂອເກມສ໌ 2016 ເຊິ່ງໄດ້ໄຂຂຶ້ນຢ່າງເປັນທາງການໃນແລງວັນສຸກວານນີ້.
ພວກນັກກິລາ 6 ຄົນດັ່ງກ່າວ ຈະເຂົ້າຮ່ວມໃນການແຂ່ງຂັນກິລາ 4 ປະເພດ ປະກອບດ້ວຍກິລາລົດຖີບ ມີທ້າວອາຣິຍາ ພູນສະຫວັດ ກິລາຢູໂດ ທ້າວສຸພະໄຊ ສິດທິສານ ກິລາລອຍນ້ຳ ທ້າວສັນຕິສຸກ ອິນທະວົງ ແລະນາງສິຣິອາລຸນ ບຸດຈະເລີນ ກິລາແລ່ນແລະລານ ທ້າວອະນຸສອນ ໄຊສາ ແລະ ນາງແລນລີ້ ພຸດທະວົງ.
ພວກນັກກິລາ ແລະຄູເຝິກທັງໝົດແມ່ນຢູ່ພາຍໃຕ້ການນຳພາຂອງທ່ານ ສົມພູ ພົງສາ ລັດຖະມົນຕີຊ່ອຍວ່າການກະຊວງສຶກສາທິການແລະກິລາ ພ້ອມທັງເປັນຮອງປະທານ ແລະເລຂາທິການຄະນະກຳມະການກິລາໂອລິມປິກແຫ່ງ ຊາດຂອງລາວນຳດ້ວຍ.
ທ່ານສົມພູ ກ່າວທີ່ກອງປະຊຸມນັກຂ່າວບໍ່ດົນກ່ອນອອກເດີນທາງໄປຮ່ວມການ ແຂ່ງຂັນທີ່ປະເທດບຣາຊີລວ່າ “ງານມະຫະກຳກິລາໂອລິມປິກຈະສະໜອງໂອ ກາດອັນລ້ຳຄ່າໃຫ້ແກ່ພວກນັກກິລາລາວ ຈະໄດ້ເຝິກຝົນປະສົບພະການ ແລະທົດສອບຄວາມສາມາດໃນການແຂ່ງຂັນຂອງພວກເຂົາເຈົ້າ ເພື່ອໃຫ້ພວກເຂົາເຈົ້າໄດ້ມີການກະກຽມທີ່ດີຂຶ້ນສຳ ລັບການແຂ່ງຂັນທີ່ສຳຄັນໆອື່ນໆໃນອະນາຄົດ.”
ໃນວັນເສົາມື້ນີ້ ນັກກິລາລາວ ຈະເຂົ້າຮ່ວມໃນການແຂ່ງຂັນລົດຖີບ ແລະຢູໂດ. ໃນວັນພະຫັດ ອາທິດຈະມານີ້ ແມ່ນລອຍນ້ຳປະເພດຊາຍແລະວັນສຸກ ແມ່ນ ລອຍນ້ຳປະເພດຍິງ.
ງານມະຫະກຳກິລາໂອລິມປິກຄັ້ງທີ 31 ຈະອັດລົງໃນວັນທີ 21 ສິງຫາ.
