ລິ້ງ ສຳຫລັບເຂົ້າຫາ

ເຈົ້າໜ້າທີ່ລາວວ່າ ຄຸນນະພາບການສຶກສາ ຕໍ່າ ກໍຍ້ອນນັກຮຽນ ຂາດຄວາມຮັບຜິດຊອບ

  • ຊົງຣິດ ໂພນເງິນ

ນັກຮຽນສອບເສັງເກັ່ງໃນລະດັບປະຖົມ, ມັດທະຍົມຕັ້ນ ແລະມັດທະຍົມປາຍປະຈໍາປີ 2010-2011

ເຈົ້າໜ້າທີ່ຂັ້ນສູງໃນກະຊວງສຶກສາທິການແລະກິລາ ຢືນຢັນວ່າ ຄຸນນະພາບດ້ານການ ສຶກສາຕໍ່າໃນລາວ ເປັນຍ້ອນນັກຮຽນ- ນັກສຶກສາຂາດຄວາມຮັບຜິດຊອບ ແລະບໍ່ຫ້າວຫັນ ໃນການສຶກສາຫາຄວາມຮູ້ເພີ້ມເຕີມ.

ເຈົ້າໜ້າທີ່ຂັ້ນສູງໃນກະຊວງສຶກສາທິການແລະ ກິລາ ຊຶ່ງມີປະສົບການໃນດ້ານການ
ພັດທະນາການຮຽນ ແລະ ການສອນໃນລາວມາຢ່າງຍາວນານກວ່າ 30ປີ ໄດ້ໃຫ້
ການຢືນຢັນວ່າ ສາເຫດສໍາຄັນທີ່ເຮັດໃຫ້ການສຶກສາໃນລາວມີຄຸນນະພາບຕໍ່າລົງ
ເລື້ອຍໆນັ້ນ ນອກຈາກຈະເປັນເພາະບັນຫາການຂາດແຄນທາງດ້ານງົບປະມານທີ່
ໄດ້ສົ່ງຜົນກະທົບຕໍ່ເນື່ອງ ເຮັດໃຫ້ເກີດເປັນບັນຫາ ຂາດແຄນຄູແລະອາຈານ ທີ່ມີ
ຄວາມຮູ້ຄວາມສາມາດແລ້ວ ກໍຍັງມີສາເຫດທີ່ສໍາຄັນອີກປະການນຶ່ງມາຈາກບັນດາ
ນັກຮຽນ-ນັກສຶກສາອີກດ້ວຍ.

ທັງນີ້ກໍເນື່ອງຈາກວ່ານັກຮຽນ-ນັກສຶກສາຂອງລາວໃນປະຈຸບັນນີ້ ສ່ວນຫຼາຍແລ້ວ ຕ່າງ
ກໍລ້ວນແຕ່ຂາດຄວາມຮັບຜິດຊອບໃນການປະຕິບັດໜ້າທີ່ຂອງພວກຕົນ ແລະບໍ່ມີຄວາມ
ຫ້າວຫັນໃນການສຶກສາ ຫາຄວາມຮູ້ເພີ່ມເຕີມອີກດ້ວຍ ດັ່ງທີ່ເຈົ້າໜ້າທີ່ຂັ້ນສູງຂອງລາວ ໄດ້ໃຫ້ການອະທິບາຍເຖິງສະພາບການ ດັ່ງກ່າວນີ້ວ່າ:

ຄວາມກະຕືລືລົ້ນຂອງລູກຫຼານພວກເຮົາຕໍ່ການຮໍ່າຮຽນໃນປະຈຸບັນນີ້ ຕາມ
ອາຈານສັງເກດຕີລາຄານັ້ນ ຄວາມເປັນເຈົ້າຫ້າວຫັນ ມັນບໍ່ໄດ້ເທົ່າທີ່ຄວນເນາະ ຄວາມຮັບຜິດຊອບໃນຕົວຂອງເຂົາເຈົ້າເອງນັ້ນ ບໍ່ໄດ້ດີປານໃດ ສ່ວນຫຼາຍແລ້ວ ມັນໃຫ້ແຕ່ຄູ-ອາຈານເປັນຜູ້ບັງຄັບ
ຫຼືວ່າຊີ້ນໍາຫຼາຍກວ່າ ຄວາມຕັດສິນໃຈຂອງ
ເຂົາເຈົ້ານັ້ນ ບໍ່ສູງນະ ນັກຮຽນ
.

ທ່ານຄໍາພອນ ໄຊຊົມພູ ຜູ້ວ່າການແທນຫົວໜ້າກົມຄຸ້ມຄອງ ການສຶກສາເອກະຊົນ ມອບໃບປະກາດໃຫ້ແກ່ນັກສຶກສາ ທີ່ຮຽນຈົບຈາກວິທະຍາໄລ ໄຊພັດທານ
ທ່ານຄໍາພອນ ໄຊຊົມພູ ຜູ້ວ່າການແທນຫົວໜ້າກົມຄຸ້ມຄອງ ການສຶກສາເອກະຊົນ ມອບໃບປະກາດໃຫ້ແກ່ນັກສຶກສາ ທີ່ຮຽນຈົບຈາກວິທະຍາໄລ ໄຊພັດທານ

ກ່ອນໜ້ານີ້ ທ່ານ ທອງສິງ
ທໍາມະວົງ, ນາຍົກລັດຖະ
ມົນຕີລາວໄດ້ຖະແຫຼງຍອມ
ຮັບວ່າ ​ບັນຫາທີ່ເປັນອຸປະ
ສັກຕໍ່ພັດທະນາ​ທາງດ້ານ
ການ​ສຶກສາຢູ່ໃນລາວ
ຫລາຍທີ່ສຸດ ໃນປັດຈຸບັນ
ກໍຄືບັນຫາການ​ຂາດ​ແຄນ
​ທາງ​ດ້ານ​ງົບປະມານ ເຖິງ
ແມ່ນວ່າ ສະພາແຫ່ງຊາດ
ຈະໄດ້ລົງມະຕິ ຮັບຮອງ
ເອົາແຜນຍຸດທະສາດການ
ປະຕິຮູບການສຶກສາແຫ່ງຊາດລາວເຖິງປີ 2015 ຢ່າງເປັນທາງການແລ້ວກໍຕາມ ຫາກ
ແຕ່ວ່າ ຍ້ອນຂໍ້ຈໍາກັດ​ທາງ​ດ້ານ​ງົບປະມານ ກໍໄດ້ສົ່ງຜົນກະທົບຕໍ່ການປະຕິບັດແຜນ
ຍຸດທະສາດດັ່ງກ່າວ ຢ່າງຫລີກລ່ຽງບໍ່ໄດ້.

ທັງນີ້ພາຍໃຕ້ແຜນຍຸດທະສາດດັ່ງກ່າວ ລັດຖະບານລາວໄດ້ວາງເປົ້າໝາຍທີ່ຈະຂະ
ຫຍາຍໂອກາດທາງດ້ານການສຶກສາ ເພື່ອຄົນລາວທຸກຄົນ ໂດຍສະເພາະແມ່ນການ
ຂະຫຍາຍໂອກາດດ້ານການສຶກສາ ໄປສູ່ເຂດຊົນນະບົດໃຫ້ໄດ້ຢ່າງທົ່ວເຖິງ ໃນທົ່ວປະ
ເທດ ພ້ອມທັງຈະດໍາເນີນການພັດທະນາຄຸນນະພາບໃນດ້ານການສຶກສາຂອງບັນດາ
ນັກຮຽນແລະນັກສຶກສາ ໃນທຸກລະດັບໃຫ້ໄດ້ມາດຕະຖານໃນລະດັບດຽວກັນ ກັບ
ບັນດາປະເທດສະມາຊິກໃນກຸ່ມອາຊ່ຽນນໍາກັນໃຫ້ໄດ້ຢ່າງເປັນຮູບປະທໍາອີກດ້ວຍ.

ຫາກແຕ່ວ່າ ລະດັບຄຸນນະພາບການສຶກສາຂອງບັນດານັກຮຽນ ແລະນັກສຶກສາໃນ
ລາວນັ້ນ ຍັງຕໍ່າຫລາຍ ​ເມື່ອ​ທຽບກັບບັນດາປະ​ເທດສະມາຊິກ​ໃນ​ກຸ່ມ​ອາຊຽນ​ດ້ວຍ​ກັນ
ເຖິງ​ແມ່ນ​ວ່າ​ໃນ​ປີ 2011 ທີ່ຜ່ານມາ ​ລາວ​ຈະມີ​ໂຮງຮຽນ​ປະຖົມ​ຢູ່​ 94% ຂອງ​ຈໍານວນ
ໝູ່​ບ້ານ​ທັງ​ໝົດ​ໃນ​ທົ່ວ​ປະເທດ ແລະ​ໃນຂະນະ​ດຽວ​ກັນ ​ກໍ​ເຮັດ​ໃຫ້ 91.6% ຂອງເດັກ
ນ້ອຍໃນ​ໄວ​ຮຽນທັງ​ໝົດ​ ມີ​ໂອກາດ​ໄດ້​ຮຽນ​ໜັງສື​ໃນ​ລະດັບ​ປະ​ຖົມ. ແລະ 68% ກໍ​ໄດ້​
ຮຽນ​ຈົນຈົບ​ມັດທະຍົມຕົ້ນກໍ​ຕາມ ຫາກ​ແຕ່​ວ່າໂອກາດໃນ​ການ​ໄດ້​ຮຽນ​ລະດັບ​ມັດທະ
ຍົມປາຍ​ແລະ​ລະດັບ​ປະລິນຍາ​ຕີນັ້ນ ກໍ​ຍັງ​ຄົງ​ມີ​ອັດຕາສະ​ເຫລ່ຍທີ່​ຕໍ່າ​ຫລາຍເມື່ອທຽບ
ໃສ່ ຈໍານວນປະຊາກອນທັງໝົດ.

ນັກຮຽນໃນຫ້ອງຮຽນລາວແຫ່ງນຶ່ງ
ນັກຮຽນໃນຫ້ອງຮຽນລາວແຫ່ງນຶ່ງ

ຍິ່ງ​ໄປ​ກວ່າ​ນັ້ນ ການ​ທີ່​ທາງ
​ການ​ລາວ​ໄດ້​ດໍາ​ເນີນ​ການ​
ປະຕິຮູບທາ​ງດ້ານ​ການ​ສຶກ
ສາ ​ດ້ວຍການເພີ່ມ​ປີ​ຮຽນ
ສໍາລັບຂັ້ນມັດທະຍົມ​ຕົ້ນ​ຂຶ້ນ
ອີກ 1 ປີ ຊຶ່ງກໍ​ເປັນ​ຜົນເຮັດ
​ໃຫ້ການ​ຮຽນໃນລະດັບ​ມັດ
ທະຍົມ​ຕົ້ນ​ ຈະ​ຕ້ອງ​ໃຊ້​ເວລາ
​ເພີ່ມ​ຂຶ້ນຈາກ​ເດີມ 3 ປີ ​ເປັນ
4 ປີ. ສ່ວນການ​ຮຽນ​ໃນ​ລະ
ດັບ​ປະ​ຖົມ​ກໍຍັງ​ຄົງຕ້ອງ​ໃຊ້​
ເວລາ 5 ປີ ​ແລະ​ມັດທະຍົມ
ປາຍ 3 ປີ​ເຊັ່ນເດີມນັ້ນ ກໍ​ຍັງ
ມີຄວາມແຕກ​ຕ່າງ​ກັບ​ປະ​ເທດ
​ອື່ນໆ​ ໃນ​ກຸ່ມອາ​ຊ່ຽນດ້ວຍ​ກັນ​ ເພາະວ່າ​ໃນ​ລະດັບປະຖົມ​ນັ້ນ ປະ​ເທດ​ສ່ວນ​ໃຫຍ່ຈະ​ມີ
​ການ​ຮຽນ​-ການ​ສອນ ເປັນ​ເວລາ 6 ປີ ຫາກ​ແຕ່​ຢູ່​ໃນ​ລາວ​ກໍ​ຍັງ​ຄົງ​ເປັນ 5 ປີ ​ເຊັ່ນເດີ​ມ
ໂດຍ​ເຊື່ອ​ວ່າ​ມີ​ສາເຫດ​ສໍາຄັນ ​ມາ​ຈາກ​ຂໍ້​ຈໍາ​ກັດ​ໃນ​ດ້ານ​ງົບປະມານ​ລາຍ​ຈ່າຍຂອງລັດຖະ
ບານ​ລາວນັ້ນ​ເອງ.

ຊຶ່ງການ​ຂາດ​ແຄນ​ທາງ​ດ້ານ​ງົບປະມານ​ດັ່ງກ່າວ ກໍ​ຍັງເຮັດ​ໃຫ້ການ​ພັດທະນາດ້ານການ
ສຶກສາ ມີ​ຄວາມ​ແຕກໂຕນ​ກັນ​ຢ່າງ​ຫລວງຫລາຍ​ລະຫວ່າງ​ເຂດ​ໃນເມືອງ​ກັບເຂດ​ຊົນນະບົດ
ທັງນີ້ກໍເພາະ​ວ່າ ​ງົບປະມານ​ສໍາລັບ​ພັດທະນາ​ການ​ສຶກສາ​ຍັງ​ຄົງ​ບໍ່​ຕົກ ໄປ​ເຖິງ​ເຂ​ດຊົນນະ
ບົດ​ຢ່າງ​ແທ້​ຈິງ.

​ສໍາລັບ​ເປົ້າໝາຍຂອງ​ລັດຖະບານ​ລາວ ​ນັບ​ຈາກ​ປີນີ້ໄປ​ຈົນເຖິງ​ປີ 2015 ກໍ​ຄືການ​ເພີ່ມງົບ
ປະມານ​ ສໍາລັບ​ການ​ພັດທະນາ​ການ​ສຶກສາ​ໃຫ້​ເປັນ​ລະຫວ່າງ 18-20% ຂອງງົບປະມານ
​ລາຍ​ຈ່າຍ​ທັງໝົດໃນ​ແຕ່ລະ​ປີ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG