ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ເສດຖະກິດແຂວງສະຫວັນນະເຂດ ມີການຂະຫຍາຍຕົວສູງກ່ວາ 10%


ແຜນຜັງຂອງເຂດເສດຖະກິດພິເສດ ສະຫວັນ-ເຊໂນ
ແຜນຜັງຂອງເຂດເສດຖະກິດພິເສດ ສະຫວັນ-ເຊໂນ

ເຈົ້າ​ແຂວງ​ສະຫວັນ​ນະ​ເຂດ​ຢືນຢັນ​ວ່າ ການ​ຂະຫຍາຍຕົວ​ທາງ​ເສດຖະກິດ​ ໃນ​ອັດຕາສະ​ເລ່ຍລະຫວ່າງ 11-12% ຕໍ່​ປີ​ ຈະ​ທໍາ​ໃຫ້​ລາຍ​​ໄດ້​ສະ​ເລ່ຍຂອງ​ປະຊາຊົນ​ລາວ​ໃນ​ແຂວງ​ ເພີ່ມ​ຂຶ້ນ​ເປັນ 1,705 ​ໂດ​ລາ​ຕໍ່​ຄົນ​ໃນ​ປີ 2015. ສ່ວນ​ບັນຫາ​ຄວາມ​ຍາກຈົນ​ຂອງ​ປະຊາ​ຊົນ ​ກໍ​ລົດ​ລົງ​ຢ່າງ​ຕໍ່​ເນຶ່ອງ​ເຊັ່ນ​ດຽວ​ກັນ.

ທ່ານວິ​ໄລ​ວັນ​ ພົມ​ເຂ ​ເຈົ້າ​ແຂວງ​ແລະ​ເລຂາ​ພັກ​ແຂວງ​ສະຫວັນ​ນະ​ເຂດ ​ໄດ້​ຖະ​ແຫລ​ງຢືນຢັນ​ຕໍ່​ກອງ​ປະຊຸມ​ໃຫຍ່ ຄັ້ງ​ທີ່ 7 ຂອງ​ພັກ​ປະຊາຊົນ​ປະຕິວັດ​ລາວ ​ປະຈຳແຂວງ​ສະຫວັນ​ນະ​ເຂດ​ ວ່າ​ເສດຖະກິດ​ຂອງ​ແຂວງ​ໄດ້​ມີ​ການ​ຂະຫຍາ​ຍຕົວ​ເພີ່ມ​ຂຶ້ນຢ່າງ​ຕໍ່​ເນຶ່ອງ​ ໃນ​ຕະຫລອດ​ໄລຍະ 5 ປີ​ທີ່​ຜ່ານ​ມາ ຊຶ່ງ​ກໍ​ໄດ້​ເປັນ​ຜົນ​ເຮັດ​ໃຫ້​ຍອດ​ຜະລິດ​ຕະພັນ ລວມ ຫລື GDP ຂອງ​ແຂວງ​ໃນ​ປີ​ 2010 ນີ້ ​ມີ​ມູນ​ຄ່າ​ ລວ​ມ​ເກືອບ 7,000 ຕື້​ກີບ ​ໂດຍ​ສາມາດໄລ່​ສະ​ເລ່ຍ​ເປັນ ລາຍ​ຮັບ​ຂອງ​ປະຊາຊົນ​ໃນ​ແຂວງ​ ໄດ້​ເກີນກວ່າ 7 ລ້ານ​ກີບຫລື 897 ​ໂດ​ລາ​ຕໍ່ຄົນ​ຕໍ່​ປີ ດັ່ງ​ທີ່​ທ່ານ​ວິ​ໄລ​ວັນໄດ້ຖະ​ ແຫລ​ງຊີ້​ແຈງ​ໃນ​ຕອນ​ນຶ່ງ​ວ່າ:

“ຄາດໝາຍ​ປີ 2009-2010 ນີ້ ພວກ​ເຮົາ​ບໍ່​ໃຫ້​ຫລຸດ 13% ​ໂດຍ​ມູນ​ຄ່າ GDP ຄິດ​ສະ​ເລ່ຍຕໍ່​ຫົວ​ຄົນໆ​ນຶ່ງ​ ບໍ່​ໃຫ້ຫລຸດ 8 ລ້ານ​ກີບ ​ແລະ​ດຽວ​ນີ້​ພວກ​ເຮົາ​ປະຕິບັດ​ໄດ້​ແລ້ວ 7 ລ້ານ​ 6 ​ແສນ​ປາຍ​ນີ້​ຫລະ.”

ພ້ອມ​ກັນນີ້ ທ່ານ​ວິໄລ​ວັນ ກໍ​ຍັງ​ໄດ້​ສະ​ແດງ​ຄວາມ​ເຊື່ອ​ໝັ້ນ​ດ້ວຍ​ວ່າ​ສໍາ​ຫລັບ​ໃນ​ໄລຍະ 5 ປີ ຕໍ່​ໄປ​ນີ້ ​ການ​ຂະຫຍາ​ຍຕົວ​ທາ​ງ​ເສດຖະກິດ ​ໃນ​ອັດຕາ​ສະ​ເລ່ຍລະຫວ່າງ 11-12% ຕໍ່​ປີ ຈະ​ເຮັດ​ໃຫ້​ລາຍ​ໄດ້​ສະ​ເລ່ຍຂອງ​ປະຊາຊົນ​ໃນ​ແຂວງ​ເພີ່ມ​ຂຶ້ນ​ເປັນ 1,705 ​ໂດ​ລາຕໍ່​ຄົນ​ພາຍ​ໃນ ​ປີ 2015 ຫລື​ເພີ່ມ​ຂຶ້ນຈາກ​ປີ 2005 ຄິດ​ເປັນ​ອັດຕາສ່ວນ​ທີ່​ສູງ​ກວ່າ 3 ​ເທົ່າ​ຕົວ ຊຶ່ງ​ດ້ວຍ​ ສະພາບ​ການ​ດັ່ງກ່າວ​ນີ້ ກໍ​ຍັງໄດ້​ເປັນ​ຜົນ​ໃຫ້​ອັດ​ຕາສະ​ເລ່ຍຄວາມ​ຍາກຈົນ​ຂອງ​ປະຊາຊົນໃນ​ແຂວງ ລົດ​ລົງ​ຢ່າງ​ຕັ້ງໜ້າ​ອີກ​ດ້ວຍ. ​ໂດຍ​ການ​ສໍາ​ຫລວດ​ກໍ​ພົບ​ວ່າ ​ຈໍານວນ​ປະຊາຊົນ​ທີ່​ຍາກ ຈົນ​ໃນ​ແຂວງ​ ໄດ້​ລົດ​ລົງ​ຈາກ 24,965 ຄອບຄົວ​ໃນ​ປີ 2005 ມາ​ເປັນ 12,133 ຄອບຄົວ​ ໃນ​ປີ 2010 ນີ້ ​ແລະ​ກໍ​ເຊື່ອ​ວ່າ​ຈະ​ລົດ​ລົງ​ມາເຫລືອ ບໍ່​ເກີນ 5,513 ຄອບຄົວ​ ໃນ​ປີ​ 2015 ອັນ​ຈະ​ເປັນ​ຜົນ​ໃຫ້​ແຂວງ​ສະຫວັນ​ນະ​ເຂດ​ ກາຍ​ເປັນ​ແຂວງ​ທີ່​ສາມາດ​ລົບ​ລ້າງ​ບັນຫາ​ຄວາມ​ຍາກຈົນ​ໄດ້ ​ຢ່າງ​ແທ້​ຈິງ​ໃນ​ປີ 2020 ນັ້ນ​ເອງ.

ຍິ່ງ​ໄປ​ກວ່າ​ນັ້ນ ທາງ​ການ​ແຂວງ​ສະຫວັນ​ນະ​ເຂດ​ຍັງ​ໄດ້​ຄາດ​ຫວັງ​ດ້ວຍ​ວ່າ​ ເຂດ​ເສດຖະກິດ​ ພິ​ເສດ​ສະຫວັນ​ເຊ​ໂນ ຈະ​ມີ​ສ່ວນ​ຢ່າງ​ສໍາຄັນ​ໃນ​ການ​ຊ່ວຍ​ລົບ​ລ້າງ​ບັນຫາ​ຄວາມ​ຍາກຈົນ​ດັ່ງ ກ່າວ ທັງ​ນີ້​ດ້ວຍ​ການ​ດຶງ​ດູດ​ເອົາ​ການ​ລົງທຶນຈາກ​ຕ່າງປະ​ເທດ ​ເຂົ້າມາ​ໃນ​ເຂດ​ເສ​ດຖະກິດ​ພິ​ເສດ​ແລ້ວ ຈຳ​ນວນ 16 ບໍລິສັດ​ດ້ວຍ​ກັນ ​ແລະ​ຍັງມີ​ອີກ 7 ບໍລິສັດ​ທີ່​ໄດ້​ສະ​ແດງ​ຄວາມ​ຕ້ອງການ ​ທີ່​ຈະ​ລົງທຶນ​ຢູ່​ໃນ​ເຂດເສດຖະກິດ​ພິ​ເສດ ​ໃນ​ດ້ານ​ອຸດສາຫະກໍາ​ແປ​ຮູບ​ອາຫານ ​ໂຮງງານ​ປະກອບ​ລົດຍົນ ​ໂຮງງານ​ຜະລິດ​ຊິ້ນ​ສ່ວນ​ເຮືອບິນ ​ໂຮງງານ​ຜະລິດ​ໂມງ​ແລະໂຮງ ງານ​ຜະລິດເຄຶ່ອງ​ເພັດ​ພອຍ ​ເປັນຕົ້ນ.

ທາງ​ດ້ານ​ທ່ານ ພະນົມ​ກອນ ດາລາ​ລັດ​ສະໝີ ຜູ້​ອໍານວຍ​ການ​ຝ່າຍ​ກົດໝາຍ ​ແລະ​ສົ່ງ​ເສີມ​ ການ​ລົງທຶນ​ໃນ​ເຂດເສດຖະກິດ​ພິ​ເສດ ກໍ​ໄດ້​ຖະ​ແຫລ​ງຊີ້​ແຈ​ງວ່າ ຖ້າ​ຫາກ​ບໍ່​ເກີດ​ບັນຫາ​ວິ​ກິດ ​ການ​ທາງ​ການ​ເງິນ​ໂລກ​ຂຶ້ນນັບ​ແຕ່​ປີ 2008​ ​ເປັນ​ຕົ້ນ​ມາ​ນັ້ນ ກໍ​ເຊື່ອ​ວ່າ​ຈະ​ມີ​ບໍລິສັດຕ່າງ​ຊາດ​ຫລາຍ​ກວ່າ 40 ບໍລິສັດ​ແລ້ວ ​ທີ່​ຈະ​ເຂົ້າມາ​ລົງທຶນ​ຢູ່​ໃນ​ເຂດ​ເສດຖະກິດ​ພິ​ເສດ ຫາກ​ແຕ່​ວ່າ ​ເມື່ອ​ເກີດ​ບັນຫາ​ວິ​ກິດ​ການ​ທາງການ​ເງິນ​ຂຶ້ນ ​ກໍ​ໄດ້​ເປັນຜົນ​ເຮັດ​ໃຫ້​ບໍລິສັດຕ່າງ​ຊາດ​ສ່ວນ​ໃຫຍ່​ ຕ້ອງ​ພາກັນ​ໂຈ໋ະ​ແຜນການ​ລົງທຶນ​ທຸກ​ມື້​ນີ້.

ແຕ່​ຢ່າງ​ໃດ​ກໍ​ຕາມ ທາງ​ການ​ລາວ​ກໍ​ເຊື່ອ​ໝັ້ນ​ວ່າ ​ບັນຫາເຫລົ່າ​ນີ້​ຈະ​ໝົດ​ໄປ ​ເມື່ອ​ເສດ​ຖະກິດ​ ໂລກ​ໄດ້​ຮັບ​ການ​ຟື້ນຟູ ​ໃຫ້ກັບ​ຄືນ​ສູ່​ສະພາວະ​ປົກກະຕິ​ໃນ​ໝໍ່ໆ​ນີ້ ​ແລະ​ໃນ​ຂະນະ​ດຽວ​ກັນ ການ​ປະຕິບັດ​ດໍາ​ລັດ​ຂອງ​ນາ​ຍົກ​ລັດຖະມົນຕີລາວ​ ວ່າ​ດ້ວຍ​ລະບົບ​ໃຫ້​ບໍລິການ​ແບບ​ປະຕູ​ດຽວ ຫລື One-Stop Service ຢູ່ເຂດ​ເສ​ດຖະກິດ​ພິ​ເສດ​ນັ້ນ ກໍ​ຈະ​ມີ​ການ​ປະຕິບັດ​ຢ່າງ​ຄົບ​ຖ້ວນ​ ພາຍ​ໃນ​ທ້າຍ​ປີ​ນີ້​ດ້ວຍ​ແລ້ວ ກໍ​ຍິ່ງ​ເຮັດ​ໃຫ້​ທາງ​ການ​ລາວ​ເຊື່ອ​ໝັ້ນ​ວ່າ​ ບໍລິສັດ​ຕ່າງຊາດຈະ​ພາ ກັນ​ເຂົ້າມາ​ລົງທຶນ​ໃນ​ເຂດເສດຖະກິດ​ພິ​ເສດ​ ຫລາຍ​ຂື້ນ​ນັບ​ມື້​.

XS
SM
MD
LG