ລິ້ງ ສຳຫລັບເຂົ້າຫາ

ລາວ​ຊຸກຍູ້​ກະ​ເສດ​ຕະກອນ​ລາວ​​ໃຫ້ປູກເຂົ້າ ນາປີແລະ​ນາ​ແຊງ​ ເພື່ອ​ເພີ່ມ​​ຜົນ​ຜະລິດ

  • ຊົງຣິດ ໂພນເງິນ

ທ່ານ ບົວສອນ ບຸບຜາວັນ, ນາຍົກລັດຖະມົນຕີ ລາວ

ລັດຖະບານ​ລາວ​ຈະ​ຊຸກຍູ້​ກະ​ເສດ​ຕະກອນ​ລາວ​ໃຫ້​ປູກ​ເຂົ້ານາປີ​ແລະ​ນາ​ແຊງ​ ເພື່ອ​ເພີ່ມ​ພູນ​ຜົນ​ຜະລິດ​ເຂົ້າ​ໃນ​ທົ່ວປະ​ເທດ​ໃຫ້​ໄດ້​ເຖິງ 3.38 ລ້ານ​ຕັນ​ໃນ​ລະ​ດູການ​ປະ​ຈໍາປີ 2010-2011 ນີ້ ​ໂດຍ​ຄາດໝາຍ​ວ່າ​ແຂວງ​ສະຫວັນ​ນະ​ເຂດ ​ກໍ​ຍັງ​ຄົງ​ເປັນ​ແຂວງ​ທີ່​ມີ​ຜົນ​ຜະລິດ​ເຂົ້າຫລາຍ​ ທີ່​ສຸດ​ໃນ​ລາວ.

ທ່ານ​ບົວ​ສອນ ບຸນ​ຜາ​ວັນ ນາຍົກລັດຖະມົນຕີລາວ​ໄດ້​ຖະ​ແຫລ​ງຕໍ່​ກອງ​ປະຊຸມ​ເພື່ອ​ການ​ເຜີຍ​ແຜ່​ການ​ພັດທະນາ ​ເສດຖະກິດ​ແລະ​ສັງຄົມ​ແຫ່ງ​ຊາດ​ປະ​ຈໍາປີ 2010-12011 ​ເມື່ອ​ບໍ່​ນານ​ມາ​ນີ້​ຢູ່​ນະຄອນ​ວຽງ​ຈັນ​ວ່າ​ ເປົ້າໝາຍ​ສູ້​ຊົນ ທີ່​ສໍາຄັນ​ທີ່​ສຸດ​ປະການ​ນຶ່ງ​ຂອງ​ລັດຖະບານ​ລາວ​ໃນ​ການ​ປະຕິບັດ​ແຜນການ​ດັ່ງກ່າວ​ນີ້​ກໍ​ຄື​ການ​ຊຸກຍູ້​ແລະ​ສົ່ງ​ເສີມ ​ໃຫ້​ກະ​ເສດຕະ​ກອນ​ລາວໃນ​ທົ່ວ​ປະ​ເທດ​ທໍາ​ການ​ປູກ​ເຂົ້ານາປີ​ແລະ​ນາ​ແຊງ​ເພື່ອ​ເຮັດ​ໃຫ້​ໄດ້ຜົນ​ຜະລິດ​ລວມບໍ່​ໜ້ອຍ​ກວ່າ 3,35 ລ້ານໂ​ຕນ.

ຖ້າ​ຫາກ​ວ່າ​ສາມາດ​ປະຕິບັດ​ໄດ້​ຈິງ​ຕາມ​ເປົ້າໝາຍ​ທີ່​ວາງ​ໄວ້​ດັ່ງກ່າວ​ ກໍ​ຈະ​ເປັນ​ຜົນ​ເຮັດໃຫ້​ ລາວມີ​ຜົນ​ຜະລິດເຂົ້າ​ເກີນລະດັບ​ຄວາມ​ຕ້ອງການ​ບໍລິ​ໂພ​ກພາຍ​ໃນ​ປະ​ເທດ​ໃນ​ປະລິມານ​ ລວມ​ເກີນ 8 ​ແສນ​ຕັນ​ສໍາ​ລັບ​ສົ່ງອອກ​ໄປຕ່າງປະ​ເທດ​ ທັງ​ນີ້​ໂດຍ​ແຂວງ​ສະຫວັນ​ນະ​ເຂດ​ ກໍຍັງ​ຄົງ​ເປັນ​ແຂວງ​ທີ່​ຜະລິດ​ເຂົ້າ​ໄດ້​ຫລາຍ​ທີ່​ສຸດ​ໃນ​ລາວ ດັ່ງ​ທີ່​ເຈົ້າໜ້າ​ທີ່ຂັ້ນ​ສູງ​ ໃນ​ແຂວງ​ສະຫວັນ​ນະ​ເຂດ​ໄດ້​ໃຫ້ການ​ຢືນຢັນ​ວ່າ:

“ສໍາລັບ​ແຂວງ​ສະຫວັນ​ນະ​ເຂດ​ແລ້ວ ການ​ຜະລິດ​ເຂົ້າ​ເພື່ອ​ການ​ບໍລິ​ໂພ​ກນີ້​ ກໍ​ຖື​ວ່າ​ພຽງພໍ​ ຈົນ​ກ່າວ​ໄດ້​ວ່າ​ໄດ້​ມີ​ການ ສົ່ງ​ເສີມ​ການ​ຜະລິດ​ໃຫ້​ເປັນ​ສິນຄ້າ​ແລ້​ວ​ໃນ​ປັດຈຸ ບັນ​ນີ້ ​ເພາະວ່າ​ຄິດ​ໄລ່​ເຂົ້າກິນ​ຕໍ່​ຫົວ​ຄົນ​ກໍ​ແມ່ນ​ຕົກ​ຢູ່​ໃນ 780 ​ກິໂລ​ກໍາ​ຕໍ່​ຄົນ​ຕໍ່​ປີ ​ແລະ​ໃນ​ປີ​ນີ້​ກໍ​ຄາດໝາຍ​ວ່າ​ເຂົ້າຈະ​ເຫລືອ​ກິນ​ຢູ່​ປະມາ​ນ 3 ​ແສນ​ກວ່າ​ຕັນ. ສະນັ້ນ ສໍາລັບ​ແຂວງສະຫວັນ​ນະ​ເຂດ​ນີ້​ ຈຶ່ງ​ບໍ່​ມີ​ບັນຫາ​ສໍາ​ລັບ​ການ​ບໍລິໂພ​ກ​ເຂົ້າ.”

ພໍ່ນາປູກເຂົ້າຢູ່ລາວ.
ພໍ່ນາປູກເຂົ້າຢູ່ລາວ.

ແຕ່​ຢ່າງ​ໃດ​ກໍ​ຕາມ ​ໄພ​ທໍາ​ມະ ​ຊາດ​ໂດຍ​ສະ​ເພ​າະ​ແມ່ນ​ໄພ​ແຫ້ງ​ແລ້ງ​ແລະ​ໄພ​ນໍ້າ​ຖ້ວມ​ ກໍ​ຍັງ​ນັບ​ ເປັນ​ປັດ​ໃຈ ​ທີ່​ຈະ​ເຮັດ​ໃຫ້ລັດຖະ ບານລາວ​ບໍ່​ສາມາດ​ທີ່​ຈະ​ບັນລຸ​ເປົ້າໝາຍ​ດັ່ງກ່າວ​ໄດ້​ເຊັ່ນ​ກັນ ດັ່ງ​ກໍລະນີ​ທີ່​ເກີດ​ຂຶ້ນ​ໃນ​ປີ 2009​ ກໍ​ຄື​ພາຍຸ​ເກດສະໜາ​ທີ່​ບໍ່​ພຽງ​ແຕ່​ຈະ​ສົ່ງ​ຜົນ​ກະທົບຢ່າງ​ ໜັກ ​ຕໍ່​ປະຊາຊົນ​ໃນແຂວງ​ເຊ​ກອງ ອັດ​ຕະປື ​ແລະ​ຈໍາປາ​ສັກເທົ່ານັ້ນ ຫາກ​ແຕ່​ພາຍຸ​ດັ່ງກ່າວ​ນີ້​ກໍ​ຍັງ​ເຮັດໃຫ້ການ​ຜະລິດ​ເຂົ້າ​ໃນ​ລາ​ວ​ ໄດ້​ຕໍ່າ​ກວ່າ​ເປົ້າໝາຍ​ທີ່​ວາງ​ໄວ້ ​ເຖິງ 2 ​ແສນ​ກວ່າ​ຕັນ​ອີກ​ດ້ວຍ.

ທາງ​ດ້ານ​ທ່ານນາງ ມົນ​ທາ​ທິບ ຈັນ​ເພັງ​ໃຊ ຫົວໜ້າ​ກົມ​ກະສິກໍາ ກະຊວງ​ກະສິກໍາ-ປ່າ​ໄມ້​ ກໍ ໄດ້​ຖະ​ແຫລ​ງຢືນຢັນວ່າ ຄວາມ​ໝັ້ນຄົງ​ດ້ານ​ສະບຽງ​ອາຫານ​ຂອງ​ປະຊາຊົນ​ລາວ​ກໍາລັງ​ປະ ​ເຊີນ​ກັບ​ບັນຫາ​ທ້າ​ທາຍ​ທີ່​ສໍາຄັນ​ທີ່​ສຸດ​ອີກປະການ​ນຶ່ງ ຊຶ່ງ​ກໍ​ຄື​ການ​ປ່ຽນ​ສະພາບ​ທີ່​ນາ​ແລະ​ພື້ນ​ທີ່​ການ​ກະ​ເສດ​ໄປ​ເປັນ​ເຂດ​ທີ່ຢູ່​ອາ​ໃສ​ຫລາຍ​ຂຶ້ນນັບ​ມື້ ​ໂດຍສ​ະ​ເພາະ​ແມ່ນພື້ນ​ທີ່​ການ​ກະ​ເສດ​ທີ່ຢູ່ໄກ້​ເຂດ​ຕົວ​ເມືອງ​ໃຫຍ່​ ແລະ​ທີ່ຢູ່​ແຄມ​ທາງ​ນັ້ນ​ ນັບເປັນພື້ນ​ທີ່​ການ​ກະ​ເສດ​ທີ່ຖືກ​ປ່ຽນສະ ພາບ​ໄປ​ເປັນ​ເຂດ​ທີ່ຢູ່​ອາ​ໃສ ​ເພີ່ມ​ຂຶ້ນຢ່າງ​ວ່ອງ​ໄວທີ່​ສຸດ.

ທັງ​ນີ້​ໂດ​ຍ​ເປັນ​ຜົນ​ທີ່​ສືບເນື່ອງມາ​ຈາກ​ການ​ເພີ່ມ​ຂຶ້ນຂອງ​ໂຄງການ​ລົງທຶນ​ຕ່າງໆ​ ທີ່​ເຮັດ​ໃຫ້​ມີ ​ການ​ອົບ​ພະຍົບຂອງປະຊາຊົນ​ ຈາກ​ເຂດ​ຊົນນະບົດ​ເຂົ້າມາ​ຢູ່​ໃນ​ເຂດ​ເມືອງ​ຫລາຍ​ຂຶ້ນ​ເລື້ອຍໆ​ ແລະ​ໃນ​ເມື່ອ​ເຂດ​ຕົວ​ເມືອງ​ມີ​ປະຊາກອນ​ເພີ່ມ​ຫລາຍ​ຂຶ້ນ ກໍ​ເຮັດ​ໃຫ້​ຕ້ອງ​ມີ​ການ​ກໍ່ສ້າງ​ທີ່ຢູ່​ອາ​ໃສ​ເພີ່ມ​ຂຶ້ນນັ້ນ​ເອງ. ພ້ອມ​ກັນ​ນີ້​ທ່ານ​ນາງ​ມົນ​ທາ​ທິບ ຍັງ​ໄດ້​ຢືນຢັນ​ດ້ວຍ​ວ່າ ​ສາ​ເຫດສໍາຄັນ​ອີກ​ປະການ​ນຶ່ງ ​ທີ່​ຈະ​ເຮັດ​ໃຫ້​ຄວາມ​ໝັ້ນຄົງ​ດ້ານ​ສະບຽງ​ອາຫານ​ໃນ​ລາວ​ລົດ​ລົງນັບ​ມື້​ນັ້ນ ​ກໍ​ຄື​ການ​ທີ່​ຍັງ​ຄົງ​ບໍ່​ມີ​ການ​ກໍານົດ​ພື້ນ​ທີ່​ການ​ກະ​ເສດ​ແລະ​ເຂດ​ທີ່ຢູ່​ອາ​ໃສ​ໃນ​ລາວ​ຢ່າງ​ແຈ່ມ​ແຈ້ງ ​ໃນ​ຂະນະ​ທີ່ການ​ກໍ່ສ້າງ​ທີ່ຢູ່​ອາ​ໃສ​ຂອງ​ປະຊາຊົນ​ສ່ວນ​ໃຫຍ ່​ກໍ​ບໍ່​ໄດ້​ມີ​ການຂໍອະນຸຍາດ​ຢ່າງ​ຖືກ ຕ້ອງ.

ເມື່ອ​ປະກ​ອບກັບ​ການ​ຂະ​ຫຍາ​ຍຕົວ​ຫລາຍ​ຂຶ້ນຂອງ​ພາກ​ທຸລະ​ກິດ​ອະສັງຫາລິມະ​ຊັບ​ໃນ​ລາວ ​ທີ່​ເຮັດ​ໃຫ້​ທີ່​ດິນ​ມີ​ລາຄາ​ແພງ​ຂຶ້ນດ້ວຍ​ແລ້ວ ກໍ​ຍັງ​ເຮັດ​ໃຫ້​ກະ​ເສດ​ຕະກອນລາວ​ພາກັນ​ຂາຍທີ່​ໄຮ່​ທີ່​ນາ​ແລະ​ພື້ນ​ທີ່​ການ​ກະ​ເສດ​ຂອງ​ພວກ​ຕົນເພີ່ມ​ຫລາຍ​ຂຶ້ນນັບ​ມື້​ດ້ວຍ​ເຊັ່ນ​ກັນ. ນອກຈາກ​ນີ້​ການ​ທີ່​ປາກົດ​ວ່າ​ກະ​ເສດ​ຕະກອນ​ລາວ​ ຈຳນວນ​ບໍ່ໜ້ອຍ ​ຕ່າງ​ກໍໄດ້​ພາກັນ​ປະລະ​ຈາກ​ການ​ປູກ​ເຂົ້າ​ໄປ​ປູກ​ພືດ​ເສດຖະກິດ​ຊະນິດ​ອື່ນໆ​ເພື່ອ​ຕອບ​ສະໜອງ​ຕະຫລາດຕ່າງປະ​ເທດ​ເປັນ​ດ້ານ​ ຫລັກ​ດ້ວຍ​ແລ້ວ ​ກໍ​ຍັງ​ຈ​ະ​ເຮັດ​ໃຫ້​ຄົນ​ລາວ​ຕ້ອງ​ຂາດ​ແຄນ​ເຂົ້າກິນ​ໃນ​ໄລຍະ​ຕໍ່​ໄປ​ຢ່າງ​ຫລີກ ລ່ຽງບໍ່​ໄດ້.

ລັດຖະບານ​ລາວ​ວາງ​ແຜນການ​ທີ່​ຈະ​ຂະຫຍາຍ​ພື້ນ​ທີ່​ປູກ​ເຂົ້າຈາກ 8 ​ແສນ​ກວ່າ​ເຮັກ​ຕ້າ​ໃນ​ປັດຈຸບັນ ​ໃຫ້​ເພີ່ມ​ຂຶ້ນ ​ເປັນ​ບໍ່​ໜ້ອຍ​ກວ່າ 2 ລ້ານ​ເຮັກ​ຕ້າ​ພາຍ​ໃນ​ປີ​ 2020 ​ເນຶ່ອງຈາກ​ຄາດໝາຍ​ວ່າ​ໃນ​ປີ​ດັ່ງກ່າວ​ນ ີ້​ລາວ​ຈະ​ມີ​ປະຊາກອນ​ເພີ່ມ​ຂຶ້ນ​ເປັນ​ຫລາຍ​ກວ່າ 8 ລ້ານ​ຄົນ ຊຶ່ງ​ຈະ​ຕ້ອງ​ມີ​ຜົນ​ຜະລິດ​ເຂົ້າກິນ​ຫລາຍ​ກວ່າ 4 ລ້ານ​ຕັນ ​ຈຶ່ງ​ຈະ​ພຽງພໍ​ກັບ​ຄວາມ​ຕ້ອງການ​ບໍລິ​ໂພ​ກພາຍ​ໃນ​ປະ​ເທດ​ນັ້ນ​ເອງ.

XS
SM
MD
LG