ເຈົ້າໜ້າທີ່ປະຈໍາກອງບັນຊາການປ້ອງກັນຄວາມສະຫງົບໃນເຂດຂະຄອນວຽງຈັນ
ໃຫ້ການຢືນຢັນວ່າ ບັນຫາອາດຊະຍາກໍາທີ່ເກີດຂຶ້ນໃນເຂດນະຄອນວຽງຈັນ ມີລະດັບ
ຄວາມຮຸນແຮງຫຼາຍຂຶ້ນນັບມື້ ຊຶ່ງຈະເຫັນໄດ້ຈາກໃນໄລຍະ 6 ເດືອນຜ່ານມາຂອງປີນີ້
ມີຄະດີອາດຊະຍາກໍາເກີດຂຶ້ນແລ້ວເຖິງ 591 ກໍລະນີ ແລະເຈົ້າໜ້າທີ່ ລາວກໍສາມາດຕິດ
ຕາມຈັບກຸມຜູ້ກະທໍາຜິດໄດ້ທັງໝົດ 541 ຄົນ ໂດຍໃນນີ້ກໍລວມເຖິງຜູ້ກະທໍາຄວາມຜິດ
ທີ່ເປັນແມ່ຍິງດ້ວຍຈໍານວນ 76 ຄົນ.
ຍິ່ງໄປກວ່ານັ້ນ ບັນຫາທີ່ໜ້າເປັນຫ່ວງຢ່າງຍິ່ງ ກໍຄືໃນຈໍານວນຜູ້ກະທໍາຄວາມຜິດທັງໝົດ
ທີ່ຖືກຈັບກຸມຕົວໄດ້ດັ່ງກ່າວນີ້ ສ່ວນໃຫຍ່ກໍແມ່ນເຍົາວະຊົນທີ່ມີອາຍຸສະເລ່ຍຕໍ່າກວ່າ 18 ປີ
ທີ່ໄດ້ພາກັນກະທໍາຄວາມຜິດກ່ຽວກັບຢາເສບຕິດ ການປົ້ນຈີ້ ແລະລັກຊັບ ລວມເຖິງການ
ຊ່ອງສຸມ ຫຼືລວມຕົວກັນຕັ້ງເປັນກຸ່ມແກ໊ງເພື່ອກໍ່ອາດຊະຍາກໍາຕ່າງໆໂດຍບໍ່ເກງກົວກົດໝາຍ
ອີກດ້ວຍ. ດັ່ງທີ່ເຈົ້າໜ້າທີ່ຄົນດັ່ງກ່າວໄດ້ໃຫ້ການ ອະທິບາຍເຖິງສະພາບການທີ່ເປັນຢູ່ໃນ ເວລານີ້ວ່າ:
“ສິ່ງຍໍ້ທໍ້ໃນສັງຄົມປັດຈຸບັນ
ຍັງສົ່ງຜົນກະທົບທາງລົບໃຫ້
ແກ່ເດັກນ້ອຍ ແລະໄວໜຸ່ມລາວ
ເຊັ່ນວ່າຕົກເປັນທາດຂອງຢາເສບ
ຕິດ ກາຍເປັນນັກເລງອັນທະພານ
ຕິດເຊື້ອໂຣກເອດສ໌ ຖືກຂາຍແຮງ
ງານ ຂີ້ຄ້ານຮໍ່າຮຽນ ມົ້ວສຸມເພີດ
ເພີນເກີນຂອບເຂດ ຊຶ່ງຜູ້ກະທໍາ
ຜິດສ່ວນໃຫຍ່ກະແມ່ນພວກໄວ
ໜຸ່ມທີ່ມີອາຍຸຕໍ່າກວ່າ 18 ປີ.”
ທາງດ້ານຄະນະກໍາມະການກວດກາ ແລະຄວບຄຸມຢາເສບຕິດແຫ່ງຊາດລາວ ກໍລາຍງານວ່າ
ການລັກລອບຂົນສົ່ງແລະການຄ້າຢາເສບຕິດໃນລາວ ໄດ້ກາຍເປັນບັນຫາທີ່ຮຸນແຮງຫຼາຍຂຶ້ນ
ນັບມື້ ເນື່ອງຈາກກຸ່ມແກ໊ງຄ້າຢາເສບຕິດໃນລາວ ບໍ່ພຽງແຕ່ຈະມີການຂະຫຍາຍພື້ນທີ່ການຄ້າ
ຢາເສບຕິດຂອງພວກຕົນຈາກເຂດຕົວເມືອງ ໄປຍັງເຂດຊົນນະບົດຂອງລາວເທົ່ານັ້ນ. ຫາກແຕ່
ກໍຍັງປາກົດວ່າກຸ່ມແກ໊ງຄ້າຢາເສບຕິດໄດ້ເພີ່ມປະລິມານຢາເສບຕິດ ທັງທີ່ລັກລອບຂົນສົ່ງເພື່ອ
ຂາຍພາຍໃນລາວ ແລະທີ່ສົ່ງອອກໄປຕ່າງປະເທດອີກດ້ວຍ. ຕົວຢ່າງກໍຄືກໍລະນີ ທາງການລາວ
ສາມາດຈັບກຸມນັກຄ້າຢາເສບຕິດໄດ້ 4 ຄົນ ໃນຂະນະທີ່ກໍາລັງລັກລອບຂົນສົ່ງຢາບ້າ ນໍ້າໜັກ
ລວມກວ່າ 2 ໂຕນ ຂ້າມແມ່ນໍ້າຂອງໄປຕ່າງປະເທດເມື່ອປີຜ່ານມາ.
ສ່ວນທ່ານ Leik Boonwat ຜູ້ຕ່າງໜ້າຂອງອົງການຄວບຄຸມຢາເສບຕິດແລະອາດຊະຍາກໍາ
ແຫ່ງອົງການສະຫະປະຊາຊາດ ຫຼື UNODC ປະຈໍາປະເທດລາວ ກໍໄດ້ ລະບຸວ່າທາງການ
ລາວສາມາດຈັບກຸມແລະຍຶດຢາເສບຕິດໄດ້ຫຼາຍຂຶ້ນຢາງຕໍ່ເນື່ອງໃນຕະຫຼອດໄລຍະ 3 ປີມານີ້
ໂດຍຈະເຫັນໄດ້ຈາກການຍຶດເຮໂຣອີນໄດ້ເພີ່ມຂຶ້ນ ຈາກ 17.5 ກິໂລກຣາມ ໃນປີ 2008 ເປັນ
84.34 ກິໂລກຣາມ ໃນປີ 2010 ແລະກໍເພີ່ມຂຶ້ນອີກເຖິງ 4 ເທົ່າໃນຕະຫຼອດປີ 2011 ທີ່ຜ່ານມາ.
ສ່ວນຢາບ້ານັ້ນ ກໍຖືເປັນຢາເສບ
ຕິດທີ່ເພີ່ມຂຶ້ນຢ່າງວ່ອງໄວທີ່ສຸດ
ເມື່ອປາກົດວ່າ ໃນໄລຍະ 3 ປີ
ຜ່ານມານີ້ ທາງການລາວສາມາດ
ຍຶດຢາບ້າໄດ້ເພີ່ມຂຶ້ນຈາກ 1.23
ລ້ານເມັດໃນປີ 2008 ເປັນຫຼາຍ
ກວ່າ 24.5 ລ້ານເມັດໃນປີ 2010
ຫຼືເພີ່ມຂຶ້ນຫຼາຍກວ່າ 18 ເທົ່າ
ແລະເກືອບ 30 ລ້ານເມັດໃນປີ 2011.
ທາງດ້ານກະຊວງຍຸຕິທໍາຂອງລາວ ກໍລາຍງານວ່າໃນໄລຍະ 6 ເດືອນທໍາອິດຂອງແຜນການ
ປະຈໍາປີ 2011-2012 ນີ້ ສານປະຊາຊົນລາວໃນທົ່ວປະເທດໄດ້ມີຄໍາຕັດສິນຄະດີອາດຊະ
ຍາກໍາຕ່າງໆໄປແລ້ວຈໍານວນທັງໝົດ 9,893 ກໍລະນີ.
ແຕ່ຢ່າງໃດກໍຕາມ ທ່ານທອງສິງ ທໍາມະວົງ ນາຍົກລັດຖະມົນຕີລາວ ກໍໄດ້ມີຄໍາສັ່ງໃຫ້ໜ່ວຍ
ງານຕ່າງໆຂອງລັດຖະບານ ແລະທຸກພາກສ່ວນທີ່ກ່ຽວຂ້ອງໃນທົ່ວປະເທດ ຈະຕ້ອງຮ່ວມມື
ກັນເຂົ້າໃນການກວດລ້າງປາກົດການຍໍ່ທໍ້ ແລະບັນຫາໄພສັງຄົມໃນທຸກຮູບແບບຢ່າງເຂ້ມງວດ
ນັບແຕ່ເດືອນມີນາເປັນຕົ້ນມາແລ້ວ ທັງນີ້ກໍເພື່ອເຮັດໃຫ້ສາມາດຮັບປະກັນໃຫ້ໄດ້ 100% ວ່າ
ຈະບໍ່ມີປາກົດການຍໍ່ທໍ້າ ແລະໄພສັງຄົມເກີດຂຶ້ນໃນໂອກາດທີ່ລັດຖະບານລາວຈະເປັນເຈົ້າພາບ
ຈັດກອງປະຊຸມສຸດຍອດຜູ້ນໍາເອເຊຍກັບຢູໂຣບຄັ້ງທີ່ 9 ທີ່ຈະມີຂຶ້ນຢ່າງເປັນທາງການລະຫວ່າງ
ວັນທີ່ 5-6 ພະຈິກປີນີ້ ຢູ່ນະຄອນວຽງຈັນ.