ນາຍົກລັດຖະມົນຕີລາວ ຢືນຢັນວ່າ ລັດຖະບານໄດ້ດຳເນີນ
ມາດຕະການ ໃນທຸກວິທີທາງ ເພື່ອການສະກັດກັ້ນ ແລະ
ປາບປາມການຄ້າມະນຸດຂ້າມຊາດ ໂດຍໄດ້ຮ່ວມມືກັບ
ເພື່ອນບ້ານ ແລະສາກົນຢ່າງໃກ້ຊິດ.
ທ່ານທອງສິງ ທຳມະວົງ ນາຍົກລັດຖະມົນຕີລາວ ໄດ້ຖະແຫລງ
ໃນໂອກາດວັນສາກົນຕ້ານການຄ້າມະນຸດ ທີ່ມີການຈັດງານໂຮມ
ຊຸມນຸມ ໃນວັນທີ 12 ທັນວາ ຂອງທຸກປີ ວ່າ ນັບຈາກປີ 2004 ເປັນຕົ້ນມາ ລັດຖະບານ
ລາວໄດ້ເອົາໃຈໃສ່ ແລະຖືສຳຄັນວຽກງານສະກັດກັ້ນ ແລະຕ້ານການຄ້າມະນຸດຮ່ວມ
ກັບປະເທດເພື່ອນມິດ ອົງການຈັດຕັ້ງສາກົນ ອົງການຈັດຕັ້ງທີ່ບໍ່ສັງກັດລັດຖະບານ ແລະ
ອົງການຈັດຕັ້ງທາງສັງຄົມ ໂດຍມີການດຳເນີນໂຄງການ ແລະກິດຈະກຳຕ່າງໆ ເພື່ອ
ຕອບ ໂຕ້ການຄ້າມະນຸດ ຢ່າງຕັ້ງໜ້າ.
ໂດຍສະເພາະແມ່ນລັດຖະບານລາວ ໄດ້ມີການສ້າງຕັ້ງກົນໄກ ຕ້ານການຄ້າມະນຸດ
ຢູ່ຂັ້ນສູນກາງ ແລະທ້ອງຖິ່ນ ແລະໄດ້ສ້າງຕັ້ງຄະນະຊີ້ນຳ ລະດັບຊາດຕ້ານການຄ້າ
ມະນຸດ ທີ່ມີແຜນງານແຫ່ງຊາດ ກ່ຽວກັບການສະກັດກັ້ນ ແລະຕ້ານການຄ້າມະນຸດ
ເປັນການສະເພາະ ທັງຍັງມີກົດໝາຍ ທີ່ນຳໃຊ້ເຂົ້າໃນການດຳເນີນຄະດີ ຕໍ່ຜູ້ກະທຳ
ຄວາມຜິດ ແລະໃຫ້ການຊ່ວຍເຫຼືອຜູ້ຖືກເຄາະຮ້າຍ ຢ່າງມີປະສິດທິພາບ ທີ່ສູງຂຶ້ນນັບມື້
ອີກດ້ວຍ ດັ່ງທີ່ທ່ານທອງສິງ ໄດ້ໃຫ້ການຢືນຢັນວ່າ:
“ພວກເຮົາໄດ້ເອົາໃຈໃສ່ ດຳເນີນຄະດີຢ່າງເຂັ້ມງວດ ຕໍ່ຜູ້ກະທຳຜິດ ພ້ອມກັນນັ້ນ
ພວກເຮົາຍັງໄດ້ເອົາໃຈໃສ່ດຳເນີນ ການສຶກສາອົບຮົມ ມາຕະການທາງດ້ານ
ກົດໝາຍ ແລະມາດຕະການໃນດ້ານການຄຸ້ມຄອງຄວາມສະຫງົບ ຄວາມເປັນ
ລະບຽບຮຽບຮ້ອຍ ໃນສັງຄົມ ເພື່ອສະກັດກັ້ນ ແລະຕ້ານການຄ້າມະນຸດໃຫ້ມີ
ປະສິດທິຜົນ.”
ໂດຍໃນຊ່ວງແຜນການປີ 2013-2014 ທີ່ຜ່ານມາ ສານປະຊາຊົນລາວໄດ້ດຳເນີນຄະດີ
ກ່ຽວກັບການຄ້າມະນຸດຈຳນວນ 90 ກໍລະນີ ມີຜູ້ຕ້ອງຫາ 129 ຄົນ ຊຶ່ງໃນນີ້ເປັນຜູ້ ຕ້ອງຫາ ເພດຍິງເຖິງ 89 ຄົນ ແລະມີຜູ້ຖືກເຄາະຮ້າຍ 242 ຄົນ ຊຶ່ງເປັນຜູ້ຖືກເຄາະຮ້າຍ ເພດຍິງ ເຖິງ 151 ຄົນ ແລະ 109 ຄົນ ໃນນີ້ຍັງມີ ອາຍຸຕ່ຳກວ່າ 18 ປີ.
ພ້ອມກັນນີ້ ກໍມີລາຍງານວ່າ ມີແຮງງານລາວ 236 ຄົນ ທີ່
ໄດ້ຮັບການຊ່ວຍເຫຼືອ ແລະຖືກສົ່ງຕົວກັບຈາກໄທ ໂດຍ
ໃນນີ້ ກໍເປັນເພດຍິງ ເຖິງ 225 ຄົນ ທີ່ໄດ້ຮັບການຊ່ວຍເຫຼືອ
ຈາກຊ້ອງໂສເພນີໃນໄທ.
ທາງດ້ານສຳນັກບໍລິຫານແຮງງານຕ່າງດ້າວໃນໄທ ລາຍງານ
ວ່າ ມີແຮງງານລາວ 173,000 ກວ່າຄົນ ທີ່ໄດ້ແຈ້ງຈົດທະບຽນ ຂໍອະນຸຍາດທຳງານຢູ່ໃນໄທ ຢ່າງຖືກຕ້ອງຕາມກົດໝາຍໃນ
ຊ່ວງ 4 ເດືອນທີ່ຜ່ານມາ ຊຶ່ງເມື່ອລວມກັບແຮງງານລາວທີ່ໄດ້
ຮັບອະນຸຍາດໃຫ້ ທຳງານຢ່າງຖືກຕ້ອງຢູ້ໃນໄທກ່ອນໜ້ານີ້ ກໍ
ຈະໄດ້ວ່າມີແຮງງານລາວ 256,000 ກວ່າຄົນທີ່ທຳງານຢູ່ໃນໄທ
ໃນປັດຈຸບັນນີ້.
ແຕ່ຢ່າງໃດກໍຕາມ ຖ້າຫາກອິງຕາມສະຖິຕິຫຼ້າສຸດ ຂອງສຳນັກບໍລິຫານແຮງງານຕ່າງດ້າວ
ໃນໄທນັ້ນ ກໍປາກົດວ່າ ໃນຈຳນວນແຮງງານລາວ 256,000 ກວ່າຄົນດັ່ງກ່າວນີ້ ກໍແບ່ງ
ອອກເປັນແຮງງານລາວ ທີ່ໄດ້ຜ່ານການພິສູດສັນຊາດ ແລະໄດ້ຮັບອະນຸຍາດໃຫ້ທຳງານ
ຢູ່ໃນໄທ ຕໍ່ໄປຈຳນວນ 40,500 ຄົນ ແລະອີກ 41,700 ກວ່າຄົນເປັນແຮງງານລາວ ທີ່
ສິ້ນສຸດສັນຍາຈ້າງໃນໄທ ນັບຕັ້ງແຕ່ທ້າຍເດືອນສິງຫາ ທີ່ຜ່ານມາແລ້ວ ຊຶ່ງກໍໝາຍຄວາມ
ວ່າ ມີແຮງງານລາວ ທີ່ໄດ້ແຈ້ງຈົດທະບຽນໄວ້ກັບທາງການໄທຈຳນວນ 173,000 ກວ່າຄົນ ເທົ່ານັ້ນ ທີ່ມີສິດຈະໄດ້ຮັບການພິສູດສັນຊາດ ເພື່ອຂໍທຳງານໃນໄທໄດ້ຕໍ່ໄປ.
ໂດຍກ່ອນໜ້ານີ້ ທ່ານພົນເອກປຣະຍຸດ ຈັນໂອຊາ ຫົວໜ້າຄະນະຮັກສາຄວາມສະຫງົບ
ຮຽບຮ້ອຍແຫ່ງຊາດ ແລະນາຍົກລັດຖະມົນຕີໄທ ທີ່ຍຶດອຳນາດທາງການເມືອງ ຈາກ
ລັດຖະບານຂອງທ່ານນາງຍິ່ງລັກ ຊິນນະວັດ ນັບຈາກວັນທີ 22 ພຶດສະພາ 2014 ເປັນ
ຕົ້ນມານັ້ນ ໄດ້ຖະແຫລງຢືນຢັນວ່າ ການແກ້ໄຂບັນຫາແຮງງານຕ່າງດ້າວ ທີ່ລັກລອບ
ທຳງານ ໂດຍຜິດກົດໝາຍຢູ່ໃນໄທ ໃນປັດຈຸບັນນີ້ ຖືເປັນບັນຫາສຳຄັນ ທີ່ລັດຖະບານໄທ
ຈຳດຳເນີນມາດຕະການແກ້ໄຂໃຫ້ສຳເລັດພາຍໃນ 1 ປີ ໂດຍລັດຖະບານໄທ ໄດ້ສ້າງຕັ້ງ
ຄະນະກຳມະການຂຶ້ນມາຮັບຜິດຊອບ ໃນການບໍລິຫານແຮງງານຕ່າງດ້າວໃນໄທ ເປັນ
ການສະເພາະ.
ທັງນີ້ໂດຍມາດຕະການທຳອິດຈະຕ້ອງດຳເນີນການຢ່າງຮີບດ່ວນທີ່ສຸດ ຄືການພິສູດ
ສັນຊາດຂອງແຮງງານລາວ ມຽນມາ ແລະ ກຳປູູເຈຍໃນໄທທຸກຄົນ ແລະຈະດຳເນີນຄະດີ
ກັບແຮງງານທີ່ລັກລອບທຳງານໃນໄທທຸກຄົນ ທັງຍັງຈະສົ່ງຕົວກັບຄືນພູມິລຳເນົາໃນທັນທີ ຫຼັງຈາກຄະດີຄວາມສິ້ນສຸດອີກດ້ວຍ.
