ລິ້ງ ສຳຫລັບເຂົ້າຫາ

ວັນອາທິດ, ໑໙ ພຶດສະພາ ໒໐໒໔

ລາວປະເຊີນກັບບັນຫາ ໃນການຍົກຍ້າຍ ປະຊາຊົນ ອອກຈາກເຂດ ສໍາປະທານທີ່ດີນ


ການກໍ່ສ້າງຫົນທາງໃໝ່ ໃນເຂດພະທາດຫລວງ ກຽມໃສ່ສະຫລອງ ຄົບຮອບ 450 ປີຂອງການສ້າງຕັ້ງ ນະຄອນຫລວງວຽງຈັນ ໃນ ເດືອນພະຈິກ 2010.
ການກໍ່ສ້າງຫົນທາງໃໝ່ ໃນເຂດພະທາດຫລວງ ກຽມໃສ່ສະຫລອງ ຄົບຮອບ 450 ປີຂອງການສ້າງຕັ້ງ ນະຄອນຫລວງວຽງຈັນ ໃນ ເດືອນພະຈິກ 2010.

ອໍານາດ​ການ​ປົກຄອງ​ເຂດ​ນະຄອນ​ວຽງ​ຈັນ​ ກໍາລັງ​ປະສົບ​ກັບ​ບັນຫາ​ການ​ຍົກ​ຍ້າຍ​ ປະຊາຊົນ​ ອອກ​ຈາກ​ເຂດ​ສໍາປະທານ​ຂອງ​ລັດຖະບານ ​ເພາະວ່າ​ບໍ່​ສາມາດ​ທີ່​ຈະ​ພັດທະນາ​ພື້ນ​ທີ່​ຮອງ​ຮັບ ເຂົາເຈົ້າ​ໄດ້​ ຕາມ​ແຜນການ.

ທ່ານ​ສົມບັດ ​ເຢຍລີ​ເຮີ ​ເຈົ້າຄອງ​ນະຄອນ​ຫລວງ​ວຽງ​ຈັນ ຖະ​ແຫລ​ງຍອມຮັບ​ວ່າການ​ຍົກ​
ຍ້າຍ​ປະຊາຊົນ​ທີ່​ໄດ້​ຮັບຜົນ​ກະທົບ​ຈາກ​ໂຄງການ​ພັດທະນາ​ຕ່າງໆ​ຂອງ​ລັດຖະບານ​ລາວ​ໃນ​
ເຂດ​ນະຄອນຫລວງ​ວຽງ​ຈັນ ​ໄປ​ຢູ່​ເຂດ​ຈັດສັນໃໝ່​ ໃນ​ໄລຍະ​ທີ່​ຜ່ານ​ມາ​ຈົນ​ເຖິງ​ປັດຈຸບັນ​ນີ້ ​
ໄດ້​ປະສົບ​ກັບ​ບັນຫາ​ຫຍຸ້ງ​ຍາກ​ໃນ​ຫລາຍ​ດ້ານ ​ເຊັ່ນ​ການ​ຊັກ​ຊ້າ​ໃນການ​ພັດທະນາ​ພື້ນ​ທີ່
ຮອງ​ຮັບ ​ແລະ​ການ​ບໍ່​ໄດ້​ຮັບ​ຄວາມ​ຮ່ວມ​ມື​ຈາກ​ປະຊາຊົນ​ ເປັນ​ຕົ້ນ.

ໂດຍ​ກ່ຽວກັບ​ບັນຫາ​ການ​ບໍ່​ໄດ້​ຮັບ​ຄວາມ​ຮ່ວມ​ມື​ຈາກ​ປະຊາຊົນ​ນັ້ນ ທ່ານ​ສົມບັດ​ກໍ​ຍອມຮັບ​
ວ່າ​ເປັນ​ບັນຫາ​ທີ່​ປະສົບກັບ​ຄວາມ​ຫຍຸ້ງຍາກ​ຫລາຍ​ທີ່​ສຸດ ​ເນຶ່ອງຈາກ​ປາກົດ​ວ່າ​ມີ​ປະຊາຊົນ
ຈໍານວນ​ນຶ່ງ​ທີ່​ບໍ່​ໄດ້​ຖືກ​ກະທົບ​ຈາກ​ໂຄງການ​ພັດທະນາ​ຂອງ​ລັດ​ຖະບານ ​ໄດ້​ພາກັນ​ເຂົ້າ​ໄປ​
ຈັບຈອງ​ແລະ​ອາ​ໃສ​ຢູ່​ໃນ​ເຂດ​ຈັດ​ສັນ​ ໂດຍ​ບໍ່​ໄດ້​ຮັບ​ອະນຸຍາດ​ ຍ້ອນຖືກ​ຕົວະ​ຍົວະ​ຈາກ​ກຸ່ມ
ຄົນ​ບໍ່​ດີ​ທີ່​ໄດ້​ບິດ​ເບືອນ​ຂໍ້​ມູນ ​ຈົນ​ເຮັດ​ໃຫ້​ເກີດ​ຄວາມ​ເຂົ້າ​ໃຈ​ຜິດ​ໃນ​ກຸ່ມ​ປະຊາຊົນ​ລາວ ດັ່ງ​
ທີ່ທ່ານສົມບັດ​ໄດ້​ຖະ​ແຫລ​ງຊີ້​ແຈງ​ເຖິງ​ກໍລະນີ​ບັນຫາ​ທີ່​ເກີດ​ຂຶ້ນຢູ່​ເຂດ​ຈັດ​ສັນ​ໃໝ່​ ຫລັກ 21 ​ໃນ​ເຂດ​ເມືອງ​ໄຊ​ທານີ ​ໃນ​ປັດຈຸບັນ​ນີ້​ວ່າ:

ທ່ານສົມບັດ ເຢຍລີເຮີ ເຈົ້າຄອງ ກໍາແພງນະຄອນຫລວງວຽງຈັນ (file photo 2010)
ທ່ານສົມບັດ ເຢຍລີເຮີ ເຈົ້າຄອງ ກໍາແພງນະຄອນຫລວງວຽງຈັນ (file photo 2010)

“ພວກ​ເຮົາ​ນີ້​ກະ​ໄດ້​ກະກຽມ​ເນື້ອ​ທີ່ 61 ​ເຮັກ​ຕ້າ ​ແລະ
32 ​ເຮັກ​ຕ້າ​ ຢູ່​ເຂດ​ປ່າ​ສະ​ຫງວນດົງ​ພະ​ໄຊ​ໃຫ້​ປະຊາ
ຊົນ​ໄປ​ຢູ່ ​ແຕ່​ກໍ​ມີ​ພະ​ນັກ​ງານ​ ນັກ​ລົບ​ແລະ​ປະຊາຊົນ​
ຈໍານວນ​ນຶ່ງ​ທີ່​ບໍ່​ແມ່ນ​ເປົ້າໝາຍ​ທີ່​ຈະ​ຈັດ​ສັນ​ໃຫ້​ ໄດ້​
ຖືກ​ຄົນ​ບໍ່​ດີ​ ຊວນ​ເຊື່ອ​ວ່າ​ ແມ່ນ​ພັກ-ລັດ​ນີ້​ໄດ້​ຈັດ​ສັນ​
ເພື່ອໃຫ້​ຜູ້​ບໍ່​ມີ​ທີ່​ດິນ​ຫັ້ນ. ດັ່ງ​ນັ້ນ ​ພໍ່​ແມ່​ ພີ່ນ້ອງ ກໍ​ຄື
ພະນັກງານ​ ນັກ​ລົບ ຕະຫລອດ​ເຖິງ​ພະນັກງານ​ບໍາ
ນານ​ຈຳນວນ​ນຶ່ງ​ ກໍ​ໄດ້​ພາກັນ​ບຸກລຸກ​ເຂົ້າ​ໄປ​ແລະ​
ແບ່ງປັນ​ທີ່​ດິນ​ ທີ່ອໍານາດ​ການ​ປົກຄອງ ນະຄອນ
ຫລວງ​ວຽງ​ຈັນ​ໄດ້​ບຸກ​ເບີກ​ດັ່ງກ່າວ”

ເຂດ​ຈັດ​ສັນ​ໃໝ່​ ຫລັກ 21 ດັ່ງກ່າວ​ນີ້ ​ໄດ້​ຖືກ​ສ້າງ​ຕັ້ງ​ຂຶ້ນມາ​ເພື່ອ​ຮອງ​ຮັບ​ປະຊາຊົນລາວ​
ທີ່​ໄດ້​ຮັບ​ຜົນກະທົບຈາກ​ໂຄງການ​ພັດທະນາ​ຕ່າງໆ​ຂອງ​ລັດຖະບານ​ລາວ​ໃນ​ເຂດ​ນະຄອນ
ຫລວງ​ວຽງ​ຈັນ​ເປັນ​ການສະ​ເພາະ ​ເຊັ່ນ​ການ​ກໍ່ສ້າງ​ສະໜາມ​ກີລາ​ແຫ່ງ​ໃໝ່​ ແລະ​ສະໜາມ​
ກ໊ອຟ​ເພື່ອ​ຮອງ​ຮັບ​ກີລາ​ຊີ​ເກ​ມສ໌​ ເມື່ອ​ທ້າຍ​ປີ 2009 ການ​ຂະຫຍາ​ຍສະໜາມ​ຫລວງ​ແລະ
ກົມ​ມະ​ລຽນ​ຢູ່​ທາດຫລວງ ​ແລະ​ການ​ສ້າງ​ທາງ 4 ​ເລນ ​ເພື່ອ​ເຊຶ່ອມຕໍ່​ຈາກ​ພະທາດຫລວງ ​
ໄປ​ຍັງ​ຖະໜົນ​ກໍາ​ແພງ​ເມືອງ ຊຶ່ງ​ຖືເປັນ​ໂຄງການ​ນຶ່ງ​ທີ່​ສໍາຄັນ​ ທີ່​ຈະ​ຕ້ອງ​ດໍາ​ເນີນ​ການ​ໃຫ້
ສໍາ​ເລັດ ​ທັນ​ການສະ​ເຫລີ​ມສະຫລອງ​ນະຄອນຫລວງ​ວຽງ​ຈັນ​ຄົບຮອບ 450 ປີ ​ໃນ​ທ້າຍ
ເດືອນ​ພະ​ຈິກ​ປີ​ນີ້.

ແຜນຜັງໂຄງການພັດທະນາເດີ່ນ ພະທາດຫລວງ ກຽມໃສ່ສະຫລອງ ຄົບຮອບ 450 ປີຂອງການສ້າງຕັ້ງ ນະຄອນຫລວງວຽງຈັນ ໃນເດືອນ ພະຈິກ 2010.
ແຜນຜັງໂຄງການພັດທະນາເດີ່ນ ພະທາດຫລວງ ກຽມໃສ່ສະຫລອງ ຄົບຮອບ 450 ປີຂອງການສ້າງຕັ້ງ ນະຄອນຫລວງວຽງຈັນ ໃນເດືອນ ພະຈິກ 2010.

ອໍານາດ​ການ​ປົກຄອງ​ເຂດ​ນະຄອນຫລວງ​ວຽງ​ຈັນ​ ໄດ້​ຈັດ​
ແບ່ງ​ເຂດ​ຈັດ​ສັນ​ໃໝ່​ດັ່ງກ່າວ​ນີ້ ​ອອກ​ເປັນ​ສອງສ່ວນ​ທີ່ມີ​ພື້ນ
ທີ່​ລວມກັນ 90 ກວ່າ​ເຮັກ​ຕ້າສໍາລັບ​ຮອງ​ຮັບ​ປະຊາຊົນ​ລາວ​
ທີ່​ຖືກ​ກະທົບ​ຈາກ​ໂຄງການ​ພັດທະນາຕ່າງໆ​ຂອງ​ລັດຖະບານ​
ດັ່ງກ່າວ ​ຈໍານວນ​ທັງ​ໝົດ 251 ຄອບຄົວ ຊຶ່ືງ​ໃນ​ໄລຍະ​ທີ່​
ຜ່ານ​ມາ​ ປະຊາຊົນ​ລາວເຫລົ່າ​ນີ້ ກໍ​ໄດ້ຮັບ​ການ​ຊົດ​ເຊີຍ​ຈາກ
ທາງ​ການ​ລາວ​ແລ້ວ ​ຄິດ​ເປັນ​ມູນ​ຄ່າ​ລວມກັນ​ຫລາຍ​ກວ່າ 77
ຕື້​ກີບ ຫລື​ເກືອບ 10 ລ້ານ​ໂດ​ລາ ​ຕາ​ມອັດຕາ​ແລກປ່ຽນ​ໃນ
ປັດຈຸບັນ. ຫາກ​ແຕ່​ວ່າ​ ສໍາລັບ​ປະຊາຊົນ​ລາວ​ທີ່​ຖືກ​ກະທົບ
ຈາກ​ໂຄງການພັດທະນາ​ຕ່າງ​ໆຂອງ​ລັດຖະບານ​ລາວ​ນັ້ນ
ຄ່າ​ຊົດ​ເຊີຍດັ່ງກ່າວ ຖືວ່າຕໍ່າ​ເກີນ​ໄປ. ດ້ວຍ​ເຫດ​ນີ້ ​ຈຶ່ງ​ເຮັດ
ໃຫ້​ທາງການ​ລາວ​ຕ້ອງ​ໃຫ້ການ​ຊ່ວຍ​ເຫລືອ​ພວກ​ເຂົາ​ເຈົ້າ ດ້ວຍ​ການ​ພັດທະນາ​ເຂດ​ຈັດ​ສັນ​ໃໝ່ ​ເພື່ອ​ຮອງ​ຮັບ​ພວກ​ເຂົາ​ເຈົ້າ ດັ່ງກ່າວ​ນັ້ນ​ເອງ.

XS
SM
MD
LG