ເຈົ້າໜ້າທີ່ຂັ້ນສູງໃນກະຊວງພະລັງງານ ແລະບໍ່ແຮ່ຂອງ
ລາວ ໄດ້ໃຫ້ການຄາດໝາຍວ່າ ໃນຕະຫລອດປີ 2010
ນີ້ ການສົ່ງອອກແຮ່ທາດຈາກລາວໄປຕ່າງປະເທດຈະມີ
ມູນຄ່າລວມຫລາຍກວ່າ 750 ລ້ານໂດລາ ຫລືຄິດເປັນ
ອັດຕາສະເລ່ຍ ທີ່ເພີ່ມຂຶ້ນຈາກປີ 2009 ຫລາຍກວ່າ
38% ອັນເປັນຜົນໂດຍກົງຈາກການທີ່ເສດຖະກິດໂລກ
ເລີ່ມຟື້ນໂຕຄືນ ຈຶ່ງເຮັດໃຫ້ຕະຫລາດໂລກມີຄວາມຕ້ອງ ການແຮ່ທາດຫລາຍຂຶ້ນ.
ໂດຍສະເພາະແມ່ນແຮ່ຄໍາແລະທອງແດງ
ນັ້ນ ກໍຍັງມີລາຄາທີ່ເພີ່ມສູງຂຶ້ນຢ່າງຕໍ່ເນື່ອງ
ດ້ວຍເຫດນີ້ ຈຶ່ງເຮັດໃຫ້ທາງການລາວເຊຶ່ອ
ໝັ້ນວ່າ ການສົ່ງອອກແຮ່ຄໍາຈາກລາວໄປ
ຕ່າງປະເທດ ໃນຕະຫລອດປີ 2010 ນີ້
ຈະມີນໍ້າໜັກລວມເກີນກວ່າ 5,100 ກິໂລ
ແລະການສົ່ງອອກແຮ່ທອງແດງ ກໍຈະມີນໍ້າ
ໜັກລວມ ຫລາຍກວ່າ 340,000 ຕັນ ຊຶ່ງສ່ວນໃຫຍ່ນັ້ນເປັນຜົນຜະລິດຈາກບໍ່ແຮ່ ຢູ່ເຊ
ໂປນ ໃນແຂວງສະຫວັນນະເຂດ ບໍ່ຄໍາຢູ່ພູເບ້ຍໃນແຂວງວຽງຈັນ ແລະບໍ່ແຮ່ຢູ່ໃນແຂວງ
ຫລວງນໍ້າທາ. ທາງການລັດຖະບານລາວໄດ້ກໍານົດໃຫ້ ພາກອຸດສາຫະກໍາຂຸດຄົ້ນບໍ່ແຮ່
ນີ້ ເປັນພາກການຜະລິດເພື່ອການສົ່ງອອກ ທີ່ຈະມີບົດບາດຢ່າງສໍາຄັນຕໍ່ການພັດທະນາ
ທາງເສດຖະກິດຂອງລາວ ທີ່ມີເປົ້າໝາຍທີ່ຈະມຸ້ງໄປສູ່ການພັດທະນາເປັນປະເທດອຸດສາ ຫະກໍາທັນສະໃໝ ໃນອະນາຄົດ.
ຊຶ່ງດ້ວຍເປົ້າໝາຍດັ່ງກ່າວນີ້ ຈຶ່ງເຮັດໃຫ້ທາງການລັດຖະບານລາວໄດ້ອະນຸມັດສໍາປະທານການສໍາຫລວດ ແລະຂຸດຄົ້ນບໍ່ແຮ່ຢູ່ໃນລາວ ແກ່ບັນດາບໍລິສັດເອກກະຊົນລາວແລະຕ່າງ ຊາດໄປແລ້ວເຖິງ 154 ບໍລິສັດ ໂດຍໃນນີ້ ເປັນບໍລິສັດຕ່າງຊາດ 118 ບໍລິສັດ ທີ່ໄດ້ຮັບ ອະນຸມັດສໍາປະທານລວມກັນເຖິງ 186 ໂຄງການ ແລະອີກ 83 ໂຄງການ ກໍເປັນສໍາປະ ທານຂອງເອກກະຊົນລາວ ຈໍານວນ 36 ບໍລິສັດ.
ແຕ່ຢ່າງໃດກໍຕາມ ການທີ່ທາງການລາວໄດ້ອະນຸມັດສໍາປະທານການສໍາຫລວດແລະຂຸດຄົ້ນບໍ່ແຮ່ດັ່ງກ່າວນີ້ ກໍໄດ້ ເຮັດໃຫ້ຫລາຍໆພາກສ່ວນໃນລາວມີຄວາມກັງວົນໃຈເປັນຢ່າງຍິ່ງວ່າ ບັນດາໂຄງການເຫລົ່ານີ້ຈະສົ່ງຜົນກະທົບຕໍ່ ສະພາບແວດລ້ອມທໍາມະຊາດໃນລາວຢ່າງກວ້າງຂວາງ ເນື່ອງຈາກບໍ່ເຊື່ອໝັ້ນວ່າ ກົນໄກຂອງລັດຖະບານລາວນັ້ນ ຈະສາມາດກວດກາໂຄງການສໍາຫລວດແລະຂຸດຄົ້ນບໍ່ແຮ່ ໄດ້ຢ່າງທົ່ວເຖິງ. ເພາະສະນັ້ນ ຈຶ່ງກາຍເປັນກໍລະນີບັນຫາ ທີ່ປະຊາຊົນລາວໄດ້ຮ້ອງຮຽນເຖິງຄະນະປະຈໍາສະພາແຫ່ງຊາດລາວຫລາຍທີ່ສຸດໃນປັດຈຸບັນ ດັ່ງທີ່ທ່ານ ໄຊສົມພອນ ພົມວິຫານ ຮອງປະທານສະພາແຫ່ງຊາດລາວໄດ້ຖະແຫລງຊີ້ແຈງໃນເລຶ່ອງນີ້ວ່າ:
“ສີ່ງທີ່ມີຄວາມພົ້ນເດັ່ນໜ້າເປັນຫ່ວງແລະແຕະຕ້ອງຕໍ່ຜົນປະໂຍດຂອງປະຊາຊົນ ແລະກໍມີທ່າອຽງທີ່ເປັນການເອົາ ປຽບປະຊາຊົນຕາມທີ່ປະຊາຊົນໄດ້ສ່ອງແສງມາ ກໍແມ່ນບັນຫາເລຶ່ອງການຂຸດຄົ້ນແຮ່ທາດຢ່າງຊະຊາຍ ໂດຍສະ ເພາະການຂຸດຄົ້ນຄໍາຈໍານວນນຶ່ງຢູ່ບາງທ້ອງຖິ່ນຢູ່ບາງແຂວງ ຊຶ່ງການຂຸດຄົ້ນຢ່າງຊະຊາຍດັ່ງກ່າວກໍເປັນສິ່ງທີ່ຜິດກົດໝາຍທີ່ໄດ້ສົ່ງຜົນສະທ້ອນຕໍ່ສິ່ງແວດລ້ອມທໍາມະຊາດ ແລະສຸຂະ ພາບຂອງປະຊາຊົນ”
ນອກຈາກນີ້ ໂດຍອິງຕາມຂໍ້ມູນຂອງກະຊວງພະລັງງານແລະບໍ່ແຮ່ຂອງລາວເອງ ກໍໄດ້ລະບຸ
ວ່າ ໃນຈໍານວນສໍາປະທານການສໍາຫລວດແລະຂຸດຄົ້ນບໍ່ແຮ່ ທີ່ທາງການລັດຖະບານລາວ
ໄດ້ອະນຸມັດໃຫ້ກັບເອກກະຊົນລາວແລະຕ່າງຊາດທັງ 269 ໂຄງການນັ້ນ ໄດ້ກວມເອົາພື້ນ
ທີ່ລວມກັນກວ້າງກວ່າ 2.88 ລ້ານເຮັກຕ້າ. ດ້ວຍເຫດນີ້ ຖ້າຫາກວ່າບໍ່ມີການກວດກາຢ່າງ
ຄັກແນ່ວ່າ ບັນດາບໍລິສັດເອກກະຊົນແລະຕ່າງຊາດໄດ້ມີການປະຕິບັດຕາມສັນຍາສໍາປະ
ທານຢ່າງແທ້ຈິງຫລືບໍ່ນັ້ນ ກໍຍ່ອມຈະສົ່ງຜົນກະທົບຕໍ່ສະພາບແວດລ້ອມໃນລາວຢ່າງກວ້າງ
ຂວາງ ແລະຜູ້ທີ່ຈະໄດ້ຮັບຜົນກະທົບຢ່າງຫລີກລ່ຽງບໍ່ໄດ້ ກໍຄືປະຊາຊົນລາວ.
ດັ່ງກໍລະນີບັນຫາທີ່ໄດ້ເກີດຂຶ້ນແລະໄດ້ສົ່ງຜົນກະທົບຕໍ່ປະຊາຊົນລາວທັງໃນແຂວງອັດຕະປື ແລະແຂວງເຊກອງ ເມື່ອໝໍ່ໆມານີ້ ກໍຄືການເຮັດເໝືອງແຮ່ຄໍາແລະການຮ່ອນຄໍາທີ່ທາງການລັດຖະບານລາວໄດ້ອະນຸມັດສໍາປະທານ ໃຫ້ກັບບັນດາບໍລິສັດຈາກຫວຽດນາມນັ້ນ ກໍປາກົດວ່າໄດ້ເປັນຜົນເຮັດປະຊາຊົນ ບໍ່ສາມາດໃຊ້ປະໂຍດຈາກແມ່ນໍ້າເຊກອງໄດ້ເລີຍ ເນຶ່ອງຈາກວ່າເກີດບັນຫານໍ້າຂຸ່ນແລະມີສານພິດຈາກເໝືອງແຮ່ຄໍາແລະການຮ່ອນຄໍາດັ່ງກ່າວ ໄຫລລົງ ສູ່ແມ່ນໍ້າເຊກອງນັ້ນເອງ.
