ກຸ່ມປົກປ້ອງສິ່ງແວດລ້ອມໃນສະຫະລັດກຸ່ມນຶ່ງ ປະນາມລາຍງານສະບັບນຶ່ງທີ່ ສປປ ລາວ ວ່າຈ້າງໃຫ້ເຮັດຂຶ້ນ ຊຶ່ງແນະນໍາໃຫ້ດໍາເນີນການກໍ່ ສ້າງເຂື່ອນໄຟຟ້າພະລັງນໍ້າໃສ່ແມ່ນໍ້າຂອງ ທີ່ໄດ້ສະເໜີໄປນັ້ນ.
ກຸ່ມປົກປ້ອງແມ່ນໍ້າສາກົນກ່າວວ່າ ການສຶກສາໂດຍບໍລິສັດ Poyry Energy AG ທີ່ມີສໍານັກງານຢູ່ໃນປະເທດ Switzerland ນັ້ນ ສະແດງໃຫ້ເຫັນເຖິງຄວາມພະຍາຍາມຢ່າງສຸດຂີດຂອງລາວ ເພື່ອໃຫ້ໄດ້ຮັບການອະນຸມັດຈາກປະເທດເພື່ອນບ້ານ ໄທ ຫວຽດນາມແລະກໍາປູເຈຍ ໃຫ້ກໍ່ສ້າງເຂື່ອນໄຊຍະບູລີ ມູນຄ່າຫລາຍລ້ານໂດລານັ້ນ.
3 ປະເທດດັ່ງກ່າວແລະລາວ ປະກອບເປັນຄະນະກໍາມາທິການແມ່ນໍ້າຂອງສາກົນ ຫລື MRC ທີ່ໄດ້ວາງຂໍ້ບັງຄັບຈໍານວນຫລວງຫລາຍສໍາລັບການສ້າງເຂື່ອນແຫ່ງນີ້. ແຕ່ກຸ່ມປົກປ້ອງແມ່ນໍ້າສາກົນກ່າວວ່າ ລາຍງານຂອງຂອງບໍລິສັດສະວິສດັ່ງ ກ່າວ ບໍ່ໄດ້ເວົ້າເຖິງຂໍ້ບັງຄັບຫລາຍກວ່າສິບຂໍ້ ຮວມທັງຂໍ້ນຶ່ງທີ່ກໍານົດໃຫ້ສະໜອງຄວາມປອດໄພແກ່ການຍົກ ຍ້າຍຖິ່ນຂອງພວກພັນປາທີ່ສໍາຄັນນາໆຊະນິດ ທີ່ພົບເຫັນໃນລໍາແມ່ນໍ້າຂອງນັ້ນ.
ທ່ານນາງ Ame Trandem ຫົວໜ້າໂຄງການປະຈໍາພາກພື້ນຂອງກຸ່ມແມ່ນໍ້າສາກົນ ກ່າວວ່າ ລາຍງານສະບັບນີ້ຫລີກລ່ຽງວິທະຍາສາດແລະອາໄສກາງຕໍ່ນໍາການຄາດຄະເນເອົາ.
ລາວໄດ້ຕົກລົງໃນເດືອນເມສາຜ່ານມາ ຕໍ່ຄໍາຂໍຮ້ອງຈາກເພື່ອນປະເທດສະມາຊິກໃນຄະນະກໍາມາທິການແມ່ນໍ້າຂອງສາກົນນໍາກັນ ທີ່ຂໍໃຫ້ລາວດໍາເນີນການສຶກສາຕື່ມອີກກ່ຽວກັບຜົນກະທົບຈາກເຂື່ອນທີ່ສະເໜີໄປນີ້.
ລາວຄາດໝາຍວ່າຈະໄດ້ຮັບຜົນປະໂຫຍດທາງດ້ານເສດຖະກິດຢ່າງຫລວງຫລາຍຈາກການຂາຍກະແສໄຟຟ້າສ່ວນໃຫຍ່ຂອງຈໍານວນ 1260 ກິໂລວັດທີ່ຈະຜະລິດຈາກເຂື່ອນແຫ່ງນີ້ໃຫ້ໄທ. ແຕ່ຫວຽດນາມແລະກໍາປູເຈຍພ້ອມທັງພວກກຸ່ມປົກປ້ອງສິ່ງແວດລ້ອມ ພາກັນຢ້ານວ່າ ໂຄງການນີ້ຈະທໍາລາຍການຍົກຍ້າຍຂອງພວກປາ ຊຶ່ງຈະມີຜົນກະທົບຕໍ່ຊີວິດການເປັນຢູ່ຂອງປະຊາຊົນຈໍານວນ 60 ລ້ານຄົນ ທີ່ອາໄສແມ່ນໍ້າຂອງເພື່ອທໍາມາຫາລ້ຽງຊີບນັ້ນ.
ຄາດວ່າຄະນະກໍາມາທິການ MRC ຈະທໍາການຕັດສິນໃຈຂັ້ນສຸດທ້າຍ ກ່ຽວກັບວ່າຈະໃຫ້ການອະນຸມັດຫລືບໍ່ ຕໍ່ໂຄງການສ້າງເຂື່ອນດັ່ງກ່າວໃນກອງປະຊຸມທີ່ຈະມີຂຶ້ນໃນຕົ້ນເດືອນໜ້າທີ່ກໍາປູເຈຍນັ້ນ.
ເຖິງຢ່າງໃດກໍດີ ລາວສາມາດດໍາເນີນການກໍ່ສ້າງໄດ້ ເຖິງແມ່ນຄະນະກໍາມາທິການດັ່ງກ່າວ ບໍ່ໃຫ້ການອະນຸມັດກໍຕາມ.
