ທ່ານ ຄໍາໃບ ດໍາລັດ ເຈົ້າແຂວງໆຄໍາມ່ວນ ໄດ້ຖະແຫລງຢືນຢັນວ່າໂຄງການເຂື່ອນນໍ້າເທີນ 2 ໄດ້ສ້າງຜົນປະໂຫຍດໃຫ້ກັບປະຊາຊົນໃນແຂວງຄໍາມ່ວນແລະແຂວງໄກ້ຄຽງຢ່າງຫລວງ ຫລາຍ ໂດຍສະເພາະແມ່ນປະຊາຊົນ 6,300 ກວ່າຄົນທີ່ຖືກຍົກຍ້າຍຈາກ 16 ບ້ານໃນເຂດ ເມືອງນາກາຍແລະເມືອງຍົມມະລາດ ທີ່ໄດ້ຮັບຜົນກະທົບຈາກການກໍ່ສ້າງເຂື່ອນນັ້ນ ມາຮອດປັດຈຸບັນນີ້ ກໍປາກົດວ່າມີຊີວິດການເປັນຢູ່ທີ່ດີຂຶ້ນກວ່າເມື່ອກ່ອນໃນທຸກໆດ້ານ ໂດຍບໍ່ວ່າຈະເປັນການມີເຮືອນຢ່າງຢ່າງຖາວອນໃນເຂດຈັດສັນໃໝ່ ການມີນໍ້າສະອາດແລະມີໄຟຟ້າໃຊ້ຢ່າງທົ່ວເຖິງ. ສ່ວນເດັກນ້ອຍໃນໄວຮຽນກໍໄດ້ເຂົ້າໂຮງຮຽນຢ່າງຄົບຖ້ວນ ແລະຍາມເຈັບປ່ວຍກໍມີໂຮງໝໍ ທີ່ພ້ອມຈະໃຫ້ການຮັກສາປິ່ນປົວຕະຫລອດເວລາ ສ່ວນປະຊາຊົນທີ່ຢູ່ເຂດຕອນລຸ່ມຂອງຕົວເຂື່ອນ ກໍໄດ້ໃຊ້ນໍ້າເພື່ອປະໂຫຍດໃນດ້ານກະສິກໍາອີກດ້ວຍ.
ແຕ່ຢ່າງໃດກໍຕາມ ເນື່ອງຈາກວ່າປະຊາຊົນ 6,300 ກວ່າຄົນ ຫລື 1,282 ຄອບຄົວດັ່ງກ່າວຕ່າງກໍໄດ້ຮັບການ ຈັດສັນທີ່ດິນທໍາກິນພຽງແຕ່ 0.6 ເຮັກຕ້າຕໍ່ຄອບຄົວເທົ່ານັ້ນ ຈຶ່ງເຮັດໃຫ້ມີບັນຫາທີ່ດິນທໍາກິນບໍ່ພຽງພໍ ດ້ວຍເຫດນີ້ ຈຶ່ງເຮັດໃຫ້ທາງການແຂວງຄໍາມ່ວນຈໍາເປັນຕ້ອງຈັດຫາທີ່ດິນເພື່ອຈັດສັນໃຫ້ກັບປະຊາຊົນເຫລົ່ານີ້ເພີ່ມຂຶ້ນອີກ 1 ເຮັກຕ້າ ສໍາລັບຄອບຄົວທີ່ມີສະມາຊິກເກີນກວ່າ 7 ຄົນ. ໂດຍຫລ້າສຸດ ກໍມີລາຍງານວ່າທາງການແຂວງຄໍາມ່ວນສາມາດຈັດຫາທີ່ດິນດັ່ງກ່າວໄດ້ແລ້ວ ດັ່ງທີ່ທ່ານຄໍາໃບ ໄດ້ໃຫ້ການຊີ້ແຈງໃນຕອນນຶ່ງວ່າ:
“ພວກເຮົາຈະມີການຈັດແບ່ງຕື່ມອີກ ໂດຍສະເພາະແມ່ນບ່ອນທີ່ນໍ້າຂຶ້ນນໍ້າລົງນັ້ນ ເພາະວ່ານໍ້າຫັ້ນຈະລົງໄປເປັນ ເວລາປະມານສີ່ເດືອນ ຈຶ່ງສາມາດທີ່ຈະປູກພືດລະຍະສັ້ນໄດ້ ແລ້ວເຂດນຶ່ງອີກກໍເປັນເຂດປ່າເສື່ອມໂຊມທີ່ນອນ ຢູ່ໃນເຂດຈັດສັນນັ້ນ ກໍຈະແບ່ງໃຫ້ຄອບຄົວທີ່ມີຫລາຍຄົນ ແຕ່ພິເສດສໍາລັບເຂດຍົກຍ້າຍຈັດສັນແລະເຂດເມືອງ ນາກາຍນີ້ຈະບໍ່ຮັບເອົາຄົນມາເພີ່ມອີກເພາະວ່າດິນມັນກໍຄັບແຄບແດ່.”
ນອກຈາກນີ້ ກໍຍັງມີການຈັດສັນພື້ນທີ່ 3 ເຮັັກຕ້າສໍາລັບປູກຕົ້ນໄມ້ກັບອີກ 5 ເຮັກຕ້າສໍາລັບ
ລ້ຽງສັດໃຫ້ແຕ່ລະຄອບຄົວ ລວມທັງຍັງຈະຂະຫຍາຍພື້ນທີ່ຮອງຮັບນໍ້າຈາກຄອງຊົນລະປະ
ທານ ເພີ່ມຂຶ້ນອີກ 7,000 ເຮັກຕ້າ ຊຶ່ງກໍຈະເຮັດໃຫ້ເຂດຈັດສັນດັ່ງກ່າວມີພື້ນທີ່ກວ້າງກວ່າ
24,000 ເຮັກຕ້າ. ໂຄງການເຂື່ອນນໍ້າເທີນ 2 ໄດ້ເລີ່ມຜະລິດກະແສໄຟຟ້າສົ່ງຂາຍໃຫ້ການ
ໄຟຟ້າຝ່າຍຜະລິດແຫ່ງປະເທດໄທ (EGAT) ນັບຕັ້ງແຕ່ເດືອນມີນາປີນີ້ເປັນຕົ້ນມາ ໂດຍມີ
ສັນຍາ 25 ປີ ຊຶ່ງກໍຈະເຮັດໃຫ້ລັດຖະບານລາວມີລາຍຮັບຈາກຄ່າສໍາປະທານແລະພາສີອາ
ກອນຕ່າງໆລວມກັນເຖິງ 2,000 ໂດລາ ທີ່ທາງການລາວໄດ້ປະກາດວ່າ ຈະນໍາໃຊ້ເປັນງົບ
ປະມານສໍາລັບດໍາເນີນໂຄງການພັດທະນາຕ່າງໆ ເພື່ອແກ້ໄຂບັນຫາທຸກຈົນຂອງປະຊາຊົນ ລາວເປັນສໍາຄັນ.
ຫາກແຕ່ວ່າການທີ່ພະລັງງານໄຟຟ້າສ່ວນໃຫຍ່ທີ່ຜະລິດໄດ້ຈາກເຂື່ອນນໍ້າເທີນ 2 ດັ່ງກ່າວນີ້ ໄດ້ສົ່ງອອກໄປໄທ ເປັນດ້ານຫລັກ ໃນຂະນະທີ່ພາຍໃນລາວເອງກໍມີຄວາມຕ້ອງການຊົມໃຊ້ໄຟຟ້າເພີ່ມຂຶ້ນທຸກໆປີ ຈຶ່ງເຮັດໃຫ້ລາວ ຕ້ອງຊື້ພະລັງງານໄຟຟ້າຄືນຈາກໄທເພີ່ມຂຶ້ນທຸກປີເຊັ່ນດຽວກັນ.
