ປະເທດ ລາວ ນອກຈາກຈະຮັບມືກັບໄວຣັສໂຄໂຣນາແລ້ວ, ເຂົາເຈົ້າຍັງຕ້ອງໄດ້ຮັບມືກັບການຕິດເຊື້ອມາເລເຣຍ ຫຼື ໄຂ້ຍຸງໃນເວລາດຽວກັນ, ເຊິ່ງການຕິດເຊື້ອມາເລເຣຍ ໄດ້ເປັນບັນຫາມາແຕ່ດົນນານໃນປະເທດດັ່ງກ່າວ.
ປະເທດລາວ ຕັ້ງຢູ່ເຂດທີ່ມີພູມອາກາດຮ້ອນຊຸ່ມ ແລະ ອົບເອົ້າ, ເຊິ່ງເໝາະສົມສຳລັບການແຜ່ພັນຂອງຍຸງ.
ດຣ. ສີສະຫວາດ ສຸດທານີລະໄຊ, ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກໄດ້ກ່າວໃນພຸດມື້ນີ້ວ່າ “ໃນວັນທີ 29 (ກັນຍາ) 2020, ພວກເຮົາມີຜູ້ຕິດເຊື້ອທັງໝົດແມ່ນ 41 ກໍລະນີ, ລະກະບໍ່ມີກໍລະນີເສຍ ຊີວິດ. ນັບແຕ່ເດືອນ 1 ມາເຖິງປັດຈຸບັນມີຕົວເລກສະສົມການຕິດເຊື້ອໄຂ້ຍຸງລາຍ 6,812 ຄົນ. ລະກະມີລາຍງານກໍລະນີຢູ່ໃນ 18 ແຂວງ, ໝາຍຄວາມວ່າຢູ່ໃນທົ່ວປະເທດ.”
ທ່ານໄດ້ກ່າວຕື່ມອີກວ່າແຂວງທີ່ມີການລາຍງານການຕິດເຊື້ອຫຼາຍກວ່າໝູ່ແມ່ນນະຄອນຫຼວງວຽງຈັນ, ຕາມດ້ວຍແຂວງບໍລິຄຳໄຊ, ບໍ່ແກ້ວ, ແຂວງວຽງຈັນ. ຈຳນວນຜູ້ເສຍຊີວິດຍ້ອນພະຍາດໄຂ້ຍຸງລາຍນັບຕັ້ງແຕ່ເດືອນມັງກອນເປັນຕົ້ນມາແມ່ນ 12 ຄົນ. ເຊິ່ງຜູ້ເສຍຊີວິດທັງໝົດແມ່ນຢູນະຄອນ ຫຼວງ ວຽງຈັນ 4 ຄົນ, ບໍລິຄຳໄຊ 2 ຄົນ, ຄຳມ່ວນ 2 ຄົນ, ໄຊຍະບູລີ 1 ຄົນ, ຊຽງຂວາງ 1 ຄົນ, ສະຫວັນນະເຂດ 1 ຄົນ ແລະ ຜົ້ງສາລີ 1 ຄົນ.
ສຳລັບຜູ້ເສຍຊີວິດຄົນທີ 12 ນັ້ນເປັນເພດຊາຍ ອາຍຸ 40 ປີ, ຢູ່ບ້ານຫຍໍ້ ເມືອງ ບຸນເໜືອ ແຂວງຜົ້ງສາລີ.”
ການຕິດໄຂ້ມາເລເຣຍຈະເພີ່ມຂຶ້ນຫຼາຍທີ່ສຸດໃນຊ່ວງລະດູຝົນ, ແລະ ເພື່ອປ້ອງ ກັນການຕິດໄຂ້ມາເລເຣຍນັ້ນ ກໍແມ່ນຫຼີກລ່ຽງການຖືກຍຸງກັດເຊັ່ນ ນອນໃນມຸ້ງ, ທາຢາກັນຍຸງ ແລະ ທຳລາຍແຫຼ່ງກຳເນີດຂອງຍຸງ.
ສຳລັບສະພາບການໄວຣັສໂຄໂຣນາໃນ ລາວ ນັ້ນ, ຜູ້ຕິດເຊື້ອແມ່ນຍັງມີ 13 ກໍລະນີຢູ່ຄືເກົ່າ, ແລະ ຜູ້ຕິດເຊື້ອຄົນທີ 13 ນັ້ນແມ່ນຍັງໄດ້ສືບຕໍ່ຮັບການປິ່ນປົວຢູ່ໂຮງໝໍ ແລະ ກໍມີສຸຂະພາບແຂງແຮງດີ ອີງຕາມການກ່າວຂອງ ດຣ. ສີສະຫວາດ ສຸດທານີລະໄຊ.
