ການນຳໃຊ້ນ້ຳມັນເຊື້ອໄຟຂອງລາວ ມີປະລິມານເພີ່ມສູງຂື້ນຢ່າງຕໍ່ເນຶ່ອງ ຄືສຳຫລັບໃນປີຜ່ານມານີ້ ປາກົດວ່າລາວໄດ້ນຳເຂົ້ານ້ຳມັນເຊື້ອໄຟຈາກຕ່າງປະເທດຫລາຍກວ່າ 600 ລ້ານລິດ ໂດຍມີສາເຫດທີ່ສຳຄັນມາຈາກການເພີ່ມຂື້ນຂອງຍວດຍານພາຫະນະແລະການລົງທືນຈາກຕ່າງປະເທດ
ເຈົ້າໜ້າທີ່ຂັ້ນສູງໃນລັດວິສາຫະກິດນ້ຳມັນເຊື້ອໄຟຂອງລາວໄດ້ໃຫ້ການຢືນຢັນວ່າການນຳເຂົ້ານ້ຳ ມັນເຊື້ອໄຟຈາກຕ່າງປະເທດຂອງລາວມີປະລິມານເພີ່ມສູງຂື້ນຢ່າງຕໍ່ເນຶ່ອງ ໂດຍເຖິງແມ່ນວ່າໃນປີ ຜ່ານມາແລະປີນີ້ ລາວຈະຍັງຄົງຕ້ອງປະເຊີນກັນຜົນກະທົບຈາກບັນຫາວິກິດການທາງເສດຖະກິດ ການເງິນເຊັ່ນດຽວກັນກັບທຸກປະເທດທົ່ວໂລກກໍຕາມ ຫາກແຕ່ກໍປາກົດວ່າລາວຍັງຄົງມີການນຳເຂົ້າ ນ້ຳມັນເຊື້ອໄຟຈາກຕ່າງປະເທດຄິດເປັນປະລິມານຫລາຍກວ່າ 600 ລິດໃນປີ 2009 ທີ່ຜ່ານມາ ແລະໃນຊ່ວງໄຕຣມາດທຳອິດຂອງປີ 2010 ນີ້ ການນຳເຂົ້ານ້ຳມັນເຊື້ອໄຟກໍຍັງເພີ່ມຂື້ນຈາກລະ ຍະດຽວກັນຂອງປີຜ່ານມາເຖິງເກືອບ 20 ເປີເຊັນ. ໂດຍສາເຫດທີ່ສຳຄັນທີ່ເຮັດໃຫ້ລາວຕ້ອງນຳເຂົ້ານ້ຳມັນເຊື້ອໄຟຈາກຕ່າງປະເທດເພີ່ມສູງຂື້ນດັ່ງກ່າວນັ້ນ ຍ້ອນວ່າມີການລົງທຶນຈາກຕ່າງປະເທດໃນລາວຫລາຍຂື້ນທຸກປີ ແລະກໍສົມທົບດ້ວຍການທີ່ລາວເອງກໍມີການນຳເຂົ້າຍວດຍານພາຫະນະຈາກຕ່າງປະເທດເພີ່ມຂື້ນຢ່າງຕໍ່ເນຶ່ອງດ້ວຍ ຈຶ່ງເຮັດໃຫ້ມີຄວາມຮຽກຮ້ອງຕ້ອງການນ້ຳມັນເຊື້ອ ໄຟພາຍໃນປະເທດເພີ່ມສູງຂື້ນດ້ວຍນັ້ນເອງ.
ສຳຫລັບພາກສ່ວນທີ່ໄດ້ມີການນຳເຂົ້ານ້ຳມັນເຊື້ອໄຟຈາກຕ່າງປະເທດຫລາຍທີ່ສຸດໃນນັ້ນກໍຄືລັດວິສາຫະກິດນ້ຳມັນເຊື້ອໄຟຂອງລັດຖະບານລາວ ແລະໃນຂະນະດຽວກັນກໍຍັງຄົງເປັນຜູ້ປະກອບການຄ້ານ້ຳມັນເຊື້ອໄຟທີ່ຄອງສ່ວນແບ່ງຕະຫລາດໃນລາວຫລາຍທີ່ສຸດ ດັ່ງທ່ີເຈົ້າໜ້າທີ່ຂັ້ນສູງໃນລັດວິສາຫະກິດນ້ຳມັນເຊື້ອໄຟຂອງລັດຖະບານລາວ ໄດ້ໃຫ້ການຊີ້ແຈງເຖິງສະພາບການດັ່ງກ່າວໃນຕອນນຶ່ງວ່າ:
ໃນໄລຍະ 6 ເດືອນທຳອິດຂອງແຜນການປະຈຳປີ 2009-2010 ກໍຄືຈາກເດືອນຕຸລາປີ 2009 ຫາເດືອນມີນາ ປີ 2010 ນີ້ ລາວໄດ້ນຳເຂົ້າສິນຄ້າຈາກຕ່າງປະເທດຄິດເປັນມູນຄ່າລວມເຖິງ 526 ລ້ານໂດລາສະຫະລັດ ຫລືຄິດເປັນ 50 ເປີເຊັນຂອງເປົ້າໝາຍຕະຫລອດແຜນການປະຈຳປີ ດັ່ງກ່າວນີ້ ໂດຍນອກຈາກນ້ຳມັນເຊື້ອໄຟແລ້ວ ສິນຄ້າທີ່ລາວນຳເຂົ້າຈາກຕ່າງປະເທດເປັນສ່ວນ ໃຫຍ່ນັ້ນກໍຍັງຄົງເປັນສິນຄ້າອຸບປະໂພກບໍລິໂພກ ເພາະວ່າການຜະລິດພາຍໃນປະເທດຍັງຄົງບໍ່ ພຽງພໍການຄວາມຮຽກຮ້ອງຕ້ອງການທີ່ເປັນຈິງນັ້ນເອງ.
