ຫົວໜ້າຄະນະໂຄສະນາອົບລົມສູນກາງພັກປະຊາຊົນປະຕິວັດລາວ ຮຽກຮ້ອງໃຫ້ ຊາວລາວເຜົ່າມົ້ງ ເຊຶ່ອຟັງເຈົ້າໜ້າທີ່ຂອງທາງການລາວ ແລະຢ່າໄປຫລົງເຊື່ອ ການໃຫ້ຂໍ້ມູນທີ່ບໍ່ເປັນຄວາມຈິງຈາກພາຍນອກປະເທດ.
"ຂໍໃຫ້ພີ່ນ້ອງພວກເຮົາຟັງຄວາມການຈັດຕັ້ງ ເພາະວ່າຢູ່ນີ່ ມີເຈົ້າເມືອງ ມີຫົວໜ້າກຸ່ມ ມີນາຍບ້ານ. ສະນັ້ນ ເລື່ອງຮ້າຍເລື່ອງດີທັງໝົດ ຂໍໃຫ້ຟັງ ຄວາມນາຍບ້ານ ຟັງຄວາມກຸ່ມ ບໍ່ໃຫ້ໄປຟັງຄົນອື່ນທີ່ຢູ່ບ່ອນອື່ນ. ມາເວົ້າແນວໃດ ກໍບໍ່ໃຫ້ຟັງ. ໃຫ້ຟັງຄວາມນາຍບ້ານ ຟັງຄວາມເຈົ້າເມືອງ ຟັງຄວາມຫົວໜ້າກຸ່ມ ພາຍໃຕ້ຄຳອະທິບາຍຊີ້ນຳຂອງເພິ່ນ..."
ນີ້ກໍແມ່ນການຖະແຫລງໂດຍທ່ານພັນດວງ ຈິດວົງສາ ຫົວໜ້າຄະນະໂຄສະນາອົບລົມສູນ ກາງພັກປະຊາຊົນປະຕິວັດລາວໃນໂອກາດ ທີ່ທ່ານໄດ້ເດີນ ທາງໄປຢ້ຽມຢາມຊາວລາວເຜົ່າ ມົ້ງທີ່ຖືກສົ່ງກັບຄືນຈາກປະເທດໄທ. ໂດຍການຖະແຫລງດັ່ງກ່າວຂອງທ່ານພັນດວງຈິດນີ້ ນອກຈາກຈະເປັນການ ຮຽກຮ້ອງ ຂໍໃຫ້ຊາວເຜົ້າມົ້ງໃຫ້ການເຊື່ອໝັ້ນແລະເຊື່ອຟັງ ເຈົ້າໜ້າທີ່ຂອງທາງການລາວ ເພື່ອເຮັດໃຫ້ການແກ້ໄຂບັນຫາຂອງ ຊາວເຜົ່າມົ້ງ ສາມາດດຳເນີນໄປໄດ້ຢ່າງມີປະສິດທິພາບແລ້ວ ກໍຍັງໄດ້ແນໃສ່ການ ສະກັດກັ້ນບັນດາຂໍ້ມູນຂ່າວສານຈາກພາຍນອກ ທີ່ຈະເຮັດໃຫ້ຊາວເຜົ່າມົ້ງ ຫລົງເຊື່ອ ອັນຈະສົ່ງຜົນກະທົບຕໍ່ມາດຕະການການແກ້ໄຂບັນຫາຂອງຊາວເຜົ່າມົ້ງໃນລາວອີກດ້ວຍ.
ໃນປັດຈຸບັນ ທາງການລາວກໍກຳລັງເລັ່ງມືດຳເນີນການກໍ່ສ້າງເຮືອນພ້ອມດ້ວຍນ້ຳດື່ມ ນ້ຳໃຊ້ ແລະສ້ວມຖ່າຍ ທາງຊອຍ ທາງໃຫຍ່ ສຸກສາລາ ແລະ ໂຮງຮຽນຢ່າງຕັ້ງໜ້າ ແລະ ໃນຂະນະດຽວກັນກໍໄດ້ຈັດສັນທີ່ດິນທຳກິນດ້ວຍການແບ່ງເນື້ອທີ່ອອກເປັນຕອນໆຈຳນວນ ທັງໝົດ 63 ຕອນ ເທິງ ເນື້ອທີ່ກວ້າງກວ່າ 1,200 ເຮັກຕ້າ ແລະໄດ້ຈັດສັນໃຫ້ກັບຊາວເຜົ່າ ມົ້ງ 10 ຄອບຄົວຕໍ່ຕອນ ຫລືສະເລັ່ຍໄດ້ 2 ເຮັກຕ້າຕໍ່ຄອບຄົວ ດ້ວຍເປົ້າໝາຍ ທີ່ຈະບຸກ ເບີກພື້ນທີ່ໃຫ້ສຳເລັດໃນເດືອນເມສາ ເພື່ອໃຫ້ທັນກັບລະດູຝົນປີ 2010 ນີ້. ນອກຈາກນັ້ນ ທາງການລາວກໍວາງແຜນການ ທີ່ດຳເນີນການ ກໍ່ສ້າງຄອງຊົນລະປະທານ ທີ່ ຈະສາມາດຕອບສະໜອງນ້ຳໃຫ້ກັບພື້ນທີ່ການກະເສດໄດ້ເຖິງ 1,700 ເຮັກຕ້າຕະຫລອດປີ ກັບທັງຍັງຈະເຊື່ອມຕໍ່ສາຍ ສົ່ງກະແສໄຟຟ້າຟີເປັນເວລາ 1 ປີ ແລະຊາວເຜົ່າມົ້ງແຕ່ລະຄົນ ກໍຈະໄດ້ຮັບການຊ່ວຍເຫລືອເຂົ້າກິນ 18 ກິໂລຕໍ່ເດືອນ ເປັນເວລາ 1 ປີເຊັ່ນດຽວກັນ.
ບັນດາຊາວເຜົ່າມົ້ງໄດ້ພາກັນເດີນທາງອອກຈາກບລາວໄປພັກອາໃສຢູ່ບ້ານຫ້ວຍນ້ຳຂາວຕັ້ງ ແຕ່ປີ 2004 ດ້ວຍຫວັງງ່າຈະມີໂອກາດ ເດີນທາງໄປ ຕັ້ງຖິ່ນຖານໃໝ່ຢູ່ໃນສະຫະລັດ ຄືກັບ ຊາວເຜົ່າມົ້ງຈຳນວນ 15,000 ກວ່າຄົນທີ່ເຄີຍໄດ້ພັກອາໃສຢູ່ວັດຖ້ຳກະບອກນັ້ນ ຫາກແຕ່ ພວກເຂົາເຈົ້າກໍບໍ່ ມີໂອກາດດັ່ງກ່າວແລ້ວ ເພາະທາງການສະຫະລັດບໍ່ມີແຜນການຮັບເອົາ ຊາວເຜົ່າມົ້ງອີກ ໂດຍນັບຈາກປີ 2006 ຈົນເຖິງວັນທີ່ 29 ເດືອນທັນວາ ປີ 2009 ຊຶ່ງກໍປາກົດວ່າ ມີຊາວເຜົ່າມົ້ງທີ່ຖືກສົ່ງກັບຄືນໄປລາວທັງໝົດ 7,761 ຄົນ.
