ທ່ານສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ປະຈໍາການຄະນະລັດຖະ
ບານລາວ ໄດ້ຖະແຫລງເຖິງເປົ້າໝາຍຂອງລັດຖະບານລາວ ກ່ຽວກັບເສີມຂະຫຍາຍ
ການຜະລິດສະບຽງອາຫານ ແລະສິນຄ້າພາຍໃນລາວ ຈາກປັດຈຸບັນໄປຈົນເຖິງປີ 2015
ວ່າເປົ້າໝາຍສໍາຄັນທີ່ສຸດກໍຄື ການຮັບປະກັນໃຫ້ໄດ້ຢ່າງຄັກແນ່ວ່າ ລາວມີຜົນຜະລິດ ດ້ານສະບຽງອາຫານຢ່າງພຽງພໍ ກັບການບໍລິໂພກພາຍໃນປະເທດ ແລະ ສາມາດເພີ້ມ
ການສົ່ງອອກສິນຄ້າ ເພື່ອເຮັດໃຫ້ລາວບໍ່ຕ້ອງປະເຊີນກັບບັນຫາຂາດດຸນການຄ້າຕ່າງ
ປະເທດອີກຕໍ່ໄປ.
ການທີ່ຈະເຮັດໃຫ້ສາມາດບັນລຸເປົ້າໝາຍດັ່ງກ່າວໄດ້ຢ່າງແທ້ຈິງນັ້ນ ກໍຄືການສົ່ງເສີມ ເພື່ອ
ເພີ້ມຜົນຜະລິດສິນຄ້າກະສິກໍາ ແລະສິນຄ້າປຸງແຕ່ງຊະນິດຕ່າງໆ ເພື່ອສົ່ງອອກໄປຕ່າງ ປະເທດໃຫ້ໄດ້ຫລາຍຂຶ້ນຢ່າງຕໍ່ເນື່ອງ ຊຶ່ງລວມທັງການເພີ້ມຜົນຜະລິດເຂົ້າ ເພື່ອສົ່ງອອກໃຫ້
ໄດ້ລະຫວ່າງ 8 ແສນໂຕນໃນປີ 2015 ອີກດ້ວຍ ດັ່ງທີ່ທ່ານ ສົມສະຫວາດໄດ້ຖະແຫລງຊີ້
ແຈງໃນຕອນນຶ່ງວ່າ:
“ດ້ານສະບຽງອາຫານເຖິງປີ
2015 ຜະລິດເຂົ້າໃຫ້ບັນລຸ
4.2 ລ້ານໂຕນ ສູ້ຊົນຜະລິດ
ຊີ້ນໃຫ້ໄດ້ 221,500 ໂຕນ
ຕໍ່ປີ ແລະສັດນໍ້າໃຫ້ໄດ້
157,200 ໂຕນຕໍ່ປີ ດ້ານ
ການຜະລິດເປັນສິນຄ້າ ສູ້
ຊົນຜະລິດເຂົ້າເພື່ອສົ່ງອອກ
ໃຫ້ໄດ້ປະມານ 8 ແສນເຖິງ
1 ລ້ານໂຕນ ຕໍ່ປີ.”
ແຕ່ຢ່າງໃດກໍຕາມ ສໍາລັບໃນໄລຍະ 6 ເດືອນທຳອິດຂອງແຜນການ 2010–2011 ກໍຄືນັບ
ຈາກເດືອນຕຸລາ 2010 ເຖິງມີນາ 2011 ທີ່ຜ່ານມານີ້ ກໍປາກົດວ່າລາວຕ້ອງປະເຊີນກັບສະ
ພາວະຂາດດຸນການຄ້າຕ່າງປະເທດເພີ່ມຂຶ້ນເຖິງ 48% ຖ້າທຽບກັບໄລຍະດຽວກັນກັບ
ແຜນການປີ 2009–2010.
ຊຶ່ງກໍຄືໃນຂະນະທີ່ລາວໄດ້ສົ່ງອອກສິນຄ້າໄປຕ່າງປະເທດຄິດເປັນມູນຄ່າລວມ 836 ລ້ານ
ໂດລາ ຫຼື ເປັນ 68% ຂອງແຜນການຕະຫຼອດປີນັ້ນ ກໍປະກົດວ່າ ໄດ້ມີການນຳເຂົ້າສິນ
ຄ້າຈາກຕ່າງປະເທດໃນມູນຄ່າລວມເຖິງ 1,047 ລ້ານໂດລາ ຫຼືຄິດເປັນ 83% ຂອງແຜນ
ການຕະຫຼອດປີ ຈຶ່ງເຮັດໃຫ້ລາວ ຕ້ອງປະເຊີນກັບສະພາວະຂາດດຸນການຄ້າຕ່າງປະເທດ
ຄິດເປັນມູນຄ່າລວມເຖິງ 211 ລ້ານໂດລາ ນັ້ນເອງ.
ທັງນີ້ ອິງຕາມລາຍງານຂອງ
ກະຊວງແຜນການ ແລະການ
ລົງທຶນຂອງລາວດັ່ງກ່າວນີ້
ຍັງໄດ້ລະບຸອີກດ້ວຍວ່າ ສາ
ເຫດທີ່ເຮັດໃຫ້ລາວຕ້ອງປະ
ເຊີນກັບສະພາວະຂາດດຸນ
ການຄ້າຕ່າງປະເທດຫຼາຍທີ່
ສຸດນັ້ນກໍແມ່ນການນຳເຂົ້າສິນ
ຄ້າອຸປະໂພກ, ບໍລິໂພກທີ່
ກວາມເອົາເຖິງ 72% ຂອງມູນ
ຄ່າການນໍາເຂົ້າທັງໝົດ ໂດຍ
ສະເພາະແມ່ນນໍ້າມັນເຊື້ອໄຟນັ້ນ
ຖືເປັນສິນຄ້ານໍາເຂົ້າທີ່ເຮັດໃຫ້ລາວຕ້ອງຂາດດຸນການຄ້າຕ່າງປະເທດເພີ່ມຂຶ້ນຫຼາຍທີ່ສຸດ.
ທາງດ້ານທ່ານຄໍາຈັນ ລັດຕະນະວົງ, ປະທານສະມາຄົມນໍ້າມັນເຊື້ອໄຟແລະອາຍແກັສລາວ
ກໍໄດ້ໃຫ້ການຢືນຢັນວ່າ ການຊົມໃຊ້ນໍ້າມັນເຊື້ອໄຟຢູ່ໃນລາວໄດ້ເພີ້ມຫລາຍຂຶ້ນທຸກປີ. ສໍາລັບ
ໃນຕະຫລອດປີ 2011 ນີ້ ກໍຄາດໝາຍວ່າລາວຈະນໍາເຂົ້ານໍ້າມັນເຊື້ອໄຟຈາກຕ່າງປະເທດ
ໃນປະລິມານລວມເກີນກວ່າ 750 ລ້ານລິດ.
ຍິ່ງໄປກວ່ານັ້ນ ການທີ່ທາງການລາວ ໄດ້ອະນຸມັດໃຫ້ມີການປັບຂຶ້ນລາຄານໍ້າມັນເຊື້ອໄຟ
ທຸກຊະໜິດ ໃນປະເທດລາວຂຶ້ນເຖິງ 10 ຄັ້ງແລ້ວ ນັບແຕ່ຕົ້ນປີ 2011 ເປັນຕົ້ນມາກໍບໍ່ພຽງ
ແຕ່ຈະເຮັດໃຫ້ປະຊາຊົນລາວຕ້ອງໄດ້ແບກຫາບພາລະລາຄານໍ້າມັນ ທີ່ແພງຫລາຍຂຶ້ນຢ່າງ
ຕໍ່ເນື່ອງເທົ່ານັ້ນ ແຕ່ຍັງສົ່ງຜົນເຮັດໃຫ້ສິນຄ້າອຸປະໂພກແພງຂຶ້ນອີກດ້ວຍ.
ອິງຕາມລາຍງານຂອງສໍານັກງານສະຖິຕິແຫ່ງຊາດລາວກໍໄດ້ລະບຸວ່າ ໃນຊ່ວງເດືອນພຶດ
ສະພາທີ່ຜ່ານມາ ສະພາບເງິນເຟີ້ໃນລາວໄດ້ປັບຕົວສູງຂຶ້ນເຖິງ 9.76% ຊຶ່ງກໍມີຜົນເນື່ອງ
ມາຈາກການທີ່ໄດ້ການປັບລາຄາສິນຄ້າ ອຸປໂພກ ບໍລິໂພກຂຶ້ນໃນອັດຕາສະເລ່ຍເຖິງ
14.7% ແລະຜູ້ທີ່ຈະຕ້ອງປະເຊີນກັບບັນຫາດັ່ງກ່າວນີ້ ຢ່າງຫລີກລ່ຽງບໍ່ໄດ້ ກໍຄືປະຊາຊົນ ລາວໃນທົ່ວປະເທດນັ້ນເອງ.
