ເຈົ້າໜ້າທີ່ຂັ້ນສູງໃນກະຊວງການຕ່າງປະເທດຂອງລາວ ໄດ້ໃຫ້ການຢືນຢັນວ່າ ຄະນະລັດຖະບານໄດ້ມີມະຕິຕົກລົງອະນຸ ມັດແຜນການຍົກເວັ້ນການເກັບຄ່າທໍານຽມ ການຂໍວິຊ່າໃຫ້ ກັບບັນດາຄົນລາວໃນຕ່າງປະເທດທີ່ຕ້ອງການຈະເດີນທາງ ກັບຄືນມາລາວ ໃນໂອກາດການສະເຫລີມສະຫລອງການສະຖາປະນາວຽງຈັນ ເປັນນະຄອນຫລວງຂອງລາວຄົບຮອບ 450 ປີ ຢ່າງເປັນທາງການແລ້ວ ໃນຂະນະນີ້.
ໂດຍມີມະຕິຕົກລົງດັ່ງກ່າວນີ້ກໍຈະເປັນຜົນເຮັດໃຫ້ຄົນລາວໃນຕ່າງປະເທດສາມາດທີ່ຈະໄປຍື່ນຄໍາຮ້ອງເພື່ອຂໍວິຊ່າຈາກສະຖານທູດລາວໃນຕ່າງປະເທດໄດ້ໂດຍບໍ່ຕ້ອງເສຍຄ່າທໍານຽມແຕ່ຢ່າງໃດ ຖ້າຫາກວ່າເປັນການຍື່ນຄໍາຮ້ອງຕໍ່ສະຖານທູດລາວໃນຕ່າງປະເທດລະຫວ່າງວັນທີ່ວັນທີ່ 1-15 ເດືອນພະ ຈິກ ສ່ວນຄົນລາວໃນຕ່າງປະເທດທີ່ບໍ່ສາມາດຍື່ນຄໍາຮ້ອງໄດ້ໃນຊ່ວງດັ່ງກ່າວນັ້ນ ກໍສາມາດ ທີ່ຈະຂໍວິຊ່າຈາກຫ້ອງການກວດຄົນເຂົ້າເມືອງທີ່ປະຈໍາຢູ່ດ່ານຊາຍແດນຂອງທາງການລາວໄດ້ໃນລະຫວ່າງວັນທີ່ 15-21 ເດືອນພະຈິກໂດຍບໍ່ຕ້ອງເສຍຄ່າທໍານຽມແຕ່ຢ່າງໃດເຊັ່ນດຽວກັນ.
ກ່ອນໜ້ານີ້ ທ່ານຫຽມ ພົມມະຈັນ ລັດຖະມົນຊ່ວຍວ່າການຕ່າງປະເທດລາວໄດ້ໃຫ້ການຢືນ ຢັນວ່າທາງການລາວຈະໃຫ້ການສະນັບສະນຸນສົ່ງເສີມແລະອໍານວຍຄວາມສະດວກໃນທຸກໆດ້ານແກ່ຄົນລາວໃນຕ່າງປະເທດ ທີ່ຕ້ອງການຈະເດີນທາງກັບຄືນມາລາວ ໂດຍໃນໄລຍະນີ້ ກໍເປັນການດໍາເນີນການປະຕິບັດໃນຂັ້ນເບື້ອງຕົ້ນເທົ່ານັ້ນ ດັ່ງທີ່ທ່ານຫຽມໄດ້ໃຫ້ການຊີ້ແຈງໃນຕອນນຶ່ງວ່າ:
“ໃນເບຶ້ອງຕົ້ນນີ້ ພວກເຮົາຈະອໍານວຍຄວາມສະດວກໃນການໄປການມາ ການຢ້ຽມ ການຢາມ ການແຕ່ງດອງລະຫວ່າງຄົນລາວ ໃນກັບຄົນລາວຢູ່ນອກ ຫລືວ່າການ ມາຢູ່ລາວຢ່າງຖາວອນຂອງເຂົາເຈົ້ານັ້ນ ພວກເຮົາກໍຈະອໍານວຍຄວາມສະດວກໃຫ້ ພວກເຂົາ ເຈົ້າທາງດ້ານນິຕິກໍາໃນລັກສະນະທີ່ວ່າ ພວກເຂົາເຈົ້າຢູ່ກໍມີຜົນປະໂຍດ ເພາະວ່າພວກເຂົາເຈົ້າມີສັນຊາດໃໝ່ແລ້ວ ກໍບໍ່ໃຫ້ເສຍສັນຊາດ ລວມທັງພວກເຂົາ ເຈົ້າກໍຄວນມີກໍາມະສິດແນວໃດແນວນຶ່ງ ໃນບ່ອນຢູ່ບ່ອນອາໃສໃນລາວ ໂດຍໃນ ເວລານີ້ ພວກເຮົາກໍໄດ້ວາງຮ່າງນະໂຍບາຍລະອຽດ ຈຳນວນນຶ່ງ ໄວ້ແລ້ວ”
ທັງນີ້ໂດຍນີຕິກໍາທີ່ສໍາຄັນອັນນຶ່ງທີ່ທາງກະຊວງຕ່າງປະເທດຂອງລາວ ໄດ້ດໍາເນີນການຮ່າງ ແລະ ຈັດທໍາສໍາເລັດຮຽບຮ້ອຍແລ້ວ ໂດຍຍັງຄົງລໍຖ້າພຽງການອະນຸມັດຈາກນາຍົກລັດຖະ ມົນຕີ ຢ່າງເປັນທາງການເທົ່ານັ້ນໃນຂະນະນີ້ ກໍຄືດໍາລັດວ່າດ້ວຍການໃຫ້ສິດທິໃນການຖື ຄອງ ແລະເປັນເຈົ້າຂອງທີ່ດິນໃນລາວໃຫ້ແກ່ຄົນລາວໃນຕ່າງປະເທດ ທີ່ຕ້ອງການຈະເດີນ ທາງກັບຄືນມາຢູ່ໃນລາວຢ່າງຖາວອນ ຫລືວ່າຢູໃນລາວແບບໄລຍະຍາວ.
ທາງການລັດຖະບານລາວໄດ້ປະກາດການດໍາເນີນການນະໂຍບາຍ ເພື່ອດຶງດູດເອົາຄົນລາວ ໃນຕ່າງປະເທດກັບຄືນມາລາວ ນັບແຕ່ທ້າຍປີ 2009 ເປັນຕົ້ນມາ ດ້ວຍຫວັງວ່າຄົນລາວໃນ ຕ່າງປະເທດນັ້ນ ຈະປະກອບສ່ວນຢ່າງສຳຄັນເຂົ້າໃນການພັດທະນາປະເທດລາວໃຫ້ມີຄວາມ ຈະເຣີນກ້າວໜ້າຍິ່ງໆຂຶ້ນໄປ ເນຶ່ອງຈາກວ່າມີຄົນລາວໃນຕ່າງປະເທດ ຈໍານວນບໍ່ໜ້ອຍ ທີ່ມີ ຄວາມຮູ້ຄວາມສາມາດໃນວິດທະຍາການສະໄໝໃໝ່ ລວມທັງຍັງມີເງິນທຶນທີ່ສາມາດຈະນໍາ ເຂົ້າມາລົງທຶນໃນລາວໄດ້ ຫລາຍຂຶ້ນນັບມື້ອີກດ້ວຍ.
ກ່ອນໜ້ານີ້ ສະມາຊິກສະພາແຫ່ງຊາດລາວກໍໄດ້ມີມະຕິຮັບຮອງເອົາການດັດແກ້ກົດໝາຍ ວ່າດ້ວຍການລົງທຶນຈາກຕ່າງປະເທດໃນລາວໄປແລ້ວ ໂດຍໄດ້ມີການບັນຢັດໄວ້ໃນກົດໝາຍ ດັ່ງກ່າວຢ່າງແຈ່ມແຈ້ງວ່າ ບັນດານັກທຸລະກິດຊາວຕ່າງປະເທດທີ່ມີມູນຄ່າການລົງທຶນໃນລາວ ຕັ້ງແຕ່ 500,000 ໂດລາຂຶ້ນໄປນັ້ນ ຍ່ອມມີສິດຖືຄອງແລະເປັນເຈົ້າຂອງອາຄານທີ່ດິນແລະ ອະສັງຫາລິມະຊັບຕ່າງໆຢູ່ໃນລາວໄດ້ ຕາມພື້ນທີ່ຫລືເຂດທີ່ທາງການລາວໄດ້ກໍານົດ ແລະ ອະນຸຍາດໄວ້ດັ່ງກ່າວ.
ຫາກແຕ່ວ່າສໍາລັບຄົນລາວໃນຕ່າງປະເທດແລ້ວ ຍັງຈະມີສິດທີ່ດີກວ່ານັກທຸລະກິດຊາວຕ່າງ ປະເທດ ຊຶ່ງກໍຄືຄົນລາວໃນຕ່າງປະເທດນັ້ນ ອາດບໍ່ຈໍາເປັນ ທີ່ຈະຕ້ອງມີມູນຄ່າການລົງທຶນ ໃນລາວ ເຖິງ 500,000 ໂດລາ ຄືກັບນັກທຸລະກິດຊາວຕ່າງປະເທດດັ່ງກ່າວ ກໍສາມາດທີ່ ຈະມີສິດຖືຄອງແລະເປັນເຈົ້າຂອງອາຄານທີ່ດິນ ແລະອະສັງຫາລິມະຊັບຕ່າງໆຢູ່ໃນລາວໄດ້ ແລ້ວນັ້ນເອງ.
