ລັດຖະບານລາວ ອະນຸມັດໃຫ້ເພີ້ມຄ່າຈ້າງ ຂັ້ນຕ່ຳເປັນ 2.5 ລ້ານກີບ ຕໍ່ເດືອນ ນັບຈາກວັນທີ 1 ຕຸລາ 2024 ເປັນຕົ້ນໄປ ແຕ່ແຮງງານລາວ ກໍຍັງສືບຕໍ່ເດີນທາງໄປປະເທດໄທ ເພີ່ມຫຼາຍຂຶ້ນນັບມື້.
ຄະນະກຳມະການແຮງງານແຫ່ງຊາດ ໂດຍການເປັນປະທານຂອງ ທ່ານນາງ ໃບຄຳ ຂັດຕິຍະ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ອອກປະກາດແຈ້ງການເລກທີ 3534 ລົງວັນທີ 27 ກັນຍາ 2024 ເພື່ອກຳນົດໃຫ້ຜູ້ໃຊ້ແຮງງານ ຫຼື ຜູ້ປະກອບການຂອງຫົວໜ່ວຍທຸລະກິດເອກະຊົນໃນທົ່ວປະເທດ ຈະຕ້ອງຈ່າຍເງິນອຸດໜູນຄ່າຄອງຊີບໃຫ້ກັບຜູ້ອອກແຮງງານ ໃນອັດຕາບໍ່ຕໍ່າກວ່າ 900,000 ກີບຕໍ່ຄົນຕໍ່ເດືອນ. ອັນຈະເຮັດໃຫ້ຜູ້ອອກແຮງງານມີລາຍຮັບບໍ່ຕໍ່າກວ່າ 2.5 ລ້ານກີບຕໍ່ເດືອນ ໂດຍບໍ່ລວມເງິນເຮັດວຽກເພິ່ມໂມງ ເງິນສະຫວັດດີການ ແລະ ເງິນນະໂຍບາຍອື່ນໆ ແຕ່ຍ່າງໃດ ໂດຍໃຫ້ແຈ້ງການມີຜົນສັກສິດນັບແຕ່ວັນທີ 1 ຕຸລາ 2024 ເປັນຕົ້ນໄປ.
ໂດຍການອອກແຈ້ງການຂອງ ຄະນະກຳມະການແຮງງານແຫ່ງຊາດລາວ ນອກຈາກຈະມີເປົ້າໝາຍເພື່ອບັນເທົາບັນຫາຜູ້ອອກແຮງງານໃນລາວມີລາຍໄດ້ບໍ່ພຽງພໍກັບການດຳລົງຊີວິດຕົວຈິງແລ້ວ.ຢັງແນໃສ່ການແກ້ໄຂບັນຫາທີ່ພາກທຸລະກິດໃນລາວປະສົບກັບບັນຫາຂາດແຄນແຮງງານຢ່າງໜັກໜ່ວງອີກດ້ວຍ ຍ້ອນວ່າແຮງງານລາວ ສ່ວນໃຫຍ່ ໄດ້ເດີນທາງໄປປະເທດໄທ ເພື່ອຊອກວຽກເຮັດ. ເຊິ່ງມີອັດຕາຄ່າຈ້າງຂັ້ນຕໍ່າສູງກວ່າຢູ່ລາວເຖິງ 3 ເທົ່າ ເພາະສະນັ້ນ ເຖິງວ່າທາງການລາວຈະເພີ່ມອັດຕາຄ່າຈ້າງຂັ້ນຕໍ່າໃນເທື່ອລ່າສຸດນີ້ ແຕ່ກໍຍັງເປັນອັດຕາຄ່າຈ້າງທີ່ຕ່ຳກວ່າຢູ່ໄທ ຈື່ງເຮັດໃຫ້ແຮງງານລາວ ສ່ວນໃຫຍ່ຍັງສືບຕໍ່ເດີນທາງໄປປະເທດໄທ ຫລາຍຂຶ້ນນັບມື້ ດັ່ງທີ່ແມ່ຄ້າຢູ່ຕະຫຼາດແຫ່ງຫນື່ງໃນນະຄອນຫຼວງວຽງຈັນ. ໄດ້ໃຫ້ການຢືນຢັນວ່າ:
“ຜົນກະທົບຫລາຍຢ້ອນເງິນນີ້ຫລະ ອີຫຍັງກະແພງ ແປ້ງນັວເຄີຍຊື້ 12 ມາຂຶ້ນເປັນ 14-15 ຫໍ່ນ້ອຍໆ ແຍ່ຢູ່. ລາຄາຮັບກະສູງຂຶ້ນ. ແຕ່ວ່າໃຜກະມາຕໍ່ແຕ່ລາຄາເກົ່າ ເຂົາເຄີຍຊື້ລາຄາເກົ່າ. ສົມມຸດວ່າ ເຂົ້າຈີ່ປາເຕ້ນີ້ຫນະ ຂຶ້ນ 10,000 ເຂົາກະມາຕໍ່ເປັນ 5,000-8,000-7,000 ຢູ່ນີ້ຫລະ ຂາຍບໍ່ໄດ້ ຍອມເສດຖະກິດທຸກມື້ອນີ້ຫນະ ແລ້ວລູກຫລານແມ່ກະແລ່ນໄປພູ້ນຫມົດແລ້ວ ໄປຝັ່ງນັ້ນຫມົດນັ້ນຫມົດແລ້ວ ໄປຂາຍແຮງງານ 6 ຄົນພູ້ນຫລະ ເດືອນຫນຶ່ງຄັນບໍ່ໄດ້ແທ້ໆ ກະແມ່ນ 12,000-14,000 ຄັນ 12,000 ກໍປະມານ 6 ລ້ານ ຄັນ 14,000 ກະ 7 ລ້ານແລ້ວເນ້າະ.”
ກ່ອນໜ້ານີ້ ລັດຖະບານໄທ ໄດ້ອະນຸຢາດໃຫ້ແຮງງານລາວ, ມຽນມາ ແລະ ກຳປູເຈຍ ຈຳນວນ 3 ແສນກວ່າຄົນໃຫ້ເຮັດວຽກຢູ່ໄທຕໍ່ໄປໄດ້ຮອດວັນທີ 13 ກຸມພາ 2025 ທັງນີ້ກໍຍ້ອນວ່າ ແຮງງານເຫຼົ່ານີ້ໄດ້ສິ້ນສຸດການອະນຸຍາດໃຫ້ເຮັດວຽກຢູ່ໄທ ຕັ້ງແຕ່ວັນທີ 31 ກໍລະກົດ 2023 ທີ່ຜ່ານມາແລ້ວ ແລະເມື່ອຮອດກຳນົດດັ່ງກ່າວ ກໍເຮັດໃຫ້ແຮງງານຈະຕ້ອງກັບຄືນປະເທດ. ແຕ່ນາຍຈ້າງໃນໄທ ບໍ່ສາມາດຈ້າງຄົນງານໃໝ່ໄດ້ທັນເວລາ, ສະນັ້ນ ຈຶ່ງຂະຫຍາຍເວລາເຮັດວຽກໃຫ້ຄົນງານລາວ ມຽນມາ ແລະ ກຳປູເຈຍດັງກ່າວ.
ສ່ວນ ທ່ານພິພັດ ຣັດຊະກິດປະການ ລັດຖະມົນຕີວ່າການກະຊວງແຮງງານ ຢືນຢັນວ່າ ລັດຖະບານໄທ ຍັງມີແຜນຈະເພີ່ມຄ່າຈ້າງຂັ້ນຕ່ຳໃຫ້ກັບແຮງງານເປັນ 400 ບາດຕໍ່ວັນ ໃນທ້າຍປີ 2024 ເຊິ່ງເປັນການຂຶ້ນຄ່າຈ້າງໃຫ້ແຮງງານທຸກຄົນ ເຖິງແມ່ນວ່າຈະຖືກນາຍຈ້າງໃນໄທຄັດຄ້ານໃນໄລຍະທີ່ຜ່ານມາກໍຕາມ ແຕ່ເຊື່ອວ່າ ຈະສາມາດຕົກລົງກັນໄດ້ ດັ່ງທີ່ ທ່ານພິພັດ ໃຫ້ການຢືນຢັນວ່າ:
“ເຮົາກໍຈະພະຍາຍາມເຮັດໃຫ້ໄດ້ຕາມກອບ ແຕ່ໃນສະພາບການໃນປັດຈຸບັນນີ້ ການທີ່ຈະປະກາດຂື້ນຄ່າຈ້າງ ກໍເຂົ້າໃຈ ແລະເຫັນໃຈ ຂ້າພະເຈົ້າເອງກໍໄດ້ໃຫ້ການສໍາພາດມາໂດຍຕະຫລອດວ່າ ຈະພະຍາຍາມເຮັດໃຫ້ສຳເລັດພາຍໃນ ວັນທີ 1 ຕຸລານີ້ ແຕ່ເມື່ອເກິດເຫດຄັດຂ້ອງ ທັ້ງຝ່າຍນາຍຈ້າງ ຝ່າຍລູກຈ້າງ ກໍຕ້ອງມີການເລື່ອນ.”
ນອກຈາກນີ້, ລັດຖະບານໄທ ຍັງໄດ້ຫຼຸດຄ່າວີຊາໃຫ້ແຮງງານລາວ, ມຽນມາ, ກຳປູເຈຍທຸກຄົນຈາກເດິມ 2,000 ບາດ ລົງມາເປັນພຽງ 500 ບາດເທົ່ານັ້ນ, ຈຶ່ງຄາດວ່າຢັງຈະມີແຮງງານເດິນທາງໄປເຮັດວຽກຢູ່ໄທເພິ່ມຂື້ນອີກ ຊື່ງກໍລວມເຖິງແຮງງານຈາກລາວດ້ວຍນັ່ນເອງ.
ຟໍຣັມສະແດງຄວາມຄິດເຫັນ