ທ່ານບົວສອນ ບຸບຜາວັນ ນາຍົກລັດຖະມົນຕີລາວ ໄດ້ຖະແຫລງຕໍ່ກອງປະຊຸມຮ່ວມ ລະຫວ່າງກະຊວງການເງິນ ກັບກະຊວງແຜນການແລະການລົງທຶນ ທີ່ໄດ້ຈັດຂຶ້ນຢ່າງເປັນທາງການ ລະຫວ່າງວັນທີ່ 14-15 ເດືອນກັນຍານີ້ ຢູ່ນະຄອນວຽງຈັນ ວ່າເປົ້າໝາຍສູ້ຊົນຂອງລັດຖະບານລາວ ໃນຕະຫລອດໄລຍະແຜນການພັດທະນາທາງເສດຖະກິດແລະສັງຄົມແຫ່ງຊາດ ປະຈໍາປີ 2010-2011 ນີ້ ກໍຄືການເຮັດໃຫ້ຍອດຜະລິດລວມພາຍໃນປະເທດ ຫລື GDP ຂະຫຍາຍຕົວເພີ່ມຂຶ້ນໃຫ້ໄດ້ບໍ່ຫລຸດ 8% ຊຶ່ງກໍຈະເຮັດໃຫ້ມູນຄ່າ GDP ນັ້ນ ສາມາດຄິດສະເລ່ຍເປັນລາຍໄດ້ຂອງປະຊາຊົນ ໄດ້ເຖິງ 9.6 ລ້ານກີບຫລືປະມານ 1,130 ໂດລາຕໍ່ຄົນຕໍ່ປີ ໂດຍການທີ່ຈະເຮັດໃຫ້ເປົ້າໝາຍດັ່ງກ່າວສາມາດເກີດຂຶ້ນໄດ້ຢ່າງແທ້ຈິງນັ້ນ ກໍມີຄວາມຈໍາເປັນທີ່ຈະຕ້ອງຊຸກຍູ້ໃຫ້ການຜະລິດໃນພາກກະສິກໍາ-ປ່າໄມ້ ມີການຂະຫຍາຍ ຕົວເພີ່ມຂຶ້ນບໍ່ໜ້ອຍກວ່າ 3.5% ແລະພາກບໍລິການກໍຈະຕ້ອງຂະຫຍາຍຕົວບໍ່ຕໍ່າກວ່າ 6.7% ສ່ວນພາກອຸດສາຫະກໍານັ້ນ ກໍຈະຕ້ອງຂະຫຍາຍຕົວເຖິງ 17.3%.
ສໍາລັບໃນດ້ານງົບປະມານລາຍຮັບ-ລາຍຈ່າຍນັ້ນ ທ່ານບົວສອນ ກໍໄດ້ເນັ້ນຍໍ້າວ່າລັດຖະບານລາວຈະສູ້ຊົນເພື່ອ ເຮັດໃຫ້ສາມາດຈັດເກັບລາຍຮັບໃຫ້ໄດ້ບໍ່ໜ້ອຍກວ່າ 20.8% ຂອງມູນຄ່າ GDP ແລະຖ້າຫາກວ່າການດໍາເນີນງານເປັນໄປຕາມແຜນການທີ່ວາງເອົາໄວ້ດັ່ງກ່າວ ກໍຍັງ ຈະເຮັດໃຫ້ຈໍານວນຄົວເຮືອນທີ່ຍາກຈົນໃນລາວ ເຫລືອຢູ່ ບໍ່ເກີນ 19% ຂອງຈໍານວນຄົວເຮືອນທັງໝົດໃນລາວອີກດ້ວຍ. ແຕ່ຢ່າງໃດກໍຕາມ ທ່ານບົວສອນກໍຍອມຮັບວ່າ ບໍ່ແມ່ນເລຶ່ອງງ່າຍໆ ທີ່ລັດຖະບານລາວຈະສາມາດບັນລຸເປົ້າໝາຍດັ່ງກ່າວໄດ້ ເນຶ່ອງຈາກວ່າລັດຖະ ບານລາວຍັງຈະຕ້ອງປະເຊີນກັບບັນຫາແລະອຸບປະສັກໃນຫລາຍໆດ້ານ ດັ່ງທີ່ທ່ານບົວສອນ ໄດ້ຖະແຫລງຊີ້ແຈງວ່າ:
“ການຄຸ້ມຄອງແລະດັດສົມຂອງລັດຖະບານເຮົາກໍຍັງມີຫລາຍບັນຫາທີ່ຈະຕ້ອງເອົາໃຈໃສ່ແກ້ໄຂເພີ່ມຕື່ມອີກ ເປັນຕົ້ນກໍແມ່ນການຄຸ້ມຄອງດ້ານເສດຖະກິດມະຫາພາກ ການເງິນ ການທະນາຄານ ການຄ້າ ລາຄາ ແລະດ້ານອື່ນໆ ທີ່ອາດຈະເຮັດໃຫ້ເກີດສະພາບປັ່ນປ່ວນຂຶ້ນໄດ້ ຖ້າຫາກວ່າມີການປ່ອຍປະລະເລີຍ ຫລືວ່າບໍ່ມີການ ຊີ້ນໍາຢ່າງໄກ້ຊິດ ຫລືບໍ່ມີການປະສານງານກັນຢ່າງເປັນເອກກະພາບ”
ຫາກແຕ່ວ່າສໍາລັບໃນໄລຍະແຜນການປີ 2009-2010 ທີ່ກໍາລັງຈະສິ້ນສຸດລົງໃນທ້າຍເດືອນກັນຍານີ້ ທ່ານບົວສອນ ບຸບຜາວັນ ກໍໄດ້ຢືນຢັນວ່າດ້ວຍການຟື້ນຕົວຂຶ້ນຢ່າງໄວເກີນຄາດ ໝາຍຂອງເສດຖະກິດໂລກໃນປັດຈຸບັນ ໄດ້ເຮັດໃຫ້ລັດຖະບານລາວມີການປັບເປົ້າໝາຍການຂະຫຍາຍຕົວຂອງ GDP ຂອງລາວມີມູນຄ່າລວມເຖິງ 54,225 ຕື້ກີບ ຫລືວ່າປະມານ 6,450 ພັນລ້ານໂດລາຕາມອັດຕາແລກປ່ຽນໃນປັດຈຸບັນ.
ສ່ວນພາກການຜະລິດທີ່ຈະມີການຂະຫຍາຍຕົວເພີ່ມຂຶ້ນຫລາຍທີ່ສຸດນັ້ນ ກໍຄືພາກອຸດສາຫະ ກໍາທີ່ຈະຂະຫຍາຍຕົວເຖິງ 17% ຕິດຕາມດ້ວຍພາກບໍລິການທີ່ຈະຂະຫຍາຍຕົວບໍ່ໜ້ອຍກວ່າ 6.7% ແລະພາກກະສິກໍາ-ປ່າໄມ້ ກໍຈະຂະຫຍາຍຕົວບໍ່ຕໍ່າກວ່າ 3.2% ໂດຍພາຍໃຕ້ສະພາບການດັ່ງກ່າວນີ້ ກໍຈະເປັນຜົນເຮັດໃຫ້ພາກບໍລິການ ມີມູນຄ່າທາງເສດຖະກິດກວມເອົາ 32.9% ຂອງມູນຄ່າ GDP. ສ່ວນພາກກະສີກໍາ-ປ່າໄມ້ ກໍກວມເອົາ 29% ຂອງມູນຄ່າ GDP ແລະພາກອຸດສາຫະກໍານັ້ນກໍກວມເອົາເຖິງ 25.5% ຂອງມູນຄ່າ GDP. ສ່ວນນອກນັ້ນກໍ ເປັນມູນຄ່າທາງເສດຖະກິດ ທີ່ີມາຈາກພາສີອາກອນ ແລະຄ່າທໍານຽມຕ່າງໆຂອງພາກລັດ.
