ອົງການອະນຸລັກຊ້າງໃນເອເຊຍ Elefant Asia ລາຍງານວ່າ ຈໍານວນປະຊາກອນຊ້າງ
ຢູ່ໃນລາວຍັງຄົງຫລຸດລົງຢ່າງຕໍ່ເນຶ່ອງ ໂດຍຈາກການເກັບກໍາຂໍ້ມູນຫລ້າສຸດ ເຮັດໃຫ້ສາ
ມາດປະເມີນໄດ້ວ່າ ໃນປັດຈຸບັນນີ້ ຍັງມີປະຊາກອນຊ້າງບ້ານເຫຼືອຢູ່ໃນລາວ ພຽງແຕ່
ບໍ່ເກີນ 470 ໂຕເທົ່ານັ້ນ. ສ່ວນປະຊາກອນຊ້າງປ່ານັ້ນ ກໍເຊື່ອວ່າມີຈໍານວນໜ້ອຍກວ່າ
ປະຊາກອນຊ້າງບ້ານຢ່າງແນ່ນອນ ເນື່ອງຈາກວ່າຊ້າງປ່າຕ້ອງປະເຊີນກັບການຖືກລ່າ
ໂດຍກຸ່ມລັກລອບຄ້າສັດປ່າຢູ່ຕະຫຼອດເວລາ.
ຍິ່ງໄປກວ່ານັ້ນ ເມື່ອປະກອບກັບບັນຫາການຕັດໄມ້ທໍາລາຍປ່າຢ່າງໜັກໜ່ວງຢູ່ໃນທົ່ວ
ປະເທດລາວອີກດ້ວຍແລ້ວ ກໍຍັງໄດ້ທໍາລາຍຖິ່ນຢູ່ ແລະແຫຼ່ງອາຫານຂອງຊ້າງແລະສັດ
ປ່ານາໆຊະນິດ ຊຶ່ງກໍໄດ້ສົ່ງຜົນກະທົບຕໍ່ເນື່ອງເຖິງການຜະສົມພັນຂອງສັດປ່າອີກດ້ວຍ
ໂດຍຜົນທີ່ຕິດຕາມມາກໍຄືປະຊາກອນຊ້າງ ແລະສັດປ່າໄດ້ຫລຸດຈໍານວນລົງຢ່າງຕໍ່ເນື່ອງ
ເພາະສະນັ້ນ ຖ້າຫາກວ່າບັນຫາດັ່ງກ່າວນີ້ບໍ່ໄດ້ຮັບການແກ້ໄຂກໍເຮັດໃຫ້ ElefantAsia
ປະເມີນສະຖານະການວ່າ ຊ້າງປ່າໃນລາວ ຈະສູນພັນໄປພາຍໃນ 50 ປີ.
ທາງດ້ານອົງການຄຸ້ມຄອງສັດ
ປ່າ WCS ທີ່ໃຫ້ການຊ່ວຍເຫຼືອ
ລັດຖະບານລາວ ໃນການອະນຸ
ລັກເສືອໂຄ່ງໃນເຂດປ່າສະຫງວນ
ແຫ່ງຊາດນໍ້າແອດ-ພູເລີຍ ໃນ
ພາກເໜືອຂອງລາວນັ້ນ ກໍລາຍ
ງານວ່າ ໃນປັດຈຸບັນນີ້ ຍັງຄົງ
ເຫຼືອປະຊາກອນເສືອໂຄ່ງ ໃນ
ເຂດປ່າສະຫງວນດັ່ງກ່າວພຽງ
ບໍ່ເກີນ 30 ໂຕ ແລະມີທ່າອ່ຽງ
ທີ່ຈະມີຈໍານວນຫລຸດລົງເລື້ອຍໆ
ເນື່ອງຈາກການລັກລອບເສືອປ່າ
ໃນລາວ ເພື່ອສົ່ງອອກໄປຕ່າງປະເທດຍັງຄົງເກີດຂຶ້ນຢູ່ເລື້ອຍມາ ໂດຍເຖິງ ແມ່ນວ່າ WCS
ຈະຮ່ວມມືກັບທາງການລາວທໍາການລາດຕະເວນໃນເຂດປ່າສະຫງວນແຫ່ງຊາດນໍ້າແອດ-
ພູເລີຍ ນັບແຕ່ປີ 2010 ມາແລ້ວກໍຕາມ ຫາກແຕ່ກໍບໍ່ສາມາດເຮັດໄດ້ຢ່າງທົ່ວເຖິງ ແລະບັນ
ຫານີ້ຍັງໄດ້ເກີດຂຶ້ນໃນທຸກເຂດປ່າສະຫງວນແຫ່ງຊາດອີກດ້ວຍ ດັ່ງທີ່ເຈົ້າໜ້າທີ່ຂັ້ນສູງໃນ
ກະຊວງກະສິກໍາ-ປ່າໄມ້ໄດ້ຢືນຢັນວ່າ
“ແຕ່ລະເຂດປ່າສະຫງວນນີ້ ພວກເຮົາໄດ້ມີການກວດການລາດຕະເວນເປັນປະຈໍາ
ເດືອນນຶ່ງນີ້ແມ່ນສິບມື້ ກວດການຕາມຂອບເຂດຊາຍແດນປ່າສະຫງວນ ຈຶ່ງໄດ້ພົບ
ເຫັນ ດັ່ງນັ້ນພວກເຮົາຈຶ່ງຕີລາຄາໄດ້ວ່າ ຢູ່ຕາມເຂດຊາຍແດນນີ້ຍັງມີການເຄຶ່ອນໄຫວ
ໃນການຈັບ ໃນການລ່າສັດປ່າບໍ່ແມ່ນໜ້ອຍເດີ ຍົກຕົວຢ່າງຢູ່ປ່າສະຫງວນນາກາຍ-
ນໍ້າເທີນ ແຕ່ລະເດືອນນີ້ໄປເກັບກູ້ໄປກວດກາໄປເຫັນພັນກວ່າ ກໍລະນີ”
ເນື່ອງຈາກບັນຫາປະຊາກອນຊ້າງ ເສືອ ແລະສັດປ່າລົດຈໍານວນລົງຢ່າງຕໍ່ເນື່ອງແລ້ວ ກໍຍັງ
ມີບັນຫາກ່ຽວກັບປະຊາກອນປາບຶກໃນແມ່ນໍ້າຂອງ ທີ່ຫລຸດຈໍານວນລົງຢ່າງຕໍ່ເນື່ອງ ເຊັ່ນ
ດຽວກັນ ຊຶ່ງຕໍ່ບັນຫາດັ່ງກ່າວກໍເຮັດໃຫ້ທາງການສະຫະລັດ ໂດຍທ່ານນາງ Karen B.
Stewart ເອກອັກຄະລັດຖະທູດສະຫະລັດປະຈໍາລາວໄດ້ ສົ່ງມອບອຸບປະກອນຕິດຕັ້ງ
ສັນຍານດາວທຽມ ສໍາລັບນໍາໃຊ້ໃນການຕິດຕາມການເຄື່ອນໄຫວຂອງປາບຶກໃນແມ່ນໍ້າ
ຂອງໃຫ້ກັບກອງທຶນອະນຸລັກສັດໂລກ WWF ໃນລາວຢ່າງເປັນທາງການເມື່ອບໍ່ດົນມານີ້.
ເປົ້າໝາຍສໍາຄັນ ທີ່ທາງການ
ສະຫະລັດໄດ້ໃຫ້ການຊ່ວຍເຫຼືອ
ແກ່ລາວໃນຄັ້ງນີ້ກໍແມ່ນເພື່ອການ
ສຶກສາ ແລະເກັບກໍາຂໍ້ມູນກ່ຽວ
ກັບພຶດຕິກໍາຂອງປາບຶກຢ່າງ
ຮອບດ້ານ ແລະກໍນໍາເອົາຜົນທີ່
ໄດ້ຈາກການສຶກສາດັ່ງກ່າວນັ້ນ
ມາປະກອບໃນການວາງແຜນ
ປະຕິບັດການເພື່ອການອະນຸລັກ
ແລະປ້ອງກັນປາບຶກບໍ່ໃຫ້ເກີດ
ການສູນພັນໄປຈາກແມ່ນໍ້າຂອງ.
ທັງນີ້ກໍເນື່ອງຈາກວ່າປະຊາກອນ
ປາບຶກໄດ້ມີຈໍານວນຫລຸດລົງຢ່າງ
ໄວວາໃນຊ່ວງ 20 ປີຜ່ານມານີ້
ຊຶ່ງຜົນຈາກການເກັບກໍາຂໍ້ມູນໃນ
ໄລຍະທີ່ຜ່ານມາ ກໍໄດ້ຊີ້ໃຫ້ເຫັນ
ວ່າ ປະຊາກອນປາບຶກມີຈໍານວນລຸດລົງເຖິງ 90% ໂດຍມີສາເຫດສໍາຄັນຈາກການພັດທະນາ
ພື້ນຖານໂຄງລ່າງຕ່າງໆ ທີ່ເຮັດໃຫ້ສະພາບແວດລ້ອມທໍາມະຊາດໃນລຸ່ມແມ່ນໍ້າຂອງຖືກທໍາ
ລາຍໄປຢ່າງຫຼວງຫຼາຍ ຊຶ່ງກໍລວມເຖິງແຫຼ່ງອາຫານ ແຫຼ່ງຜະສົມພັນ ແລະແຫຼ່ງວາງໄຂ່ຂອງ
ປາບຶກອີກດ້ວຍ ນັ້ນເອງ.
ນອກຈາກການຊ່ວຍເຫຼືອດັ່ງກ່າວແລ້ວ ທາງການສະຫະລັດກໍຍັງໄດ້ໃຫ້ການຊ່ວຍເຫຼືອລາວ
ໃນການຮັກສາປ່າ ແລະສັດປ່າຢູ່ໃນເຂດປ່າສະຫງວນແຫ່ງຊາດນໍ້າແອດ-ພູເລີຍໃນແຂວງ
ຫົວພັນ ຊຶ່ງເປັນການຊ່ວຍເຫຼືອທີ່ຕໍ່ເນື່ອງນັບແຕ່ປີ 2002 ເປັນຕົ້ນມາແລ້ວ ໂດຍຫລ້າສຸດ
ທາງການສະຫະລັດກໍໄດ້ຊ່ວຍເຫຼືອໃນການສ້າງຕັ້ງໜ່ວຍລາດຕະເວນຂຶ້ນມາ ເພື່ອທໍາການ
ກວດກາ ແລະສະກັດກັ້ນການລັກລອບຕັດໄມ້ ແລະການລ່າສັດປ່າຢູ່ໃນເຂດປ່າສະຫງວນ
ແຫ່ງຊາດນໍ້າແອດ-ພູເລີຍເປັນການສະເພາະ ອີກດ້ວຍ.