ນັກເສດຖະສາດ ເຕືອນວ່າ ເສດຖະກິດລາວ ອາດໄດ້ຮັບ ຜົນກະທົບ ຈາກໄພທໍາມະຊາດ

ນັກ​ເສດຖະສາດ​ລາວ​ເຕືອນ​ວ່າ
​ໄພພິບັດ​ຈາກ​ທໍາ​ມະ​ຊາດ​ອາດ
​ຈະ​ເຮັດ​ໃຫ້ການ​ຂະຫຍາຍຕົວ
​ທາງ​ເສດຖະກິດ​ໃນ​ແຜນການ
​ປີ 2012-2013 ບໍ່​ເປັນ​ໄປ​ຕາມ
​ເປົ້າໝາຍທີ່​ວາງ​ເອົາ​ໄວ້ ຫາກ​
ບໍ່​ມີ​ມາດ​ຕະການ​ປ້ອງ​ກັນ​ທີ່​ດີ.

ທ່ານ ລີ​ເບີ ລີ​ບົວ​ປາວ ຫົວໜ້າ​
ສະ​ຖາ​ບັນ​ວິໄຈ​ເສດຖະກິດ​ແຫ່ງ​
ຊາດ​ລາວ ຖະ​ແຫຼງຢືນຢັນ​ວ່າ
​ສະພາບ​ການ​ດ້ານ​ບວກ​ໃນ​ທາງ​ເສດຖະກິດທີ່ເກີດ​ຂຶ້ນ ​ໃນ​ເວລາ​ນີ້ ​ໂດຍສ​ະ​ເພາະແມ່ນ
​ການ​ລົງທຶນ​ທັງ​ພາຍ​ໃນ​ແລະ​ຕ່າງປະ​ເທດ​ທີ່ເພີ່ມ​ຂຶ້ນຢ່າງ​ຕໍ່​ເນື່ອງ ທີ່​ສົມທົບ​ດ້ວຍ​ລາຄາ​
ນໍ້າມັນ​ເຊື້ອ​ໄຟ ​ແລະ​ອັດຕາ​ເງິນ​ເຟີ້​ທີ່​ປັບ​ຕົວ​ຫລຸດ​ລົງ ໃນ​ຕະຫຼອດ​ໄລຍະ​ກວ່າ 6 ​ເດືອນ​
ຜ່ານ​ມາຂອງ​ປີ 2012 ນີ້ ຖື​ເປັນ​ປັດ​ໃຈ​ທີ່​ດີ ​ຕໍ່ການ​ພັດທະນາ​ເສດຖະກິດ​ຂອງ​ລາວ​ໃນ
​ໄລຍະ​ແຜນການ​ປະ​ຈໍາປີ 2012-2013 ທີ່ຈະ​ເລີ່​ມການ​ປະຕິບັດ​ຈັດ​ຕັ້ງ ​ໃນ​ເດືອນ​ຕຸລາ​
ປີ​ນີ້​ ຈົນເຖິງ​ເດືອນ​ກັນຍາ 2013.

ທັງ​ນີ້​ ​ຖ້າ​ຫາກ​ວ່າການ​ປະຕິບັດ​ຈັດ​ຕັ້ງ​ເປັນ​ໄປ​ຕາມ​ເປົ້າໝາຍ​ແຜນການ​ທີ່​ວາງ​ໄວ້​ຢ່າງ​ຄົບ
​ຖ້ວນ​ນັ້ນ​ ກໍ​ເຊື່ອ​ວ່າ​ເສດຖະກິດ​ຂອງ​ລາວ ​ໃນ​ຕະຫຼອດ​ແຜນການ​ປີ​ດັ່ງກ່າວ​ນີ້​ ຈະ​ຂະຫຍາຍ
ຕົວ​ເພີ່ມ​ຂຶ້ນ​ໄດ້​ລະຫວ່າງ 8-8.3% ຫາກ​ແຕ່​ທ່ານ ລີ​ເບີ ກໍ​ຍອມຮັບວ່າ ​ປັດ​ໃຈ​ທີ່​ສາມາດ
​ເຮັດ​ໃຫ້ການ​ຂະຫຍາຍຕົວ​ທາງ​ເສດຖະກິດ​ຂອງ​ລາວ ​ບໍ່​ເປັນ​ໄປ​ຕາມ​ເປົ້າໝາຍ​ແຜນການ
​ດັ່ງກ່າວ ກໍ​ຄື​ໄພພິບັດ​ຈາກ​ທໍາ​ມະ​ຊາດ ​ໂດຍ​ສະ​ເພາະ​ແມ່ນ​ໄພ​ນໍ້າ​ຖ້ວມ ​ແລະ​ໄພ​ແຫ້ງ​ແລ້ງ
​ທີ່​ມີ​ຄວາມ​ຮຸນ​ແຮງ​ຫຼາຍ​ຂຶ້ນນັບ​ມື້.

​ແຕ່​ຢ່າງ​ໃດ​ກໍ​ຕາມລາວ​ກໍ​ສາມາດ
​ປ້ອງ​ກັນ​ແລະຫລຸດ​ຜ່ອນຜົນ​
ກະທົບ​ຂອງ​ໄພພິບັດ ຈາກ​ທໍາ
​ມະ​ຊາດ​ໄດ້​ດ້ວຍ​ການ​ປະສານ
​ງານ​ຢ່າງ​ຄົບ​ຊຸດ​ລະຫວ່າງ​ພາກ
ສ່ວນ​ຕ່າງໆ ກໍ​ຄື​ການ​ພະຍາ
ກອນ​ສະພາບ​ອາກາດ​ທີ່​ຖືກຕ້ອງ
​ແລະ​ຊັດ​ເຈນ​ໂດຍ​ກົມ​ອຸ​ທົກ​ກະ
ສາ​ດ ​ແລະ​ອຸຕຸນິຍົມ​ວິດ​ທະຍາ
​ເພື່ອ​ແຈ້ງ​ເຕືອນ​ໄພ​ໃຫ້​ປະຊາຊົນ
​ໄດ້​ຮັບ​ຊາບ​ເປັນ​ການລ່ວງ​ໜ້າ
ສ່ວນ​ກະຊວງ​ກະສິກໍາ-ປາໄມ້
ນັ້ນ​ກໍ​ຈະ​ຕ້ອງ​ດໍ​າ​ເນີນ​ການ​ພັດທະນາ​ແລະ ສ້ອມ​ແປງ​ລະບົບ​ຊົນລະປະທານ​ໃຫ້​ສາມາດ​
ຕອບ​ສະໜອງ​ນໍ້າ​ໃຫ້​ກັບ​ພື້ນ​ທີ່​ການ​ກະ​ເສດ​ທັງ​ໃນ​ຊ່ວງ​ລະດູຝົນ​ ແລະ​ລະດູ​ແລ້ງ​ໄດ້​ຢ່າງ​
ກວ້າງຂວາງ​ຫຼາຍ​ຂຶ້ນ ​ໃນ​ຂະນະ​ທີ່ກະຊວງ​ໂຍທາ​ທິການ ​ແລະ​ຂົນ​ສົ່ງ​ກໍ​ຈະ​ຕ້ອງ​ດໍາ​ເນີນ​
ການ​ພັດທະນາ​ລະບົບ​ພື້ນຖານໂຄງການ​ຕ່າງໆ​ໃຫ້​ໄດ້​ຕາມ​ແຜນການ​ທີ່​ວາງ​ໄວ້​ເປັນ​ຕົ້ນ.

ກ່ອນ​ໜ້າ​ນີ້ ທ່ານ​ທອງ​ສິງ​ ທໍາ​ມະ​ວົງ ນາຍົກລັດຖະມົນຕີກໍ​ໄດ້​ສະ​ແດງ​ການ​ຮຽກຮ້ອງ
​ຕໍ່​ທຸກໆ​ພາກສ່ວນ​ໃນ​ທົ່ວ​ປະ​ເທດ​ລາວ ​ເພື່ອ​ຂໍ​ໃຫ້​ປະກອບສ່ວນ​ເຂົ້າ​ໃນການ​ດໍາ​ເນີນ
​ມາດ​ຕະການ​ປ້ອງ​ກັນ​ຜົນ​ກະທົບ​ຈາກ​ໄພພິບັດ​ທໍາ​ມະ​ຊາດ​ທີ່​ອາດ​ເກີດ ຂຶ້ນ​ໃນ​ລາວ​ໃນ
​ປີ 2012 ນີ້​ໃຫ້​ໄດ້​ຢ່າງ​ເປັນ​ຮູບ​ປະ​ທໍາ ​ເນື່ອງ​ຈາກ​ລາວ​ກໍ​ແມ່ນ​ປະ ​ເທດ​ນຶ່ງ​ທີ່​ໄດ້​ຮັບ​ຜົນ
​ກະທົບ​ຈາກ​ໄພພິບັດ​ທໍາ​ມະ​ຊາດ​ຫຼາຍ​ຂຶ້ນນັບ​ມື້ ດັ່ງ​ທີ່​ທ່ານ ທອງ​ສິງ ກ່າວ​ໃນ​ຕອນ​ນຶ່ງ​ວ່າ:

“​ໄພ​ພິບັດ​ທໍ​າມະ​ຊາດ​ໄດ້​ເກີດ
​ຂຶ້ນຢ່າງ​ເນືອ​ງນິດ ​ແລະ​ມີ​ຄວາມ
​ຮຸນ​ແຮງ​ຂຶ້ນ​ເລື້ອຍໆ ດັ່ງ​ນັ້ນ​ຈຶ່ງ​
ຕ້ອງ​ມີ​ຄວາມ​ສາ​ມະ​ຄີ​ຮ່ວມ​ແຮງ
​ຮ່ວມ​ໃຈ​ກັນ​ຢ່າງ​ຈິງ​ຈັງ ​ໃນ​ການ
​ປົກ​ປັກຮັກສາ​ສະພາບ​ແວດ​ລ້ອມ
​ເປັນ​ຕົ້ນ​ແມ່ນ​ການ​ປົກ​ປັກ​ຮັກສາ
​ປ່າ​ໄມ້ ​ແມ່​ນໍ້າລໍາ​ເຊ ກໍາຈັດ​ການ​
ປ່ອຍ​ອາຍ​ຄາບ​ອນນິກຂຶ້ນສູ່​ອາ
ກາດ​ແລະ​ອື່ນໆ ທີ່​ເປັນ​ການ​ທໍາ
ລາຍ​ສະພາບ​ແວດ​ລ້ອມ.”

ທາງ​ດ້ານ ທ່ານສິງທອງ ປະທຸມ​ມະ​ດີ ຮອງ​ຫົວໜ້າ​ກົມ​ອຸຕຸ​ນິຍົມ​ວິດ​ທະຍາ ​ແລະອຸ​ທົກ​ກະ
ສາ​ດ ກໍ​ໄດ້​ຖະ​ແຫຼ​ງວ່າ​ປະລິມານ​ນໍ້າ​ຝົນ​ທີ່​ຈະ​ຕົກລົງ​ມາ​ໃນ​ລາວ​ໃນ​ຊ່ວງ​ລະດູ​ຝົນ​ປີ 2012
ນີ້ ​ຈະ​ຢູ່​ທີ່​ລະດັບ​ສະ​ເລ່ຍຕັ້ງ​ແຕ່ 900 ມິລລິແມັດ ​ເຖິງ 3,800 ມິລລິ​ແມັດ ​ໂດຍ​ຊ່ວງ​ທີ່​ຈະ​ມີ
​ປະລິມານ​ນໍ້າ​ຝົນຕົກ​ລົງ​ມາ​ຢ່າງ​ໜັກໜ່ວງ​ທີ່​ສຸດ​ກໍ​ຄື ​ຈາກ​ເດືອນ​ມິຖຸນາ​ຫາ​ເດືອນ​ກັນຍາ ​ແລະ
​ເຂດ​ທີ່​ມີ​ຄວາມ​ສ່ຽງ​ສູງ​ທີ່​ຈະ​ຕ້ອງ​ປະ​ເຊີນ​ກັບ​ໄພນໍ້າ​ຖ້ວມ​ຫຼາຍ​ທີ່​ສຸດ​ໃນ​ລາວ​ນັ້ນ ກໍ​ແມ່ນ​ບັນ
ດາ​ແຂວງ​ໃນ​ເຂດ​ພາກ​ໃຕ້ ​ໂດຍ​ຄາດ​ວ່າ ຈະ​ມີ​ພາ​ຍຸ​ໂຊນ​ຮ້ອນ 3 ໜ່ວຍ​ ເປັນ​ຢ່າງ​ໜ້ອຍ​ທີ່​ຈະ
​ພັດ​ເຂົ້າມາ​ໃນ​ແຂວງ​ພາກ​ໃຕ້ຂອງ​ລາວ​ໃນ​ຊ່ວງ​ດັ່ງກ່າວ.