ບັນດາເຈົ້າໜ້າທີ່ລັດຖະບານລາວກ່າວວ່າ ພັກຄອມມີວນິດທີ່ປົກຄອງ ປະເທດໃນປັດຈຸບັນ ຈະເປີດກອງປະຊຸມຫລວງຄັ້ງທີ 9 ຂອງພັກໃນວັນທີ 18 ມີນາ ເດືອນໜ້ານີ້ ເພື່ອເລືອກເອົາສະມາຊິກຂອງຄະນະກົມການເມືອງ ແລະວາງນະໂຍບາຍສໍາລັບໂຄງການ 5 ປີຕໍ່ໜ້າ.
ກອງປະຊຸມຫລວງຂອງພັກ ຊຶ່ງໄຂຂຶ້ນໃນທຸກໆ 5 ປີ ຄາດວ່າຈະດໍາເນີນໄປເປັນເວລາ 4 ມື້ ແລະຈະວາງພື້ນຖານສໍາລັບການເລືອກຕັ້ງທົ່ວໄປ ຊຶ່ງກໍານົດຈະມີຂຶ້ນໃນທ້າຍເດືອນເມສາ ໃນປະເທດທີ່ມີພັກການເມືອງດຽວນັ້ນ.
ໂຄສົກກະຊວງການຕ່າງປະເທດລາວກ່າວຕໍ່ອົງການຂ່າວສານເຢຍຣະມັນວ່າ ລາຍການປະຊຸມສໍາລັບກອງປະຊຸມຫລວງນີ້ ຍັງບໍ່ທັນໄດ້ມີການປະກາດໃຫ້ຊາບເທື່ອ.
ເຖິງຢ່າງໃດກໍດີ ທ່ານຈູມມາລີ ໄຊຍະສອນ ຊຶ່ງເວລານີ້ເປັນປະທານປະເທດແລະເປັນເລຂາທິການໃຫຍ່ຂອງພັກປະຊາຊົນປະຕິວັດລາວນັ້ນ ມີສິດທິທີ່ຈະຖືກເລືອກຕັ້ງອີກສະໄໝນຶ່ງໄດ້.
ມີຜູ້ແທນພັກເກືອບ 500 ຄົນໄດ້ເຂົ້າຮ່ວມໃນກອງປະຊຸມຫລວງຂອງພັກເທືອແລ້ວນີ້ໃນປີ 2006 ເວລາກອງປະຊຸມດັ່ງກ່າວເລືອກເອົາສະມາຊິກຂອງຄະນະກົມການເມືອງ 11 ທ່ານ ແລະສະມາຊິກຄະນະກໍາມະການສູນກາງພັກ 55 ທ່ານ.
ນອກຈາກເລືອກເອົາຄະນະນໍາພາແລ້ວ ພວກຜູ້ແທນເຂົ້າຮ່ວມກອງປະຊຸມພັກປີນີ້ຈະເພ່ງເລັງໃສ່ນະໂຍບາຍດ້ານເສດຖະກິດ ໃນຂະນະທີ່ປະເທດລາວກໍາລັງຫາທາງກ້າວອອກຈາກຖານະການເປັນປະເທດດ້ອຍພັດທະນາໃຫ້ໄດ້ ພາຍໃນປີ 2020 ນັ້ນ.
ພັກປະຊາຊົນປະຕິວັດລາວໄດ້ເປັນພັກການເມືອງທີ່ຖືກຕ້ອງຕາມກົດໝາຍແຕ່ພຽງພັກດຽວຢູໃນລາວ ນັບແຕ່ພັກດັ່ງກ່າວໄດ້ຂຶ້ນຄອງອໍານາດ ໃນປີ 1975 ເວລາສົງຄາມຫວຽດນາມຍຸດຕິລົງນັ້ນ.
