ມີລາຍງານຂ່າວວ່າ ທາງການລາວໄດ້ອັດກາສິໂນ ຫລືບ່ອນຫລີ້ນການພະນັນໃຫຍ່ ໃນ
ແຂວງຫລວງນໍ້າທາ ຕິດກັບຊາຍແດນຈີນນັ້ນ ຫລັງຈາກທີ່ມີຂ່າວກ່ຽວກັບການກໍ່ອາຊະ
ຍາກໍາຢູ່ໃນເຂດດັ່ງກ່າວ ທີ່ຢູ່ໃຕ້ການ ບໍລິຫານຂອງບໍລິສັດຈີນ.
ໜັງສືພິມ Vientiane Times ລາຍງານຂ່າວໃນວັນພຸດມື້ນີ້ວ່າ ຄະນະກໍາມະການຄຸ້ມຄອງ
ເຂດເສດຖະກິດພິເສດແຫ່ງຊາດ ໄດ້ປະຊຸມກັນໃນມື້ວັນຈັນຜ່ານມາເພື່ອຫາລືກ່ຽວກັບຮ່າງ
ດໍາລັດຂອງນາຍົກລັດ ຖະມົນຕີ ທີ່ຈະຫັນປ່ຽນເຂດເສດຖະກິດພິເສດ ທີ່ເອີ້ນວ່າ Boten
Golden City ຫລືບໍ່ເຕັນແດນຄຳ ໃນແຂວງຫລວງນໍ້າທາ ໃຫ້ເປັນເຂດປອດການພະນັນ
ນັ້ນ ແລະທາງຄະນະກໍາມະການກໍໄດ້ຕັດສິນໃຈໄປຕາມນັ້ນ ໂດຍຈະຫັນປຽນໃຫ້ເປັນເຂດ
ການຄ້າແລະວັດທະນໍາແທນ.
ສື່ມວນຊົນຈີນໄດ້ລາຍງານຂ່າວວ່າ ມີຊາວຈີນຫລາຍຄົນໄປຫລີ້ນການ ການພະນັນຢູ່ທີ່ນັ້ນ
ແລ້ວຖືກກັກໂຕໄວ້ແລະຖືກທໍລະມານ ຍ້ອນບໍ່ສາມາດຈ່າຍເງິນໃຫ້ເຈົ້າຂອງກາສິໂນ ຫລັງ
ຈາກທີ່ຫລີ້ນເສຍ.
ຮອງນາຍົກລັດຖະມົນຕີລາວ ທ່ານສົມສະຫວາດ ເລ່ງສະວັດກ່າວວ່າ ຕໍ່ໄປນີ້ທາງການລາວ
ຈະບໍ່ອະນຸຍາດໃຫ້ຕັ້ງກາສິໂນ ຢູ່ໃນເຂດເສດຖະ ກິດພິເສດອີກແລ້ວ ຍົກເວ້ນກາສິໂນທີ່
ເມືອງຕົ້ນເຜິ້ງ ແຂວງບໍ່ແກ້ວ ໃນເຂດເສດຖະກິດພິເສດສາມຫລ່ຽມທອງຄໍາ ທີ່ໄດ້ຕັ້ງຂຶ້ນ
ກ່ອນການປ່ຽນແປງໃນນະໂຍບາຍດັ່ງກ່າວ.
ນັກທ່ອງທ່ຽວຈາກສະຫະລັດຫລາຍຄົນທີ່ໄດ້ຢ້ຽມຢາມເມືອງບໍ່ເຕັນມາ ຢືນຢັນວ່າ ໂຮງກາ
ສິໂນທີ່ບໍ່ເຕັນໄດ້ອັດລົງແທ້. ສ່ວນກາສິໂນທີ່ເມືອງຕົ້ນເຜີ້ງກໍແມ່ນໃຫຍ່ແລະສວຍງາມ ຊຶ່ງຖ້າ
ຫລຽວເບິ່ງມາຈາກຝັ່ງໄທ ບໍລິເວນນັ້ນແມ່ນຮຸ່ງເຮືອງເຫລືອງເຫລື້ອມ ບໍ່ແພ້ລາສເວກັສ.
