ແຮງງານລາວພາກັນໄປຊອກຫາງານໃນຕ່າງປະເທດເປັນຈຳນວນຫຼວງຫລາຍໃນແຕ່ລະປີ ແລະອັດຕາຫວ່າງງານຂອງຄົນລາວກໍແມ່ນເພີ້ມຂຶ້ນຢ່າງສູງໃນຊຸມປີຜ່ານມານີ້ ຊຶ່ງກໍຄືຈາກ 9.8 ເປີເຊັນ ໃນປີ 2017 ຂຶ້ນເປັນ 21.8 ເປີເຊັນໃນທ້າຍປີ 2021, ອີງຕາມທ່ານພົງໄຊສັກ ອິນທະລາດ, ຮອງລັດຖະມົນຕີກະຊວງແຮງງານແລະສະຫວັດດີການສັງຄົມ. ແຕ່ວ່າຢູ່ໃນລາວເອງກັບມີຄວາມຕ້ອງການແຮງງານຈາກຕ່າງປະເທດຫລາຍ ອີງຕາມທ່ານ ປ.ອ. ລິດທິກອນ ພູມມະສັກ, ປະທານບໍລິຫານກຸ່ມບໍລິສັດໄອເອເອັຟ ຊຶ່ງທ່ານກ່າວຢູ່ໃນກອງປະຊຸມສົນທະນາລະຫວ່າງພາກລັດ ແລະເອກກະຊົນໃນພິທີເປີດງານມະຫາກຳສົ່ງເສີມແຮງງານລາວທີ່ຈັດຂຶ້ນໃນວັນພຸດວານນີ້ວ່າ:
ທ່ານບອກວ່າ ທັງນີ້ກໍເປັນຍ້ອນວ່າໃນລາວຍັງຂາດບຸກຄະລາກອນ ຫລືແຮງງານທີ່ມີຝີມືໃນຫລາຍໆ ຂະແໜງການ. ນອກຈາກນັ້ນແຮງງານລາວກໍຍັງບໍ່ມີວິໄນດ້ານການອອກແຮງງານສູງເຊັ່ນມັກຂາດການໃນເວລາມີບຸນປະເພນີຕ່າງໆ ຊຶ່ງເຮັດໃຫ້ເປັນການຍາກທີ່ຜູ້ຈ້າງງານຈະສຳເລັດການຜະລິດໄດ້ຕາມແຜນການ, ອີງຕາມຄຳຕິຊົມຈາກຫລາຍໂຮງງານໃນລາວທີ່ທ່ານພອນສານ ວິໄລເມັ້ງຮອງປະທານສູນກາງກຳມະບານລາວ ເປີດເຜີຍໃຫ້ຟັງຢູ່ໃນມະຫາກຳແຮງງານລາວທີ່ກ່າວມາຂ້າງເທິງນັ້ນ.
