ທາງການລາວ ໄດ້ລົງນາມໃນບັນທຶກຄວາມເຂົ້າໃຈ (MOU)
ຮ່ວມກັບ ບໍລິສັດເອກະຊົນ ແລະ ຕ່າງຊາດ ກ່ຽວກັບການພັດທະນາ
ແຫລ່ງພະລັງງານໄຟຟ້າແລ້ວ ຈຳນວນທັງໝົດ 357 ໂຄງການ ໃນ
ທົ່ວປະເທດ.
ກະຊວງພະລັງງານ ແລະ ບໍ່ແຮ່ ລາຍງານວ່າ ຈົນເຖິງເດືອນກໍລະກົດ 2015 ນີ້ ທາງການ
ລາວ ທັງໃນສູນກາງ ແລະ ລະດັບທ້ອງຖິ່ນ ໄດ້ລົງນາມ ໃນບັນທຶກຄວາມເຂົ້າໃຈ (MOU)
ຮ່ວມກັບບັນດາບໍລິສັດເອກະຊົນລາວ ແລະ ຕ່າງຊາດ ກ່ຽວກັບການພັດທະນາແຫລ່ງ
ພະລັງງານໄຟຟ້າແລ້ວ ຈຳນວນທັງໝົດ 357 ໂຄງການ ໃນທົ່ວປະເທດ ໂດຍມີກຳລັງ
ຕິດຕັ້ງລວມເຖິງ 26,147 ເມກາວັດ ແລະ ຄິດເປັນກຳລັງການຜະລິດກະແສໄຟຟ້າ ລວມ
ກັນໄດ້ເຖິງ 115,118 ລ້ານກິໂລວັດຕໍ່ໂມງຕໍ່ປີ.
ໂດຍການລົງນາມໃນ MOU ດັ່ງກ່າວນີ້ ທາງການລາວໄດ້ວາງເປົ້າໝາຍໄວ້ວ່າ ຈົນເຖິງທ້າຍປີ 2019 ຈະມີເຂື່ອນໄຟຟ້າ ທີ່ສ້າງແລ້ວສຳເລັດເພີ້ມຂຶ້ນອີກ 45 ໂຄງການ ຊຶ່ງຈະເຮັດໃຫ້ລາວ ມີເຂື່ອນທີ່ຜະລິດໄຟຟ້າເຖິງ 74 ໂຄງການ ໂດຍມີກຳລັງຕິດຕັ້ງລວມ 10,000 ເມກາວັດ ແລະ ຄິດເປັນກຳລັງການຜະລິດກະແສໄຟຟ້າໄດ້ເກືອບ 50,000 ລ້ານກິໂລວັດຕໍ່ໂມງ ໃນປີ 2019 ຊຶ່ງຖືເປັນບາດກ້າວສຳຄັນຂອງການພັດທະນາລາວ ໃຫ້ເປັນຜູ້ສົ່ງອອກພະລັງງານໄຟຟ້າລາຍໃຫຍ່ ຫຼື ເປັນໝໍ້ໄຟຂອງເອເຊຍ ໃນໄລຍະຕໍ່ໄປ.
ທາງດ້ານ ທ່ານດາວວົງ ພອນແກ້ວ ຫົວໜ້າກົມນະໂຍບາຍ ແລະ
ແຜນການພະລັງງານ ກະຊວງພະລັງງານ ແລະ ບໍ່ແຮ່ ຢືນຢັນວ່າ
ລັດຖະມົນຕີພະລັງງານຈາກລາວ ໄທ ມາເລເຊຍ ແລະ ສິງກະໂປ
ມີກຳນົດ ທີ່ຈະຮ່ວມກັນລົງນາມໃນ MOU ວ່າດ້ວຍ ການເຊື່ອມຕໍ່
ລະບົບສາຍສົ່ງ ກະແສໄຟຟ້າ ລະຫວ່າງກັນໃນເດືອນຕຸລາ 2015 ນີ້.
ໂດຍການລົງນາມດັ່ງກ່າວນີ້ ຈະມີຂຶ້ນໃນໂອກາດກອງປະຊຸມລະດັບ
ລັດຖະມົນຕີດ້ານພະລັງງານຄັ້ງທີ 33 ຂອງອາຊ່ຽນທີ່ກຳນົດຈະມີຂຶ້ນ
ໃນເດືອນຕຸລາປີນີ້ ຢູ່ທີ່ມາເລເຊຍ ຊຶ່ງກ່ອນໜ້ານີ້ ທາງການຂອງທັງ
4 ປະເທດກໍໄດ້ມີການແຕ່ງຕັ້ງຄະນະປະຕິບັດງານຂຶ້ນມາຮັບຜິດຊອບ ໃນການຈັດທຳຂໍ້ຕົກລົງ ລະຫວ່າງກັນເສັດສົມບູນແລ້ວ ໂດຍປະກອບມີເນື້ອໄນສຳຄັນ 4 ດ້ານດ້ວຍກັນ ກໍຄືດ້ານເທັກນິກ ດ້ານພາສີອາກອນ ດ້ານລະບຽບກົດໝາຍ ແລະ ດ້ານການບໍລິຫານທີ່ຈະຖືເປັນຫລັກການປະຕິບັດຮ່ວມກັນຕໍ່ໄປ ທັງຍັງຈະຖືເປັນຕົ້ນແບບ ຂອງການປະຕິບັດແຜນການຮ່ວມມືດ້ານພະລັງງານ ຂອງອາຊ່ຽນ ຫຼື ASEAN Power Grid ອີກດ້ວຍ.
ກ່ອນໜ້ານີ້ ກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມື ລາວ-ໄທ ຄັ້ງທີ 19 ຢູ່ນະຄອນຫຼວງວຽງຈັນ ເມື່ອທ້າຍເດືອນມັງກອນ 2015 ທີ່ມີລັດຖະມົນຕີວ່າການຕ່າງປະເທດ ທັງສອງຝ່າຍເປັນປະທານຮ່ວມກັນນັ້ນ ທາງການໄທ ກໍໄດ້ໃຫ້ການຢືນຢັນຢ່າງໜັກແໜ້ນວ່າ ຈະຍັງຄົງຮັບຊື້ພະລັງງານໄຟຟ້າຕາມສັນຍາ ທີ່ໄດ້ຕົກລົງໄວ້ກັບທາງການລາວໃນປະລິມານລວມ 7,000 ເມກາວັດ ເປັນເວລາ 25 ປີ ນັບຈາກປີ 2016 ເປັນຕົ້ນໄປ.
ໃນປັດຈຸບັນນີ້ ມີເຂື່ອນທີ່ຜະລິດກະແສໄຟຟ້າ ໃນລາວແລ້ວຈຳນວນ 29 ໂຄງການ ສ່ວນທີ່ກຳລັງຢູ່ໃນລະຫວ່າງດຳເນີນການກໍ່ສ້າງນັ້ນ ມີຢູ່ 45 ໂຄງການ ແລະອີກ 300 ກວ່າໂຄງການຢູ່ໃນຂັ້ນຕອນຂອງການສຶກສາສຳຫຼວດ ອອກແບບ ຫຼື ສະແຫວງຫາເງິນທຶນ ທີ່ຈະນຳໃຊ້ໃນການກໍ່ສ້າງຕໍ່ໄປ.
ທັງນີ້ໂດຍຈາກການສຶກສາໃນໄລຍະທີ່ຜ່ານມາ ພົບວ່າ ການກໍ່ສ້າງເຂື່ອນໃນລາວ ຢ່າງເຕັມກຳລັງນັ້ນ ຈະເຮັດໃຫ້ສາມາດຜະລິດພະລັງງານໄຟຟ້າໄດ້ລວມກັນ ລະຫວ່າງ 28,000 ເຖິງ 30,000 ເມກາວັດ ທັງກໍຍັງຈະສົ່ງຜົນດີຕໍ່ການພັດທະນາເພື່ອລົບລ້າງ ບັນຫາຄວາມຍາກຈົນຂອງປະຊາຊົນລາວບັນດາເຜົ່າ ທີ່ຢູ່ເຂດຊົນນະບົດອີກດ້ວຍ ດັ່ງທີ່ ທ່ານດາວວົງ ໄດ້ໃຫ້ການຊີ້ແຈງວ່າ:
“ເວລາເຮົາພັດທະນາເຂື່ອນໄຟຟ້ານ້ຳຕົກ ມັນຊ່ວຍໃນການພັດທະນາເຂດຊົນນະບົດ ເພາະວ່າ ໂຄງການໄຟຟ້ານ້ຳຕົກນີ້ ຊິໄປຕັ້ງຢູ່ຊົນນະບົດ ຫ່າງໄກສອກຫລີກ ສະນັ້ນ ຄັນມີໂຄງການຢູ່ຈຸດໃດ ຜົນພອຍໄດ້ກໍຕາມມາ ເພາະວ່າ ເຮົາບໍ່ໄດ້ແຕ່ໄຟຟ້າ ເຮົາຊິໄດ້ອັນອື່ນໄປນຳ ເຊັ່ນວ່າ ຖະໜົນຫົນທາງ ຮັກສາແຫລ່ງນ້ຳໄວ້ໃຊ້ ໃນລະດູແລ້ງ ສາມາດເພາະລ້ຽງປາໄວ້ເປັນແຫລ່ງອາຫານ ຫຼື ວ່າເປັນເຂດທ່ອງທ່ຽວ.”
ທັງນີ້ໂດຍກະຊວງພະລັງງານແລະບໍ່ແຮ່ ໄດ້ວາງແຜນການຈະຜະລິດພະລັງງານໄຟຟ້າ ໃຫ້ເພີ້ມຂຶ້ນຈາກ 3,200 ເມກາວັດ ໃນປັດຈຸບັນ ເປັນບໍ່ນ້ອຍກວ່າ 12,500 ເມກາວັດພາຍໃນປີ 2020.