ເຈົ້າໜ້າທີ່ພະແນກທ່ອງທ່ຽວເຂດນະຄອນວຽງຈັນ ໄດ້ເປີດເຜີຍໃຫ້ຮູ້ວ່າ ໃນໂອກາດການ
ສະເຫລີມສະຫລອງການ ສະຖາປະນານະຄອນຫລວງວຽງຈັນຂອງລາວຄົບຮອບ 450 ປີ
ລະຫວ່າງວັນທີ່ 15-21 ເດືອນພິຈິກນີ້ ພະແນກທ່ອງທ່ຽວນະຄອນວຽງຈັນໄດ້ຮ່ວມມືກັບ
ສະມາຄົມທ່ອງທ່ຽວຈັດລາຍການທ່ອງທ່ຽວໃນເຂດນະຄອນຫລວງ ວຽງຈັນເພື່ອຮອງຮັບ
ນັກທ່ອງທ່ຽວຄົນລາວແລະຊາວຕ່າງຊາດເປັນກໍລະນີພິເສດ.
ລາຍການທ່ອງທ່ຽວທີ່ຈັດຂຶ້ນເປັນກໍລະນີພິເສດໃນຄັ້ງນີ້ ແມ່ນເນັ້ນໜັກໃຫ້ຄວາມສໍາຄັນເປັນ
ພິເສດກັບການທ່ອງທ່ຽວທາງດ້ານປະຫວັດສາດ ແລະວັດທະນະທໍາ ເພື່ອເຮັດໃຫ້ນັກທ່ອງ
ທ່ຽວມີຄວາມເຂົ້າໃຈ ໃນໄລຍະ 450 ປີ ທີຜ່ານມາດ້ວຍການໄປຢ້ຽມຊົມສະຖານທີ່ສໍາຄັນ
ຕ່າງໆໃນທົ່ວນະຄອນວຽງຈັນ ດັ່ງທີ່ເຈົ້າໜ້າທີ່ພະແນກທ່ອງທ່ຽວເຂດນະຄອນວຽງຈັນ
ຄົນດັ່ງກ່າວ ໄດ້ໃຫ້ການຊີ້ແຈງໃນຕອນນຶ່ງວ່າ:
“ລາຍການທ່ອງທ່ຽວຢູ່ໃນຕົວເມືອງ ກໍໄດ້ມີການຫ້າງຫາກະກຽມສາມລາຍການໃຫຍ່ ເພື່ອໃຫ້ບັນດາແຂກທີ່ເຂົ້າມາຮ່ວມໃນງານ ໄດ້ມີໂອກາດໄດ້ໄປທ່ອງທ່ຽວຢ້ຽມຊົມບັນດາແຫລ່ງທ່ອງທ່ຽວທາງປະຫວັດ ສາດແລະວັດທະນະທໍາ ຂອງບ້ານເຮົາຫັ້ນ ຊຶ່ງໄດ້ມີການລວມເອົາບັນດາແຫລ່ງທ່ອງທ່ຽວທ່ີມີຈຸດເດັ່ນ ເຊັ່ນ ຫໍພະແກ້ວ ວັດສີສະເກດ ພະທາດຫລວງ ພິພິດທະພັນໄກສອນ ພົມວິຫານ ແລະ ປະຕູໄຊ ເປັນຕົ້ນ”
ທາງການລາວຄາດຫວັງວ່າ ຈະມີນັກທ່ອງທ່ຽວທັງຄົນລາວແລະຊາວຕ່າງຊາດຫລາຍໝື່ນຄົນ ທີ່ຈະພາກັນເດີນທາງເຂົ້າໄປຮ່ວມການສະເຫລີມສະຫລອງ 450 ປີນະຄອນວຽງຈັນ ຊຶ່ງກໍຈະມີສ່ວນຢ່າງສໍາຄັນໃນການເຮັດໃຫ້ມີຈໍານວນນັກທ່ອງທ່ຽວຊາວຕ່າງຊາດເດີນທາງເຂົ້າໄປ ທີ່ນະຄອນວຽງຈັນໃນຕະຫລອດປີນີ້ ເພີ່ມຂຶ້ນຈາກປີຜ່ານມາ ຄິດເປັນອັດຕາສະເລ່ຍທີ່ເກີນກວ່າ 12% ກໍຄືເພີ່ມຂຶ້ນຈາກ 7 ແສນກວ່າຄົນເປັນຫລາຍກວ່າ 8 ແສນຄົນ ຊຶ່ງກໍຈະເຮັດໃຫ້ມີເງິນຕາຕ່າງປະເທດໄຫລເຂົ້າສູ່ທຸລະກິດພາກບໍລິການໃນເຂດນະຄອນວຽງຈັນ ຄິດເປັນ ມູນຄ່າລວມບໍ່ໜ້ອຍກວ່າ 90 ລ້ານໂດລາ.
ທາງການລາວໄດ້ວາງແຜນການທີ່ຈະຈັດງານສະເຫລີມສະຫລອງ 450 ປີນະຄອນວຽງຈັນຢ່າງຍິ່ງໃຫຍ່ ດ້ວຍການຈັດຂະບວນແຫ່ທີ່ມີມວນຊົນຫລາຍກວ່າໝື່ນຄົນຈາກ 38 ພາກ ສ່ວນຂອງພັກແລະລັດຖະບານເຂົ້າຮ່ວມ ໃນຂະບວນແຫ່ໃນວັນທີ່ 19 ເດືອນພະຈິກ ທີ່ຖືເປັນມື້ສະເຫລີມສະຫລອງໃຫຍ່ຂອງການຄົບງັນ 7 ມື້ 7 ຄືນ ກັບທັງຍັງຈະມີການຈັດງານຕະຫລາດນັດຢູ່ສະໜາມທາດຫລວງ ກັບທີ່ສູນ Lao-ITECC ແລະທີ່ສະໜາມກີລາແຫ່ງໃໝ່ ຢູ່ຫລັກ 16 ຖະໜົນເລກ 13 ໃຕ້ໃນເຂດເມືອງໄຊທານີ ໃນຕະຫລອດ 7 ມື້ 7 ຄືນດັ່ງກ່າວດ້ວຍ. ເມື່ອວັນທີ່ 7 ເດືອນພະຈິກທີ່ຜ່ານມານັ້ນ ທາງການລາວກໍໄດ້ທໍາພິທີສະຫລອງສົມໂພດອະນຸສາວະລີເຈົ້າອະນຸວົງ ຢູ່ບໍລິເວນສວນເຈົ້າອະນຸວົງ ຊຶ່ງຕັ້ງຢູ່ແຄມນໍ້າ ຂອງດ້ານຫລັງຫໍຄໍາ ຢ່າງເປັນທາງການແລ້ວ ຊຶ່ງຖືເປັນ 1 ໃນ 21 ໂຄງການທີ່ທາງການລາວໄດ້ວາງແຜນໄວ້ໃນແຜນ ການສະເຫລີມສະຫລອງ ນະຄອນວຽງຈັນຄົບຮອບ 450 ປີ ໂດຍຮູບຫລໍ່ ມີຄວາມສູງເຖິງ 8 ແມດ ແລະຖ້າຫາກລວມແທ່ນຢືນດ້ວຍ ກໍຖືວ່າເປັນຮູບ ຫລໍ່ທີ່ສູງທີ່ສຸດໃນລາວ ທີ່ຕ້ອງໃຊ້ທອງແດງສໍາລັບຫລໍ່ຮູບປັ້ນ ຄິດເປັນນໍ້າໜັກລວມເຖິງ 10 ຕັນກວ່າ.
ສ່ວນໂຄງການອື່ນໆທ່ີເປັນສ່ວນນຶ່ງໃນ 21 ໂຄງການທີ່ສໍາຄັນເຊັ່ນດຽວກັນ ກໍຄືການປະຕິ
ສັງຂອນວັດສີສະເກດ ການຂະຫຍາຍສະໜາມພະທາດຫລວງ ການພັດທະນາຕະຫລາດ
ເຊົ້າ ການກໍ່ສ້າງຖະນົນວຽງຈັນ 450 ປີ ການກໍ່ສາງສໍານັກງານປົກຄອງແລະສະພາເຂດນະ
ຄອນວຽງຈັນ ການວາງຜັງເມືອງໃໝ່ຂອງວຽງຈັນເພື່ອຮອງຮັບການພັດທະນາໄປສູ່ຄວາມ
ທັນສະໄໝ ການພັດທະນາເສດຖະກິດພິເສດຢູ່ດົງໂພສີ ແລະການສ້າງເຂື່ອນກັນຕາຝັ່ງ
ເຈື່ອນໃນແນວແມ່ນໍ້າຂອງ ຈາກເກົ້າລ້ຽວເຖິງທາດຂາວເປັນຕົ້ນ.
