ເຈົ້າໜ້າທີ່ຂັ້ນສູງໃນກະຊວງແຮງງານແລະສະຫວັດດີການສັງຄົມຂອງລາວຍອມຮັບວ່າ ໃນ ປັດຈຸບັນນີ້ຍັງຄົງມີແມ່ຍິງແລະເດັກນ້ອຍລາວຈໍານວນບໍ່ໜ້ອຍທີ່ຕົກເປັນເຫຍື່ອຂອງຂະບວນ ການຄ້າມະນຸດຂ້າມຊາດໃນໄທໃນ ໄລຍະ 5 ປີມານີ້ ກໍປາກົດວ່າທາງການລາວແລະໄທສາມາດໃຫ້ການຊ່ວຍເຫລືອແກ່ບັນດາແມ່ຍິງແລະເດັກ ນ້ອຍລາວທີ່ຕົກເປັນເຫຍື່ອຂອງຂະບວນການຄ້າມະນຸດຂ້າມຊາດໃນໄທໄດ້ຫລາຍກວ່າ 2,200 ຄົນແລະທຸກຄົນກໍໄດ້ຖືກສົ່ງຕົວກັບຄືນມາປະເທດລາວແລ້ວ.
ແຕ່ຢ່າງໃດກໍຕາມ ເຈົ້າໜ້າທີ່ລາວກໍໄດ້ໃຫ້ການຍອມຮັບວ່າບໍ່ຮູ້ຈໍານວນທີ່ຄັກແນ່ຂອງແມ່ຍິງແລະເດັກນ້ອຍລາວ ທີ່ຕົກໄປເປັນເຫຍື່ອຂອງຂະບວນການຄ້າມະນຸດຢູ່ໃນໄທໃນປັດຈຸບັນນີ້ ຫາກແຕ່ທາງການກະຊວງແຮງງານຂອງໄທໃນປັດຈຸບັນນີ້ ຫາກແຕ່ທາງການກະຊວງແຮງງານຂອງໄທ ກໍໄດ້ປະເມີນສະຖານະການວ່າ ມີແຮງງານລາວທີ່ທໍາງານຢູ່ໃນປະເທດໄທຫລາຍກວ່າ 4 ແສນຄົນໃນປັດຈຸບັນ ໂດຍໃນຈໍານວນດັ່ງກ່າວກໍປາກົດວ່າມີພຽງ 8 ໝື່ນ ກວ່າຄົນເທົ່ານັ້ນ ທີ່ໄດ້ແຈ້ງຈົດທະບຽນເພື່ອຂໍອະນຸຍາດທໍາງານຢ່າງຖືກຕ້ອງຕາມກົດໝາຍ ໃນໄທ. ເພາະສະນັ້ນ ກໍໝາຍຄວາມວ່າມີແຮງງານລາວຫລາຍກວ່າ 3 ແສນຄົນໄດ້ພາກັນລັກລອບທໍາງານຢູ່ໃນໄທໂດຍຜິດກົດໝາຍ ແລະເກີນກວ່າ 60% ໃນຈໍານວນນີ້ ກໍຄືແມ່ ຍິງແລະເດັກນ້ອຍລາວ ຈຶ່ງມີຄວາມສ່ຽງຢ່າງຍິ່ງ ທີ່ຈະຕ້ອງຕົກໄປເປັນເຫຍື່ອຂອງຂະບວນ ການຄ້າມະນຸດຂ້າມຊາດໃນໄທ.
ຍິ່ງໄປກວ່ານັ້ນ ເຈົ້າໜ້າທີ່ລາວຍັງໄດ້ໃຫ້ການຍອມຮັບດ້ວຍວ່າ ເປັນການຍາກຢ່າງຍິ່ງທີ່ ຈະສາມາດປ້ອງກັນ ບໍ່ໃຫ້ແຮງງານລາວເຫລົ່ານີ້ລັກລອບເຂົ້າໄປທໍາງານຢູ່ໃນປະເທດໄທ ເນຶ່ອງຈາກວ່າລາວກັບໄທມີຊາຍແດນຕິດຕໍ່ກັນ ຍາວກວ່າ 1,800 ກິໂລແມັດ ແລະໃນ ຂະນະດຽວກັນ ການທີ່ຢູ່ໃນລາວເອງກໍບໍ່ສາມາດທີ່ຈະຈ້າງແຮງງານລາວ ທີ່ມີເພີ່ມຫລາຍ ຂຶ້ນທຸກປີໄດ້ທັງໝົດ ແລະອັດຕາຄ່າຈ້າງນັ້ນກໍຕໍ່າກວ່າຢູ່ໃນໄທດ້ວຍແລ້ວ ຈຶ່ງເຮັດໃຫ້ແຮງງານລາວ ຍອມສ່ຽງເດີນທາງເຂົ້າໄປລັກລອບທໍາງານໃນໄທ ຢູ່ເລື້ອຍມາ.
ແຂວງນຶ່ງທີ່ມີບັນຫາແມ່ຍິງແລະເດັກນ້ອຍລາວ ຕົກເປັນເຫຍື່ອຂອງການຄ້າມະນຸດຂ້າມຊາດ ໃນໄທ ຫລາຍທີ່ສຸດນັ້ນ ກໍຄືແຂວງຈໍາປາສັກ ຊຶ່ງຈາກການເກັບກໍາຂໍ້ມູນເບື້ອງຕົ້ນ ໂດຍພະ ແນກແຮງງານຂອງແຂວງເອງ ກໍພົບວ່າມີເຍົາ ວະຊົນລາວຈາກແຂວງຈໍາປາສັກ ຫລາຍກວ່າ 3 ໝື່ນຄົນທີ່ເດີນທາງໄປລັກລອບທໍາງານຢູ່ໃນໄທ ແລະເກີນກວ່າເຄິ່ງນຶ່ງໃນຈໍານວນນີ້ ກໍຄືເຍົາວະຊົນລາວເພດຍິງ.
ທາງດ້ານສະຫະພັນແມ່ຍິງແຂວງຈໍາປາສັກກໍ ໄດ້ພະຍາຍາມແກ້ໄຂບັນຫາດັ່ງກ່າວນີ້ ດ້ວຍການສ້າງຕັ້ງກຸ່ມທ້ອນເງິນເພື່ອໃຫ້ມີບົດບາດ ໃນການເສີມສ້າງເສດຖະກິດຄອບຄົວໃນແຕ່ ລະໝູ່ບ້ານໃຫ້ໄດ້ຢ່າງກວ້າງຂວາງຫລາຍຂຶ້ນ ນັບມື້ ຊຶ່ງກໍຈະມີສ່ວນຢ່າງສໍາຄັນໃນການຢຸດຍັ້ງການເດີນທາງ ເຂົ້າໄປລັກລອບທໍາງານໃນ ໄທຂອງເຍົາວະຊົນລາວ ດັ່ງທີ່ທ່ານນາງພູທອນ ສຸພັນທອງ ໄດ້ໃຫ້ການຊີ້ແຈງເຖິງຜົນການ ດໍາເນີນງານໃນໄລຍະນີ້ ວ່າ:
“ພວກເຮົາກໍໄດ້ເອົາໃຈໃສ່ປຸກລະດົມຊຸກຍູ້ໃຫ້ເອື້ອຍນ້ອງແມ່ຍິງ ໄດ້ພ້ອມກັນປະຕິ ບັດໃນການສ້າງເສດຖະກິດຄອບຄົວ ແນໃສ່ເພື່ອລົບລ້າງຄວາມທຸກຍາກ ແລະ ໃນນັ້ນ ພວກເຮົາກໍໄດ້ຊຸກຍູ້ໃນການສ້າງຕັ້ງກອງທຶນພັດທະນາແມ່ຍິງ ກໍຄືກຸ່ມ ເງິນທ້ອນໂດຍສະເພາະ ພວກເຮົາໄດ້ຈັດຕັ້ງປະຕິບັດຢູ່ທີ່ເມືອງປາກເຊ ເມືອງ ຊະນະສົມບູນ ແລະເມືອງໂຂງ ຊຶ່ງພວກເຮົາມີກຸ່ມເງິນທ້ອນຢູ່ 42 ກຸ່ມ ມີສະມາ ຊິກ ທັງໝົດ 6,000 ກວ່າຄົນແລະມີເງິນທ້ອນຢູ່ 6 ຕື້ 800 ລ້ານກວ່າກີບ.”
ແຕ່ຢ່າງໃດກໍຕາມ ທາງການລາວກໍຄາດຫວັງວ່າ ບັນຫາດັ່ງກ່າວນີ້ຈະລົດລົງໃນໄລຍະຕໍ່ໄປ ຖ້າຫາກວ່າໄດ້ຮັບການຊ່ວຍເຫລືອຈາກຕ່າງປະເທດ ໃນການພັດທະນາຝີມືແຮງງານໃນລາວໃຫ້ໄດ້ມາດຕະຖານ ແລະເປັນທີ່ຍອມຮັບຂອງນາຍຈ້າງໃນຕ່າງປະເທດຢ່າງແທ້ຈິງ ອັນທີ່ຈະເຮັດໃຫ້ມີການຈ້າງແຮງງານລາວຢ່າງຖືກຕ້ອງຕາມກົດໝາຍ ນັບມື້ຫລາຍຂຶ້ນນັ້ນເອງ ຊຶ່ງຕໍ່ ກໍລະນີດຽວກັນນີ້ ທາງການສະຖານເອກອັກຄະລັດຖະທູດສະຫະລັດ ທີ່ນະຄອນຫລວງວຽງຈັນ ກໍໄດ້ຕົກລົງໃຫ້ການຊ່ວຍເຫລືອແກ່ທາງການລາວໃນດ້ານດັ່ງກ່າວນີ້ ໂດຍແນໃສ່ການ ຫລຸດຜ່ອນແລະແກ້ໄຂບັນຫາແມ່ຍິງແລະເດັກນ້ອຍລາວ ທີ່ຕົກໄປເປັນເຫຍື່ອຂອງຂະບວນ ການຄ້າມະນຸດຂ້າມຊາດ ຢູ່ໃນໄທເປັນສໍາຄັນ.
