ເຈົ້າໜ້າທີ່ຂັ້ນສູງໃນສູນຕ້ານໂຣກເອດສ໌ແຫ່ງຊາດລາວໄດ້
ເປີດເຜີຍໃຫ້ຮູ້ວ່າ ລາວເປັນປະເທດນຶ່ງ ທີ່ມີປະຊາກອນ
ເພດຍິງຕິດເຊື້ອໂຣກ HIV-AIDs ເພີ່ມຂຶ້ນຢ່າງໄວວາທີ່
ສຸດໃນຂົງເຂດເອເຊຍ-ປາຊິຟິກ ຊຶ່ງກໍຄືອັດຕາສະເລ່ຍ
ການຕິດເຊື້ອໂຣກ HIV-AIDs ຂອງປະຊາກອນເພດຍິງ
ລາວໄດ້ເພີ່ມຂຶ້ນຈາກ 18% ຂອງຈໍານວນຜູ້ຕິດເຊື້ອທັງ
ໝົດໃນປີ 1990 ມາເປັນເຖິງ 35% ຂອງຈໍານວນຜູ້ຕິດ
ເຊື້ອທັງໝົດໃນລາວ ໃນປີ 2010 ນັ້ນເອ.
ເຖິງແມ່ນວ່າອັດຕາການຕິດເຊື້ອ HIV-AIDS ຂອງຄົນ
ລາວໃນປັດຈຸບັນຈະຍັງຄົງຢູ່ໃນລະດັບທີ່ຕໍ່າ ເມື່ອທຽບ
ໃສ່ກັບປະເທດອື່ນໃນພູມິພາກດຽວກັນ ກໍຄືຈາກການ
ສຸ່ມກວດເລືອດຂອງປະຊາຊົນລາວຈໍານວນ 227,879 ຄົນໃນ 17 ແຂວງທົ່ວປະເທດ
ນັບຈາກປີ 1990 ເປັນຕົ້ນມານັ້ນ ພົບວ່າມີຄົນລາວຕິດເຊື້ອຈໍານວນ 3,659 ຄົນ ຫລື
ຄິດເປັນອັດຕາສະເລ່ຍພຽງແຕ່ 1.6% ເທົ່ານັ້ນກໍຕາມ ຫາກແຕ່ປາກົດວ່າໃນຈໍານວນດັ່ງ
ກ່າວນີ້ ເປັນໂຣກເອດສ໌ແລ້ວເຖິງ 2,376 ຄົນ ແລະເສຍຊີວິດໄປແລ້ວເຖິງ 1,038 ຄົນ
ຊຶ່ງກໍເປັນຍ້ອນວ່າ ລະບົບໃຫ້ບໍລິການດ້ານການປິ່ນປົວ ແລະການຮັກສາສຸຂະພາບຂອງ
ລັດຖະບານລາວນັ້ນ ຍັງຄົງບໍ່ສາມາດທີ່ຈະໃຫ້ການເບິ່ງ ແຍງບັນດາຄົນລາວທີ່ຕິດເຊື້ອ
ໂຣກດັ່ງກ່າວນີ້ໄດ້ຢ່າງທົ່ວເຖິງ ໂດຍເມື່ອປະກອບກັບການທີ່ລາວເປັນປະເທດທີ່ຕັ້ງຢູ່ເຂດ
ສູນກາງທີ່ສາມາດຈະເຊື່ອມຕໍ່ ກັບທຸກປະເທດໃນເຂດລຸ່ມແມ່ນໍ້າຂອງດ້ວຍກັນໄດ້ໃນທຸກ
ທິດທຸກທາງດ້ວຍແລ້ວ ກໍຍັງນັບເປັນປັດໄຈທີ່ສໍາຄັນທີ່ຈະເຮັດໃຫ້ມີຄວາມສ່ຽງສູງທີ່ຈະຕິດ
ເຊື້ອໂຣກດັ່ງກ່າວນີ້ຫລາຍຂຶ້ນນັບມື້ອີກດ້ວຍ ໂດຍສະເພາະແມ່ນການຕິດເຊື້ອຈາກການ
ມີເພດສໍາພັນທີ່ບໍ່ມີການປ້ອງກັນ ດັ່ງທີ່ເຈົ້າໜ້າທີ່ລາວໄດ້ໃຫ້ການຊີ້ແຈງໃນຕອນນຶ່ງວ່າ:
“ການຕິດເຊື້ອທາງເພດສໍາພັນຢູ່ບ້ານເຮົາເຫັນວ່າມັນເພີ່ມຫລາຍຂຶ້ນໃນແຕ່ລະປີ
ແລະຢູ່ໃນຂົງເຂດປະເທດອ້ອມຂ້າງຂອງເຮົາ ກໍມີການຕິດເຊື້ອຫລາຍຂຶ້ນແລະປະ
ເທດເຮົາກໍເປັນທາງຜ່ານ ຊຶ່ງແນ່ນອນວ່າ ການເດີນທາງໄປມາຫາສູ່ກັນຂອງບັນ
ດານັກທ່ອງທ່ຽວ ກໍແມ່ນບັນຫາທີ່ສະກັດກັ້ນບໍ່ໄດ້.”
ກຸ່ມປະຊາກອນລາວທີ່ມີຄວາມສ່ຽງຕໍ່ການຕິດເຊື້ອໂຣກ HIV-AIDs ຫລາຍທີ່ສຸດກໍຄືກຸ່ມແມ່ຍິງທີ່ປະກອບອາຊີບໃນພາກບໍລິການ ຕິດຕາມດ້ວຍກຸ່ມແຮງງານເຄື່ອນຍ້າຍ ກຸ່ມທີ່ຊົມໃຊ້ຢາເສບຕິດ ກຸ່ມແຮງງານໃນໂຮງງານອຸດສາຫະກໍາ ກຸ່ມນັກຮຽນນັກສຶກສາທີ່ຢູ່ຕາມຫໍພັກ ແລະກຸ່ມຮັກຮ່ວມເພດຕາມລໍາດັບ. ສ່ວນລາຍງານຂອງກະຊວງສາທາລະນະສຸກລາວ
ກໍລະບຸວ່າສາເຫດສໍາຄັນທີ່ເຮັດໃຫ້ຄົນລາວຕິດເຊື້ອ HIV-AIDs ຫລາຍທີ່ສຸດນັ້ນ ກໍຄືການມີ
ເພດສໍາພັນໂດຍບໍ່ມີການປ້ອງກັນດ້ວຍການສວມຖົງຢາງອະນາໄມ ໂດຍສະເພາະແມ່ນການ
ຕິດເຊື້ອໃນກຸ່ມແມ່ຍິງທີ່ຂາຍບໍລິການທາງເພດ ແລະກຸ່ມຮັກຮ່ວມເພດດຽວກັນນັ້ນ ກໍຍັງນັບ
ເປັນພາຫະທີ່ເຮັດໃຫ້ມີການແຜ່ລະບາດຂອງເຊື້ອໂຣກຢ່າງໄວວາອີກດ້ວຍ.
ນອກຈາກນີ້ ກຸ່ມແຮງງານລາວທີ່ໄດ້ພາກັນລັກລອບທໍາງານໂດຍຜິດກົດໝາຍຢູ່ໃນປະເທດເພື່ອນບ້ານ ກໍນັບເປັນອີກກຸ່ມນຶ່ງທີ່ມີຄວາມສ່ຽງຢ່າງສູງທັງໃນຖານະທີ່ເປັນຜູ້ຮັບເຊື້ອ ແລະຜູ້ນໍາເຊື້ອໂຣກໄປຕິດຕໍ່ເຖິງຄົນຮັກ ໂດຍສະເພາະແມ່ນກຸ່ມແຮງງານລາວເພດຍິງ ທີ່ພາກັນລັກ ລອບທໍາງານຢູ່ໃນໄທໂດຍຜິດກົດໝາຍນັ້ນ ກໍຍັງມີໂອກາດທີ່ຈະຖືກບີບບັງຄັບໃຫ້ຕ້ອງຂາຍ ບໍລິການທາງເພດ ໂດຍບໍ່ມີການປ້ອງກັນຕົນເອງອີກດ້ວຍ.
