ໜ່ວຍປາບປາມຢາເສບຕິດຂອງໄທ ຈັບກຸມສະມາຊິກຂອງຂະບວນການຄ້າຢາເສບຕິດ
ໃນລາວ ໄດ້ເຖິງ 9,593 ຄົນ ໃນຊ່ວງ 10 ປີ ຜ່ານມາ ໂດຍຖືວ່າ ເປັນອັນດັບທີ 2 ຮອງ
ຈາກຜູ້ຕ້ອງຫາຊາວມຽນມາ ຊົງຣິດ ໂພນເງິນ ມີລາຍງານຈາກບາງກອກ.
ສຳນັກງານຄະນະກຳມະການປ້ອງກັນແລະປາບປາມຢາເສບຕິດແຫ່ງຊາດໄທ
ລາຍງານຜົນການປາບປາມການຄ້າຢາເສບຕິດໂດຍຊາວຕ່າງຊາດ ໃນໄທ ໃນໄລຍະປີ
2010-2017ທີ່ຜ່ານມາວ່າ ຝ່າຍປາບປາມຢາເສບຕິດ ໃນໄທ ສາມາດຈັບກຸມນັກຄ້າຢາເສບຕິດຊາວມຽນມາ ໄດ້ເຖິງ 13,417 ຄົນ ຊຶ່ງກໍນັບເປັນຈຳນວນນັກຄ້າຢາເສບຕິດ
ຊາວຕ່າງຊາດ ທີ່ຖືກຈັບກຸມ ໃນໄທ ຫຼາຍທີ່ສຸດ ສ່ວນອັນດັບ 2 ກໍຄືນັກຄ້າຢາເສບຕິດ
ສັນຊາດລາວ ທີີ່ທາງການໄທ ຈັບກຸມຕົວໄດ້ 9,593 ຄົນ ແລະອັນດັບທີ 3 ກໍຄືນັກຄ້າ
ຢາເສບຕິດຊາວກຳປູເຈຍ ທີ່ທາງການໄທ ຈັບກຸມຕົວໄດ້ 2,456 ຄົນ ໃນໄລຍະ
ດຽວກັນ.
ສ່ວນຢາເສບຕິດຂອງກາງທີ່ຍຶດໄດ້ ກໍປະກອບດ້ວຍ ເຮໂອອີນ 334 ກິໂລກຣັມ
ຝິ່ນ 852 ກິໂລກຣາມ ຢາບ້າ 11,125 ກິໂລກຣາມ ໄອສ໌ 2,332 ກິໂລກຣາມ ກັນຊາ
ແຫ້ງ 33,235 ກິໂລກຣາມ ກັນຊາສົດ ຫຼາຍກວ່າ 1,702 ກິໂລກຣາມ ແລະສານເຄມີ
ທີ່ເປັນສ່ວນປະສົມໃນການຜະລິດຢາເສບຕິດອີກ 26,505 ກິໂລກຣາມ.
ນອກຈາກນີ້ ດ້ວຍຜົນຂອງການຮ່ວມມືລະຫວ່າງຈີນ ມຽນມາ ລາວ ໄທ ກຳປູເຈຍ
ແລະຫວຽດນາມ ພາຍໃຕ້ປະຕິບັດການແມ່ນ້ຳຂອງປອດໄພ ຈາກບັນຫາຢາເສບຕິດ
ທີ່ໄດ້ຈັດຕັ້ງປະຕິບັດຮ່ວມກັນໃນຊ່ວງປີ 2013-2017 ທີ່ຜ່ານມາ ທັງ 6 ປະເທດ ກໍຍັງ
ສາມາດປາບປາມການຄ້າຢາເສບຕິດໄດ້ 125,274 ກໍລະນີ ຈັບຜູ້ຕ້ອງຫາໄດ້
160,000 ກວ່າຄົນ ຍຶດຢາບ້າໄດ້ 363 ລ້ານກວ່າເມັດ ສານເຄມີກວ່າ 270 ໂຕນ ໄອສ໌
ເກີນກວ່າ 13 ໂຕນ ເຮໂຣອິນກວ່າ 7,553 ກິໂລກຣາມ ຝິ່ນກວ່າ 14 ໂຕນ ກັນຊາແຫ້ງ
ເກີນກວ່າ 20ໂຕນ ອາວຸດສົງຄາມແລະອຸບປະກອນສື່ສານທີ່ທັນສະໄມ ຫຼາຍກວ່າ
10,000 ລາຍການ ພາຍໃຕ້ສະພາບການດັ່ງກ່າວນີ້ ກໍຍັງເຮັດໃຫ້ທາງການໄທ ຕ້ອງ
ເພີ້ມມາດ ຕະການເຂັ້ມງວດເຂົ້າໃນການສະກັດກັ້ນການລັກລອບຂົນຢາເສບຕິດຈາກ
ເຂດສາມ ຫ່ຽມຄຳເຂົ້າມາໃນໄທ ຫຼາຍຂຶ້ນ ໂດຍສະເພາະແມ່ນຢາບ້າ ແລະ ໄອສ໌ນັ້ນ
ດັ່ງທີ່ ທ່ານສິຣິນຢາ ສິດທິໄຊ ເລຂາທິການຄະນະກຳມະການປ້ອງກັນແລະປາບປາມ
ຢາເສບຕິດແຫ່ງຊາດໄທ ໄດ້ໃຫ້ການຢືນຢັນວ່າ: “ຕະຫຼອດປີ 2560 ເຮົາຍຶດຢາບ້າ
ໄດ້ 214 ລ້ານເມັດ ປັດຈຸບັນນີ້ ທຳງານມາໄດ້ 8 ເດືອນ ຍຶດໄດ້ປະມານ 205 ລ້ານ
ເມັດ ກໍມີແນວໂນ້ມຈະເພີ້ມຂຶ້ນ ຈັກໜ້ອຍ ກໍຕ້ອງຮຽນວ່າ ລັດຖະບານລາວໄດ້ເນັ້ນ
ໜັກໃຫ້ມີການສະກັດຢາເສບຕິດ ທີ່ຊາຍແດນ ຈະເຫັນວ່າ ຕອນນີ້ມີການຈັບກຸມ
ຢາບ້າໄດ້ຄັ້ງລະຫຼາຍໆ ບາງກໍລະນີ 13 ລ້ານເມັດ ບາງກໍລະນີ 10 ລ້ານເມັດ
ຊຶ່ງຢູ່ໃນ ລະຫວ່າງຂອງການຂົນເຂົ້າມາ ເພື່ອຈະມາພັກໄວ້ທີ່ກຸງເທບ ແລ້ວກໍຈະ
ກະຈາຍຢາອອກໄປ ສ່ວນຢາໄອສ໌ ນີ້ ຈະມຸ່ງໄປຍັງພາກໃຕ້ ເພື່ອສົ່ງຕໍ່ໄປປະເທດ
ທີ ສາມ.”
ທາງດ້ານທ່ານສົມແກ້ວ ສີລາວົງ ລັດຖະມົນຕີວ່າການກະຊວງປ້ອງກັນຄວາມສະຫງົບ
ພາຍໃນ ຍອມຮັບວ່າເຄືອຂ່າຍການຄ້າຢາເສບຕິດ ຢູ່ໃນລາວ ທີ່ມີລັກສະນະຂ້າມຊາດ
ແລະເປັນກຸ່ມແກັ້ງຄ້າຢາເສບຕິດ ທີ່ມີການນຳໃຊ້ເທກນິກຂັ້ນສູງແລະຍາກຕໍ່ການຕິດຕາມກວດກາ ແລະຈັບກຸມດັ່ງກ່າວຍັງເຮັດໃຫ້ຂະບວນການນີ້ສາມາດລັກລອບຂົນສົ່ງ
ຢາເສບຕິດ ຜ່ານລາວໄປຕ່າງປະເທດໄດ້ຢ່າງຫຼວງຫຼາຍ ແລະການທີ່ລາວຕົກເປັນ
ເຂດຜ່ານຂອງການລັກລອບຂົນສົ່ງຢາເສບຕິດ ຈາກເຂດສາມຫ່ຽມຄຳໄປຕ່າງປະເທດ
ດັ່ງກ່າວ ຍັງເຮັດໃຫ້ສັງຄົມລາວ ຕ້ອງປະເຊີນກັບບັນຫາການຊົມໃຊ້ຢາເສບຕິດແລະ
ອາຊະຍາກຳ ກ່ຽວກັບຢາເສບຕິດເພີ້ມຂຶ້ນຢ່າງຕໍ່ເນື່ອງອີກດ້ວຍ.
ທັງນີ້ ສານປະຊາຊົນລາວ ໄດ້ຕັດສິນຄະດີຄວາມຜິດກ່ຽວກັບຢາເສບຕິດ ຈຳນວນ
28,475 ຄະດີ ຈາກທີ່ໄດ້ຟ້ອງຮ້ອງຕໍ່ສານທັງໝົດ 29,780 ຄະດີໃນຊ່ວງ 5 ປີ ທີ່ຜ່ານ
ມາ ທາງດ້ານ ຄະນະກຳມະການປ້ອງກັນແລະປາບປາມຢາເສບຕິດແຫ່ງຊາດໄທ
ລາຍງານວ່າ ການລັກລອບປູກຝິ່ນ ໃນເຂດສາມຫ່ຽມຄຳ ກໍຍັງຄົງສືບຕໍ່ ຢູ່ເລື້ອຍມາ
ໂດຍມີເນື້ອທີ່ກວ້າງກວ່າ 6 ໝື່ນເຮັກຕາ ໃນມຽນມາ ແລະກວ້າງກວ່າ 1 ໝື່ນເຮັກຕາ
ໃນລາວ ກັບ 1,500 ກວ່າເຮັກຕາ ໃນປະເທດໄທ.