ທ່ານອ້ວນ ພົມມະຈັກ ເອກອັກຄະລັດຖະທູດວິສາມັນຜູ້ມີອໍານາດເຕັມຂອງສປປ ລາວ ປະຈໍາປະເທດໄທ ໄດ້ໃຫ້ການຢືນຢັນວ່າການປັກປັນເຂດແດນລະຫວ່າງລາວກັບປະເທດເພື່ອນບ້ານ ໄດ້ຄືບໜ້າໄປຫລາຍແລ້ວໃນປັດຈຸບັນນີ້ ໂດຍທີ່ໄດ້ດໍາເນີນການປັກປັນເຂດແດນສໍາ ເລັດແລ້ວນັ້ນ ກໍຄືເຂດແດນທີ່ຕິດຕໍ່ກັບຈີນ ພະມ້າ ແລະ ຫວຽດນາມ ສ່ວນກັບກໍາປູເຈຍຈະສໍາເລັດພາຍໃນປີນີ້ ແລະທີ່ຍັງຈະຕ້ອງດໍາເນີນການປັກປັນໃຫ້ສຳເລັດໃຫ້ໄດ້ ໃນໄລຍະຕໍ່ໄປກໍຄືເຂດແດນກັບປະເທດໄທ ດັ່ງທີ່ທ່ານອ້ວນໄດ້ໃຫ້ການຊີ້ແຈງເຖິງການປັກປັນເຂດແດນລະຫວ່າງລາວກັບປະເທດເພື່ອນບ້ານ ໃນໄລຍະທີ່ຜ່ານມາຈົນເຖິງປັດຈຸບັນນີ້ໃນຕອນນຶ່ງວ່າ:
“ກັບປະເທດຈີນນີ້ ປະມານ 505 ກິໂລແມັດກໍໄດ້ສຳເລັດແລ້ວ ແລະພວກຂ້າພະເຈົ້າກໍໄດ້ສຳເລັດການປັກປັນເຂດແດນກັບປະເທດຫວຽດນາມ ທີ່ມີລະຍະທາງຍາວ 2,070 ກິໂລແມັດ ແລ້ວກໍສຳເລັດການປັກຫລັກໝາຍເຂດແດນກັບມຽນມາ ທີ່ມີຄວາມຍາວ 236 ກິໂລແມັດ ສ່ວນຊາຍແດນກັບກໍາປູເຈຍ ກໍສິແລ້ວປີນີ້ ທັງໝົດ 535 ກິໂລແມັດ ແລະກັບໄທ ທີ່ມີຊາຍແດນຮ່ວມກັນ 1,835 ກິໂລແມັດນັ້ນ ທາງໜ້າດິນ 735 ກິໂລແມັດ ກໍໄດ້ສຳເລັດໄປແລ້ວ 92%.”
ກ່ອນໜ້ານີ້ ຄະນະອະນຸກໍາມະການດ້ານເທັກນິກລະຫວ່າງລາວ-ໄທ ໄດ້ສະເໜີລາຍງານວ່າການດໍາເນີນງານ ຮ່ວມກັນໄດ້ເພີ່ມຂຶ້ນ 15 ຫລັກ ຊຶ່ງກໍເປັນຜົນທໍາໃຫ້ການດໍາເນີນງານນັບຕັ້ງແຕ່ປີ 1997 ເປັນຕົ້ນມາຈົນເຖິງ ປີ 2009 ນັ້ນ ທາງການລາວ-ໄທ ສາມາດປັກຫລັກເຂດຊາຍແດນຮ່ວມກັນໄດ້ແລ້ວ 204 ຫລັກ.
ພ້ອມກັນນັ້ນ ທັງສອງຝ່າຍຍັງໄດ້ຮ່ວມກັນສຳຫລວດເສັ້ນສັນປັນນໍ້າ ຊຶ່ງໃຊ້ເປັນເສັ້ນແບ່ງເຂດແດນທາງບົກລະຫວ່າງກັນໄດ້ ໃນລະຍະທາງ 679 ກິໂລແມັດ ຫລືຄິດເປັນ 94% ຂອງເຂດແດນທາງບົກທັງໝົດ ເພາະສະນັ້ນ ຈຶ່ງຍັງຄົງເຫລືອເຂດແດນທາງບົກອີກ 50 ກິໂລແມັດເທົ່ານັ້ນ ທີ່ທາງການລາວ-ໄທຈະຕ້ອງດໍາເນີນການສໍາຫລວດເພື່ອຕົກລົງປັກປັນຮ່ວມກັນໃຫ້ໄດ້ຕໍ່ໄປ.
ສ່ວນເຂດແດນທາງນໍ້າ ຊຶ່ງກໍຄືເຂດຊາຍແດນໃນແນວແມ່ນໍ້າຂອງແລະນໍ້າເຫືອງທີ່ມີລະຍະທາງຍາວປະມານ 1,100 ກິໂລແມັດນັ້ນ ທ່ານອ້ວນກໍໄດ້ຢືນຢັນວ່າທາງການລາວພ້ອມຈະປະຕິບັດໃຫ້ເປັນໄປຕາມການຕົກລົງຮ່ວມ ລະຫວ່າງລັດຖະມົນຕີວ່າການຕ່າງປະເທດຂອງທັງສອງຝ່າຍ ທີ່ໄດ້ຕົກລົງຮ່ວມກັນວ່າຈະດໍາເນີນການສໍາຫລວດ ເພື່ອປັກປັນໃຫ້ສໍາເລັດພາຍໃນປີ 2010 ໂດຍໃນປັດຈຸບັນນີ້ ຄະນະອະນຸກໍາມະການດ້ານເທັກນິກກໍກໍາລັງຮ່ວມກັນ ດໍາເນີນການຈັດທໍາແຜນທີ່ພາບຖ່າຍທາງອາກາດ ເພື່ອໃຫ້ເຫັນສະພາບຂອງພື້ນທີ່ທີ່ເປັນຢູ່ຈິງໃນທຸກມື້ນີ້. ແຕ່ຢ່າງໃດກໍຕາມ ທ່ານອ້ວນກໍໄດ້ເນັ້ນຍໍ້າວ່າ ແຜນທີ່ພາບຖ່າຍທາງອາກາດທີ່ໄດ້ມີການຈັດທໍາຂຶ້ນຮ່ວມກັນນີ້ ຈະໃຊ້ເພື່ອທຽບຄຽງກັບແຜນທີ່ເດີມທີ່ຝລັ່ງເສດກັບສະຢາມ(ໄທ) ໄດ້ຈັດທໍາໄວ້ຮ່ວມກັນເມື່ອເກືອບ 100 ປີ ມາແລ້ວເທົ່ານັ້ນ ຊຶ່ງກໍຄືແຜນທີ່ ທີ່ແນບທ້າຍສົນທິສັນຍາລະຫວ່າງສະຢາມກັບຝລັ່ງເສດນັ້ນ ຈະຍັງຄົງເປັນແຜນທີ່ ທີ່ໃຊ້ເປັນຫລັກ ໃນການປັກປັນເຂດແດນທາງນໍ້າລະຫວ່າງລາວ-ໄທຢູ່ນັ້ນເອງ.
ການສໍາຫລວດເພື່ອການປັກປັນເຂດແດນລະຫວ່າງລາວກັບໄທໄດ້ມີການຊັກຊ້າ ແລະຕ້ອງ ມີການເລື່ອນເປົ້າໝາຍທີ່ຈະດໍາເນີນການໃຫ້ສໍາເລັດມາໂດຍຕະຫລອດ ຊຶ່ງກໍຄືນັບຈາກປີ 2003 ເປັນຕົ້ນມາແລ້ວ ເພາະທາງການລາວກັບໄທໄດ້ຕົກລົງຮ່ວມກັນວ່າ ຈະດໍາເນີນການປັກປັນເຂດແດນທາງບົກໃຫ້ສໍາເລັດພາຍໃນປີ 2003 ແລະປັກປັນເຂດແດນນໍ້າໃຫ້ສໍາເລັດ ພາຍໃນປີ 2005.
ຫາກແຕ່ດ້ວຍຂໍ້ຂັດແຍ້ງໃນການອ້າງພະຍານຫລັກຖານຕ່າງໆທີ່ແຕກຕ່າງກັນໃນ 35 ພື້ນທີ່ເປັນຢ່າງໜ້ອຍ ຊຶ່ງລວມເຖິງພື້ນທີ່ສູ້ລົບໃນເຂດບ້ານຮົ່ມເກົ້າ ແລະເຂດ 3 ໝູ່ບ້ານ ຄືບ້ານສະຫວ່າງ ບ້ານກາງ ແລະບ້ານໃໝ່ ທີ່ຢູ່ໃນເຂດຕິດຕໍ່ຊາຍແດນລະຫວ່າງແຂວງໄຊຍະບູລີຂອງລາວ ກັບຈັງຫວັດອຸດຕະລະດິດ ແລະຈັງຫວັດພິດສະນຸໂລກຂອງໄທດ້ວຍນັ້ນ ຈຶ່ງເຮັດໃຫ້ການປັກປັນເຂດແດນ ລະຫວ່າງລາວກັບໄທ ຕ້ອງປະສົບກັບບັນຫາຊັກຊ້າ ມາໂດຍຕະ ຫລອດ. ຍິ່ງໄປກວ່ານັ້ນ ການທີ່ປະເທດໄທມີບັນຫາຂັດແຍ້ງທາງການເມືອງພາຍໃນ ກໍຍັງເຮັດໃຫ້ການປັກປັນເຂດແດນລະຫວ່າງລາວກັບໄທ ບໍ່ສາມາດປະຕິບັດໄດ້ຕາມປົກກະຕິອີກດ້ວຍ.
